ຊຸດ​ຝຶກ​ອົບຮົມ​ທິດ​ສະ​ດີ​ການເມືອງ ແລະ ການ​ປົກ​ຄອງ​ສໍາ​ລັບ​ເລຂາ​ພັກ​ບ້ານ​-​ນາຍບ້ານ ຊຸດ​ທີ I ຂອງ​ເມືອງ​ແກ່ນ​ທ້າວ ແຂວງ​ໄຊ​ຍະ​ບູ​ລີ ໄດ້​ຈັດ​ຂຶ້ນ​ເມື່ອ​ບໍ່​ດົນມາ​ນີ້ ທີ່​ສະໂມສອນ​ຂອງ​ເມືອງ ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ​ສະຫາຍ ສີ​ສອນ​ພັນ ບຸນ​ສີ ກໍາ​ມະການ​ພັກ​ແຂວງ ຫົວໜ້າ​ໂຮງຮຽນ​ການເມືອງ ແລະ ການ​ປົກຄອງ​ແຂວງ​ໄຊ​ຍະ​ບູ​ລີ, ສະຫາຍ ປະເສີດ ອິນ​ວົງ​ຄໍາ ຮອງ​ເລຂາ​ພັກ​ເມືອງ ປະທານ​ແນວ​ລາວ​ສ້າງ​ຊາດ​ເມືອງ, ມີ ການ​ນຳ​ພັກ​ເມືອງ​ ແລະ ເລຂາ​ໜ່ວຍ​ພັກ​ບ້ານ​-​ນາຍບ້ານ​ເຂົ້າ​ຮ່ວມ.
   ໃນ​ພິທີ ສະຫາຍ ນາງ ສຸລິຍັນ ສູນ​ວິໄລ ກໍາ​ມະ​ການ​ປະ​ຈໍາ​ພັກ​ເມືອງ, ຫົວໜ້າ​ຄະນະ​ໂຄສະນາ​ອົບຮົມ​ເມືອງ ໄດ້​ຜ່ານ​ຂໍ້​ຕົກລົງ ເລກ​ທີ 580/ຮມປຂ.ຊຍ, ລົງ​ວັນ​ທີ 26 ຕຸລາ 2020 ວ່າ​ດ້ວຍ​ການ​ອະນຸມັດ​ເປີດ​ຝຶກ​ອົບຮົມ​ທິດ​ສະ​ດີ​ການ​ການເມືອງ ສໍາ​ລັບ​ເລຂາ​ພັກ​ບ້ານ​-​ນາຍບ້ານ ຊຸດ​ທີ I ເມືອງ​ແກ່ນ​ທ້າວ ແລະ ບົດ​ສະເໜີ​ໂຄງການ​ຝຶກ​ອົບຮົມ​ທິດ​ສະ​ດີ​ການເມືອງ ແລະ ການ​ປົກ​ຄອງ​ສໍາ​ລັບ​ເລຂາ​ພັກ​ບ້ານ​-​ນາຍບ້ານ ຂອງ​ເມືອງ​ແກ່ນ​ທ້າວ ຊຶ່ງ​ຊຸດ​ຝຶກ​ອົບຮົມ​ຄັ້ງ​ນີ້ ມີ​ເລຂາ​ໜ່ວຍ​ພັກ​-​ນາຍບ້ານ​ເຂົ້າ​ຮຽນ​ທັງ​ໝົດ 45 ສະຫາຍ ຍິງ 3 ສະຫາຍ ໃຊ້​ເວລາ 10 ວັນ, ມີ​ພາກ​ວິຊາ​ຮຽນ​ທັງ​ໝົດ 3 ກຸ່ມ ຄື: ກຸມ​ທີ 1 ທິດ​ທາງ​ລວມ ປະກອບ​ມີ 4 ບົດ  ໃຊ້​ເວລາ 2 ວັນ, ກຸ່ມ​ທີ 2 ວຽກ​ພັກ ມີ 6 ບົດ  ໃຊ້​ເວລາ 4 ວັນ ແລະ ກຸ່ມ​ທີ 3 ວຽກ​ງານ​ການ​ບໍລິຫານ ແລະ ປົກຄອງ ມີ 9 ບົດ ໃຊ້​ເວລາ 4 ວັນ. ຈາກ​ນັ້ນ, ສະຫາຍ  ສີ​ສອນ​ພັນ ບຸນ​ສີ  ໄດ້​ກ່າວ​ວ່າ: ໃນ​ເງື່ອນໄຂ​ປັດຈຸ​ບັນ ເມືອງ​ແກ່ນ​ທ້າວ ມີ​ຄວາມ​ຮຽກຮ້ອງ​ຕ້ອງການ​ໃນ​ການ​ກໍ່ສ້າງ​ພະນັກ​ງານ​-​ສະມາຊິກ​ພັກ ທີ່​ເປັນ​ຫຼັກ​ແຫຼ່ງ​ຂອງ​ເມືອງ ແລະ ບ້ານ ໃຫ້​ມີ​ຄຸນ​ທາດ​ການເມືອງ​ໜັກ​ແໜ້ນ, ມີ​ສະຕິ​ຕໍ່​ການຈັດຕັ້ງ ແລະ ມີ​ລະບຽບ​ວິໄນ​ເຂັ້ມ​ງວດ, ເຄົາລົບ​ລະບຽບ​ກົດໝາຍ, ມີ​ຄວາມ​ກ້າຫານ​ໃນ​ການ​ຕີ​ຖອຍ​ປະກົດ​ການ​ຫຍໍ້ທໍ້​ຕ່າງໆ ອົດທົນ​ຜ່ານ​ຜ່າ​ອຸປະສັກ ແລະ ຂໍ້​ຫຍຸ້ງຍາກ​ນາໆ​ປະການ, ຕັ້ງໜ້າ​ຝຶກ​ຝົນ​ຫຼໍ່​ຫຼອມ​ຕົນ​ເອງ ແລະ ເປັນ​ແບບຢ່າງ​ທີ່​ດີ, ຮູ້ຈັກ​ເລືອກເຟັ້ນ​ເອົາ​ບັນດາ​ຫຼັກ​ມູນ​ທິດ​ສະ​ດີ​ທີ່​ກ້າວໜ້າ ແລະ ບົດຮຽນ​ທີ່​ດີເດັ່ນ ເພື່ອ​ໝູນ​ໃຊ້​ເຂົ້າ​ໃນ​ການ​ວາງ​ແຜນການ​ປະຕິບັດ​ຍຸກ​ພັດທະນາ​ຢ່າງ​ຖືກຕ້ອງ, ສອດຄ່ອງ​ກັບ​ທ່າແຮງ ແລະ ຈຸດ​ພິເສດ ຂອງ​ແຕ່​ລະ​ບ້ານ. ໂດຍ​ບັນດາ​ສະຫາຍ​ຈະ​ໄດ້​ປັບປຸງ​ຍົກ​ລະດັບ​ຄວາມ​ຮູ້ ຂອງ​ຕົນ​ໃນ​ຫຼາຍ​ດ້ານ ເປັນຕົ້ນ​ແມ່ນ​ໄດ້​ຍົກ​ລະດັບ​ຄວາມ​ຮູ້​ທາງ​ດ້ານ​ຫຼັກ​ມູນ​ພື້ນຖານຂອງ​ທິດ​ສະ​ດີ​ມາກ​-​ເລ​ນິນ, ຄວາມ​ຮູ້​ກ່ຽວ​ກັບ​ການ​ປົກຄອງ ແລະ ຄຸ້ມ​ຄອງ, ຍົກ​ລະດັບ​ຄວາມ​ຮູ້​ທາງ​ດ້ານ​ແນວທາງ​ນະໂຍບາຍ ຂອງ​ພັກ, ລະບຽບ​ກົດໝາຍ​ຂອງ​ລັດ ແລະ ຍັງ​ຈະ​ໄດ້​ເອົາໃຈໃສ່​ຝຶກ​ຝົນ​ຫຼໍ່​ຫຼອມ​ຕົນ​ເອງ ໃນ​ດ້ານ​ແນວ​ຄິດ, ທັດສະນະ, ການ​ກະທຳ, ກໍ​ຄື​ປະສົບ​ການ​ວຽກ​ງານ​ຊີ້​ນຳ​-​ນຳພາ​ຕົວ​ຈິງ ຢູ່​ພາຍ​ໃນ​ບ້ານ​ຂອງ​ຕົນ ແລະ ຮຽກຮ້ອງ​ໃຫ້​ບັນດາ​ສະຫາຍ ທີ່​ເຂົ້າ​ຝຶກ​ອົບຮົມ​ໃນ​ຊຸດ​ນີ້ ຈົ່ງ​ພ້ອມ​ກັນ​ເອົາໃຈໃສ່ຍາດ​ແຍ່ງເອົາບັນ ດາ​ບົດຮຽນຄວາມ​ຮູ້​ຈາກ​ຄູ​-​ອາຈານກໍ​ຄື​ບົດຮຽນ​ພຶດຕິ​ກຳ​ຕົວ​ຈິງ​ນຳ​ເພື່ອນ​ສະຫາຍ​ດ້ວຍ​ກັນ  ເພື່ອ​ເຮັດ​ໃຫ້​ບັນລຸ​ຜົນສຳເລັດ​ຕາມ​ຈຸດປະສົງ ຄາດໝາຍທີ່​ກຳນົດ​ໄວ້​ໃນ​ໂຄງການ​ຫຼັກສູດ​ນັ້ນ  ແລະ ກ່າວ​ເປີດ​ຊຸດ​ຝຶກ​ອົບຮົມ​ທິດ​ສະ​ດີ​ການ​ເມືອງ​-​ການ​ປົກຄອງ ໄລຍະ​ສັ້ນ 10 ວັນ ສໍາ​ລັບ​ເລຂາ​ໜ່ວຍ​ພັກ​ບ້ານ​-​ນາຍບ້ານ ຊຸດ​ທີ I ຂອງ​ເມືອງ​ແກ່ນ​ທ້າວ ຢ່າງ​ເປັນ​ທາງ​ການ.
 (ຂ່າວ: ຖວທ ແກ່ນ​ທ້າວ)