ໜັງສືພິມ ປະຊາຊົນ

ທ່ານ ສີຈິ້ນຜິງ ກ່າວວ່າການຮ່ວມມືຈີນ-ອາຊຽນ ເປັນແບບຢ່າງທີ່ປະສົບຜົນສໍາເລັດກວ່າໝູ່

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 28/11/2020 15:27:41 ຈຳນວນຢ້ຽມຊົມ 2567 ຄັ້ງ

ຂ່າວສານຊີອາໄອລາຍງານວ່າ: ວັນທີ 27 ພະຈິກນີ້, ທ່ານ ສີຈິ້ນຜິງ ປະທານປະເທດຈີນ ໄດ້ກ່າວຄຳປາໄສໃນພິທີເປີດງານວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າ ແລະ ການລົງທຶນຈີນ-ອາຊຽນຄັ້ງທີ 27.
ທ່ານ ສີຈິ້ນຜິງ ກ່າວວ່າ: ປີ2013, ຂ້າພະເຈົ້າໄດ້ສະເໜີວ່າ ຈີນ ຍິນດີຮ່ວມກັບບັນດາປະເທດອາຊຽນ ສ້າງເສັ້ນທາງສາຍໄໝທາງທະເລໃນສະຕະວັດທີ 21 ແລະ ຮ່ວມກັນສ້າງປະຊາຄົມຮ່ວມຊາຕາກຳ ຈີນ-ອາຊຽນ ທີ່ແໜ້ນແຟ້ນກວ່າເກົ່າ. ພວກເຮົາມີຄວາມປິຕິຊົມຊື່ນທີ່ເຫັນວ່າ: ໃນໄລຍະ 7 ປີຜ່ານມາ, ການເຊື່ອໂຍງ, ເຊື່ອມຈອດກັນ ລະຫວ່າງ ສອງຝ່າຍ ໄດ້ເລັ່ງລັດໃຫ້ໄວຂຶ້ນຢ່າງບໍ່ຢຸດຢັ້ງ, ການເຊື່ອໂຍງດ້ານເສດຖະກິດ ໄດ້ກ້າວສູ່ລວງເຊິກຢ່າງຕໍ່ເນື່ອງ, ການຮ່ວມມືດ້ານເສດຖະກິດ-ການຄ້າ ກໍນັບມື້ນັບພັດທະນໄວຂຶ້ນ, ການແລກປ່ຽນດ້ານວັດທະນະທຳ ກໍນັບມື້ນັບແໜ້ນແຟ້ນຍິ່ງຂຶ້ນ, ການພົວພັນ ຈີນ-ອາຊຽນ ໄດ້ກາຍເປັນແບບຢ່າງທີ່ປະສົບຜົນສຳເລັດຫຼາຍກວ່າໝູ່ ແລະ ມີຊີວິດຊີວາຫຼາຍກວ່າໝູ່ ໃນດ້ານເສດຖະກິດຂອງພາກພື້ນອາຊີ-ປາຊີຟິກ ແລະ ກາຍເປັນແບບຢ່າງທີ່ມີຊີວີດຊີວາໃນການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ຢ່າງໃດກໍຕາມ, ເມື່ອປະເຊີນໜ້າກັບການແຜ່ລະບາດຂອງພະຍາດໂຄວິດ-19, ສອງຝ່າຍໄດ້ຊ່ວຍເຫຼືອຊຶ່ງກັນ ແລະ ກັນ, ຮ່ວມກັນຜ່ານຜ່າຄວາມຫຍຸ້ງຍາກ. ປັດຈຸບັນ, ໂລກພວມປະສົບກັບການປ່ຽນແປງອັນໃຫຍ່ຫຼວງແບບບໍ່ເຄີຍມີມາກ່ອນ ໃນຮອບຮ້ອຍປີຜ່ານມາ, ຊາຕາກຳຂອງປະຊາຊົນບັນດາປະເທດ ບໍ່ເຄີຍພົວພັນກັນຢ່າງໃກ້ຊິດຄືດັ່ງທຸກມື້ນີ້. ຈີນ ຖືເອົາ ອາຊຽນ ເປັນທິດທາງບຸລິມະສິດ ໃນວຽກງານການຕ່າງປະເທດກັບປະເທດໃກ້ຄຽງ ແລະ ເປັນພາກພື້ນສຳຄັນໃນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ, ຈີນ ຍິນດີຮ່ວມກັບ ອາຊຽນ ຊຸກຍູ້ການຮ່ວມມືໃນຂົງເຂດຕ່າງໆ, ຮັກສາທ່ວງທ່າທີ່ດີໃນການພັດທະນາພາກພື້ນນີ້, ສ້າງປະຊາຄົມຮ່ວມຊາຕາກຳ ຈີນ-ອາຊຽນ ທີ່ແໜ້ນແຟ້ນກວ່າເກົ່າ.
