ມອບເງິນ ຊົດເຊີຍ ຄ່າຊັບສິນຂອງປະຊາຊົນ ບ້ານປາງບົງ ທີ່ເຂດຈັດສັນໃໝ່ບ້ານກິ່ວງິ້ວ

   ບ້ານປາງບົງ ເມືອງເງິນ ແຂວງໄຊຍະບູລີ ໄດ້ຈັດພິທີ ມອບ-ຮັບເງິນຊົດເຊີຍ ຄ່າຊັບສິນໃຫ້ ປະຊາຊົນ ບ້ານປາງບົງ. ເມື່ອບໍ່ດົນຜ່ານມານີໂດຍ ເຂົ້າຮ່ວມເປັນກຽດ ມີທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ, ມີຄະນະບໍລິຫານ ບໍລິສັດ ໄຟຟ້າຫົງສາ, ເຈົ້າເມືອງ-ເມືອງເງິນ, ຄະນະກຳມະການ ຍົກຍ້າຍບ້ານຈັດສັນ, ໜ່ວຍງານ RLMU ປະຈໍາໂຄງການ, ນາຍບ້ານ ພ້ອມດ້ວຍການຈັດຕັ້ງ ແລະ ຄອບຄົວ ປະຊາຊົນ ຜູ້ຖືກຜົນກະທົບເຂົ້າຮ່ວມ.
ການມອບ-ຮັບເງິນ ຄ່າຊົດເຊີຍ ໃນຄັ້ງນີ້ ແມ່ນເພື່ອຊົດເຊີຍຄ່າຊັບສິນ ຂອງປະຊາຊົນ ບ້ານປາງບົງ ທີ່ຢູ່ໃນເຂດຈັດສັນໃໝ່ ບ້ານກິ່ວງິ້ວ ເປັນຕົ້ນແມ່ນເນື້ອທີ່ດິນທຳການຜະລິດ,ໄມ້ໃຫ້ໝາກ ແລະ ອື່ນໆ ຈຳນວນ 18 ຄອບຄົວ ເປັນເງິນທັງໝົດ 1.112.774.000 ກີບ ໂດຍແມ່ນມອບຮັບເປັນບັນຊີເງິນຝາກທະນາຄານ, ໃຫ້ກຽດມອບ ໂດຍແມ່ນ ທ່ານ ສົມຈິດ ຈັນທະວົງ ຮອງເຈົ້າແຂວງ ແລະ ທ່ານ ຄະທາຢຸດ ຊຸພູນ ຜູ້ອຳນວຍການໃຫຍ່ ບໍລິສັດ ໄຟຟ້າຫົງສາຈຳກັດ ໂດຍຊ້ອງໜ້າຄະນະກຳມະການ ຍົກຍ້າຍຈັດສັນ ຂັ້ນແຂວງ- ຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
   ຂ່າວຍັງໃຫ້ຮູ້ຕື່ມວ່າ ໃນວັນດຽວກັນນີ້ ທ່ານ ຮອງເຈົ້າແຂວງ ພ້ອມດ້ວຍຄະນະບໍລິຫານ ບໍລິສັດ ໄຟຟ້າຫົງສາ ແລະ ຄະນະກຳມະການ ຍົກຍ້າຍບ້ານຈັດສັນ ຂັ້ນແຂວງ-ເມືອງ ຍັງໄດ້ເດີນທາງໄປບ້ານກິ່ວງິ້ວ ເພື່ອກະກຽມຄວາມພ້ອມໃນການຍົກຍ້າຍບ້ານດັ່ງກ່າວ ໃຫ້ມາຢູ່ເຂດຈັດສັນໃໝ່ ໃນໄລຍະໃກ້ໆນີ້.(ຂ່າວ: ອິນແປງ ແຫວນຄໍາ) ໂທ: 02055567815