ໜັງສືພິມ ປະຊາຊົນ

ກະກຽມຈັດງານບຸນມະໂຫລານຊາວໜຸ່ມ-ເຍົາວະຊົນ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 25/11/2020 10:37:33 ຈຳນວນຢ້ຽມຊົມ 1635 ຄັ້ງ

ສູນກາງຊາວໜຸ່ມປະຊາ ຊົນປະຕິວັດລາວ ໄດ້ຈັດກອງປະຊຸມກະກຽມບຸນມະໂຫລານຊາວໜຸ່ມ-ເຍົາວະຊົນ ປະຈຳປີ 2020 ຂຶ້ນເມື່ອບໍ່ດົນມານີ້ ທີ່ສູນກາງດັ່ງກ່າວ ໂດຍການເປັນປະທານ ຂອງທ່ານ ອາລຸນໄຊ ສູນນະລາດ ເລຂາຄະ ນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ມີພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມບັນດາຜູ້ເຂົ້າຮ່ວມໄດ້ຮັບຟັງການສະເໜີການກະກຽມງານດັ່ງກ່າວ ແລະ ໄດ້ພ້ອມກັນປະກອບຄຳຄິດຄຳເຫັນໃສ່ບົດລາຍງານແນໃສ່ເພື່ອກ້າວໄປໃນການຈັດຕັ້ງປະຕິບັດໃຫ້ບັນລຸຜົນສຳເລັດ, ງານບຸນມະໂຫລານ ຊາວໜຸ່ມ-ເຍົາວະຊົນ ປະຈໍາປີ 2020 ພາຍໃຕ້ຫົວຂໍ້ “ລະ ນຶກເຖິງມູນເຊື້ອຊາວໜຸ່ມຄົນຮຸ່ນກ່ອນ ແລະ ເສີມຂະຫຍາຍບົດບາດຂອງຊາວໜຸ່ມຍຸກໃໝ່ງານດັ່ງ ກ່າວຈະເລີ່ມແຕ່ວັນທີ 5 ເຖິງ 13 ທັນວາ 2020 ທີ່ຕຶກວາງ ສະແດງສິນຄ້າ ລາວ-ໄອເຕັກ, ຈຸດປະສົງຂອງການຈັດງານເພື່ອເປັນການເຕົ້າໂຮມກໍາລັງແຮງ, ຄວາມສາມັກຄີ, ສຶກສາອົບຮົມ, ປູກຈິດສໍານຶກມູນເຊື້ອອັນດີງາມຂອງຊາດ ກໍ່ຄືຂອງຊາວໜຸ່ມຮຸ່ນກ່ອນດ້ວຍຫຼາຍຮູບການຫຼາຍສີໃຫ້ແກ່ຊາວໜຸ່ມຮຸ່ນປັດຈຸບັນທີ່ຈະເປັນຮຸ່ນສືບທອດອະນາຄົດຂອງຊາດ, ເປັນການທ້ອນໂຮມ ແລະ ວາງ ສະແດງຜົນງານຂອງການ ເຄື່ອນໄຫວຂອງຊາວໜຸ່ມໃນຕະຫຼອດໄລຍະ 65 ປີ ທີ່ຜ່ານມາ, ເປັນການສ້າງໂອກາດ, ເວທີໃຫ້ແກ່ຄົນຮຸ່ນໜຸ່ມໄດ້ສະແດງອອກ ພົບປະແລກປ່ຽນ ແລະ ວາງແຜນໃນອະນາຄົດ ເພື່ອສ້າງ ສາ ແລະ ພັດທະນາປະເທດຊາດ, ເປັນການຫັນແບບແຜນ ແລະ ຮູບແບບເຄື່ອນໄຫວໄປສູ່ທັນສະໄໝທີ່ມີວິທະຍາສາດ ສົ່ງເສີມຄວາມຮູ້, ຄວາມສາ ມາດ, ທັກສະ, ຫົວຄິດປະດິດສ້າງ ຊອກໃຫ້ໄດ້ບຸກຄົນດີເດັ່ນ ວຽກຈິງຄົນແທ້ ເພື່ອກາຍເປັນຕົວແບບຂອງຊາວໜຸ່ມໃນທຸກຂົງເຂດ; ກິດຈະກໍາພາຍໃນງານປະກອບມີການວາງສະ ແດງມູນເຊື້ອຂອງຊາດ, ຂອງພັກ ແລະ ຂອງຊາວໜຸ່ມລາວບັນດາກະຊວງອົງການແຂວງ ແລະ ນະຄອນຫຼວງວຽງຈັນ ຊຶ່ງແບ່ງເປັນ 3 ໄລຍະ ອະດີດ, ປັດຈຸບັນ ແລະ ອະນາຄົດ, ເວທີສົນທະນາໃຫ້ຄວາມຮູ້ດ້ານຕ່າງໆ ການສະແດງໂຊ ແລະ ການປະກວດຕ່າງໆ ຕະຫຼອດ 9 ວັນໃນການຈັດງານ, ການວາງຈໍາໜ່າຍສິນຄ້າຈາກຊາວໜຸ່ມລາວທົ່ວປະເທດ ແລະຫົວໜ່ວຍທຸລະກິດຈາກພາກຕ່າງໆ.
(ຂ່າວ: ສຳນານ)