ພ້ອມກັນນັ້ນ, ທ່ານ ສີຈິ້ນຜິງ ໄດ້ສະເໜີຂໍ້ລິເລີ່ມ 4 ຂໍ້ຄື: ໜຶ່ງ, ຍົກສູງຄວາມໄວ້ເນື້ອເຊື່ອໃຈກັນດ້ານຍຸດທະສາດ, ລົງເລິກການເຊື່ອມຈອດແຜນແມ່ບົດການພັດທະນາ ໂດຍອີງໃສ່ການສ້າງຊ່ອງທາງໃໝ່ທາງບົກ ແລະ ທາງທະເລ, ເພີ່ມທະວີການຮ່ວມມືໃນການເຊື່ອມຈອດພື້ນຖານໂຄງລ່າງ, ເລັ່ງລັດການຊຸກຍູ້ ການສ້າງແລວເສດຖະກິດ ແລະ ໂຄງການສຳຄັນທີ່ມີຢູ່ໃນປັດຈຸບັນ, ຕັ້ງໜ້າສ້າງສະຫະພັນຂົນສົ່ງດ້ວຍຫຼາຍຮູບແບບ ລະຫວ່າງ ຈີນ-ອາຊຽນ. ປີ 2021 ແມ່ນປີທີ່ ຈີນ ແລະ ອາຊຽນ ສ້າງຕັ້ງສາຍພົວພັນຄູ່ເຈລະຈາຄົບຮອບ 30 ປີ, ຈີນ ຍິນດີຮ່ວມກັບ ອາຊຽນ, ສ້າງການພົວພັນຄູ່ຮ່ວມມືຍຸດທະສາດທີ່ມີລະດັບສູງກວ່າເກົ່າ.
ສອງ, ຍົກສູງລະດັບການຮ່ວມມືເສດຖະກິດ-ການຄ້າ, ເລັ່ງລັດການຟື້ນຟູເສດຖະກິດຂອງພາກພື້ນຢ່າງຮອບດ້ານ. ປະຕິບັດສັນຍາການຄ້າເສລີ ຈີນ-ອາຊຽນ ໃຫ້ດີກວ່າເກົ່າ. ຈີນຫວັງວ່າ: “ສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ” ຈະບັງເກີດຜົນໂດຍໄວ. ເພີ່ມທະວີຄວາມສະດວກດ້ານການຄ້າ ແລະ ສົ່ງເສີມການລົງທຶນ, ເປີດກວ້າງຕະຫຼາດໃຫ້ກັນ ແລະ ກັນ, ຊຸກຍູ້ການເຊື່ອມໂຍງຕ່ອງໂສ້ອຸດສາຫະກຳ, ຕ່ອງໂສ້ການສະໜອງ ແລະ ຕ່ອງໂສ້ມູນຄ່າຢ່າງເລິກເຊິ່ງ. ພາຍໃຕ້ປະຖົມປັດໄຈທີ່ຮັບປະກັນການປ້ອງກັນ ແລະ ຄວບຄຸມພະຍາດ, ໃຊ້ມາດຕະການເພື່ອອຳນວຍຄວາມສະດວກໃຫ້ແກ່ການໄປມາຫາສູ່ກັນດ້ານບຸກຄະລາກອນ ແລະ ການຈໍລະຈອນສິນຄ້າ. ຊຸກຍູ້ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແລະການຮ່ວມມື ລະຫວ່າງ ຈີນ-ເຂດເຕີບໂຕພາກຕາເວັນອອກຂອງອາຊຽນ.
