ໜັງສືພິມ ປະຊາຊົນ

ສະພາ ຮັບຮອງຮ່າງກົດໝາຍວ່າດ້ວຍຊັ້ນນັກການທູດ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 10/11/2020 10:29:08 ຈຳນວນຢ້ຽມຊົມ 2304 ຄັ້ງ

ການດຳເນີນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ໃນວັນທີ 9 ພະຈິກນີ້ ໂດຍການເປັນປະທານຂອງ ທ່ານ ພົນໂທ ແສງນວນ ໄຊຍະລາດ ຮອງປະທານສະພາແຫ່ງຊາດ ບັນດາສະມາຊິກສະພາແຫ່ງຊາດ (ສສຊ) ໄດ້ຮັບຟັງການສະ ເໜີ ແລະ ປະກອບຄໍາເຫັນໃສ່ເນື້ອໃນຮ່າງກົດໝາຍ ວ່າດ້ວຍຊັ້ນນັກການທູດ (ສ້າງໃໝ່) ເພື່ອພິຈາລະນາຮັບຮອງເອົາຮ່າງກົດໝາຍສະບັບດັ່ງກ່າວ.

ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດໄດ້ຂຶ້ນສະເໜີການສ້າງກົດໝາຍ ວ່າດ້ວຍຊັ້ນນັກການທູດ ຊຶ່ງໂຄງປະກອບຂອງຮ່າງກົດໝາຍສະບັບນີ້ປະກອບມີທັງໝົດ 9 ພາກ 10 ໝວດ ແລະ 53 ມາດຕາ ຊຶ່ງ ໄດ້ກຳນົດຫຼັກການລະບຽບ ແລະ ມາດຕະການກ່ຽວກັບ ການຄຸ້ມຄອງ ການຕິດຕາມກວດກາ ການປະຕິບັດໜ້າທີ່ຂອງນັກການທູດລາວ ແນໃສ່ຮັບປະກັນປະສິດທິພາບ ແລະ ເປັນການກະຕຸກຊຸກຍູ້ ເພື່ອເຮັດໃຫ້ນັກການທູດລາວມີຄວາມກະຕືລືລົ້ນ ແລະ ມີຄວາມຮັບຜິດຊອບສູງໃນການເຮັດໜ້າທີ່ຂອງຕົນ ເພື່ອສ້າງມາດຕະຖານ ໃຫ້ພະນັກງານ-ລັດຖະກອນ ຂອງກະຊວງການຕ່າງປະເທດ ທີ່ສອດຄ່ອງກັບກົດໝາຍສາກົນ ພ້ອມນັ້ນຍັງແນໃສ່ພັດທະນານັກການທູດໃຫ້ມີຄຸນນະພາບ ທາງດ້ານຄຸນທາດການເມືອງ ຄຸນສົມບັດສິນທຳປະຕິວັດ ມີແບບແຜນການນຳພາ ແລະ ວິທີເຮັດວຽກ ມີຄວາມເຂັ້ມແຂງທາງດ້ານການຈັດຕັ້ງ ວິຊາການທູດ ພາສາຕ່າງປະເທດ ມີລະບຽບວິໄນເຂັ້ມງວດ ທັງເປັນມາດຕະການຊຸກຍູ້ ຂະບວນການພັດທະນາຂະແໜງການຕ່າງປະເທດ ເປັນພື້ນຖານໃຫ້ແກ່ການປະເມີນ ບັນຈຸ ແຕ່ງຕັ້ງ ສັບຊ້ອນພະນັກງານ-ລັດຖະກອນ ຂອງກະຊວງ ເພີ່ມທະວີຄວາມເປັນເຈົ້າການຂອງຖັນແຖວນັກການທູດ ໃນການປະຕິບັດນະໂຍບາຍການຕ່າງປະເທດຂອງ ສປປ ລາວ ໃນໄລຍະໃໝ່ໃຫ້ມີໝາກຜົນສູງຂຶ້ນກວ່າເກົ່າ.

ຫຼັງຈາກກົດໝາຍສະບັບນີ້ຖືກຮັບຮອງ ແລະ ປະກາດໃຊ້ ຈະເປັນບ່ອນອີງທາງດ້ານກົດໝາຍສຳຄັນໃຫ້ກະຊວງການຕ່າງປະເທດໃນການເປັນເສນາທິການ ໃຫ້ລັດຖະບານເພື່ອຄຸ້ມຄອງວຽກງານຊັ້ນນັກການທູດ ເຮັດໃຫ້ພະນັກງານ-ລັດຖະກອນ ກະຊວງການຕ່າງປະເທດມີມາດຕະຖານ ເປັນພື້ນຖານໃຫ້ແກ່ການປັບ ປຸງມະຕິກົມການເມືອງສູນກາງພັກວ່າດ້ວຍວຽກງານຄຸ້ມຄອງພະນັກງານ ທີ່ກ່ຽວຂ້ອງກັບການແບ່ງຂັ້ນຄຸ້ມຄອງຖັນແຖວພະນັກງານ-ລັດຖະກອນກະຊວງການຕ່າງປະເທດໃຫ້ຖືກຕ້ອງ ຄືກັບການແບ່ງຂັ້ນຄຸ້ມຄອງນາຍທະຫານ ແລະ ນາຍຕຳຫຼວດ ເຫັນໄດ້ຄວາມແຕກຕ່າງຢ່າງຈະແຈ້ງ ລະຫວ່າງຊັ້ນນັກການທູດ ກັບຕຳແໜ່ງການທູດ ແລະ ຕຳແໜ່ງກົງສູນ ທັງເປັນກົດໝາຍທີ່ກຳນົດວັນການທູດລາວ ເພື່ອຍົກສູງບົດບາດຄວາມໝາຍສຳຄັນຂອງການທູດ ໃນພາລະກິດການປະຕິ ວັດຊາດ ປະຊາທິປະໄຕ ກໍຄືພາລະກິດປົກປັກຮັກສາ ແລະ ພັດທະນາປະເທດຊາດໃນໄລຍະໃໝ່ໃຫ້ສູງເດັ່ນຂຶ້ນເທືື່ອລະກ້າວ.

ຈາກນັ້ນປະທານກອງປະຊຸມກໍໄດ້ໃຫ້ທິດຊີ້ນໍາບັນດາ ສສຊ ໃນການຄົ້ນຄວ້າປະກອບຄໍາຄິດໃສ່ເນື້ອໃນຂອງກົດໝາຍສະບັບດັ່ງກ່າວຢ່າງກົງໄປກົງມາ ເພື່ອແນໃສ່ເຮັດໃຫ້ເນື້ອໃນຂອງຮ່າງກົດໝາຍ ມີເນື້ອໃນສົມບູນ ຄົບຖ້ວນ ແລະ ສອດຄ່ອງກັບສະພາບຄວາມເປັນຕົວຈິງ ພ້ອມກັນນັ້ນ ສສຊ ກໍໄດ້ລົງຄະແນນສຽງຮັບຮອງເອົາຮ່າງກົດໝາຍ ວ່າດ້ວຍຊັ້ນນັກການທູດ (ສ້າງໃໝ່) ດ້ວຍສຽງສ່ວນຫຼາຍ.

(ຂ່າວ - ຮູບ: ບຸນຕອມ ແລະ ທອງດຳ)

ຂ່າວທີ່ໄດ້ຮັບຄວາມນິຍົມ