ສາມ, ຍົກລະດັບການປະດິດສ້າງໃໝ່ດ້ານວິທະຍາສາດເຕັກນິກ, ລົງເລິກການຮ່ວມມືເສດຖະກິດດິີຈີຕອນ. ສ້າງຈຸດພົ້ນເດັ່ນໃໝ່ດ້ານການຮ່ວມມືໃຫ້ຫຼາຍກວ່າເກົ່າໃນຂົງເຂດຕ່າງໆ ເຊັ່ນ: ຕົວເມືອງອັດສະລິຍະ, 5G, ປັນຍາປະດິດ, ການຄ້າເອເລັກໂຕຣນິກ, ຂໍ້ມູນໃຫຍ່, ບຼອກເຊນ (Blockchain), ການປິ່ນປົວທາງໄກ ແລະ ອື່ນໆ. ເພີ່ມທະວີການປ້ອງກັນຄວາມປອດໄພດ້ານຂໍ້ມູນຂ່າວສານ ແລະ ການປະສານສົມທົບກັນດ້ານນະໂຍບາຍ. ສ້າງສູນຂໍ້ມູນຂ່າວສານ ຈີນ-ອາຊຽນ, ສ້າງ “ເສັ້ນທາງສາຍໄໝດີຈີຕອນ”.
ສີ່, ຍົກລະດັບການຮ່ວມມືໃນການຕ້ານກັບພະຍາດ, ເສີມສ້າງຄວາມສາມາດດ້ານສາທາລະນະສຸກ. ເພີ່ມທະວີການສົນທະນາກັນດ້ານນະໂຍບາຍ, ແບ່ງປັນຂໍ້ມູນຂ່າວສານ ແລະ ການຮ່ວມມືດ້ານຢາວັກຊິນ. ຈີນ ຈະພິຈາລະນາເຖິງຄວາມຕ້ອງການຂອງປະເທດອາຊຽນ ຢ່າງຕັ້ງໜ້າ ຫຼັງຈາກນຳໃຊ້ຢາວັກຊິນຕ້ານເຊື້ອພະຍາດໂຄວິດ-19 ຢ່າງເປັນທາງການ, ໃຫ້ການສະໜັບສະໜູນດ້ານເງິນທຶນ ໃຫ້ແກ່ກອງທຶນຕ້ານພະຍາດອາຊຽນ, ອົບຮົມຜູ້ບໍລິຫານ ແລະ ວິຊາການດ້ານສາທາລະນະສຸກ 1.000 ຄົນ ໃຫ້ແກ່ອາຊຽນ, ຮ່ວມກັນສ້າງສາງສະສົມອຸປະກອນການແພດ ເພື່ອຮັບມືສຸກເສີນ ແລະ ກົນໄກພົວພັນສຸກເສີນດ້ານສາທາລະນະສຸກ.
ທ່ານ ສີຈິ້ນຜິງ ກ່າວເນັ້ນວ່າ: ປີ 2021, ຈີນ ຈະເປີດຂະບວນການໃໝ່ຄື: ບັ້ນສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ. ຈີນ ຈະເດັດດ່ຽວເປີດກວ້າງການເປີດປະຕູສູ່ພາຍນອກ, ການຮ່ວມມື ລະຫວ່າງ ຈີນ ແລະ ອາຊຽນ ຈະມີໂອກາດທີ່ກວ້າງຂວາງກວ່າເກົ່າ.