ໜັງສືພິມ ປະຊາຊົນ

45 ປີ ວຽກງານຕ່າງປະເທດ ໄດ້ມີຜົນສຳເລັດປະກອບສ່ວນ ໃນສອງໜ້າທີ່ຍຸດທະສາດ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 03/12/2020 09:40:06 ຈຳນວນຢ້ຽມຊົມ 3548 ຄັ້ງ

ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດໄດ້ໃຫ້ສໍາພາດຕໍ່ສື່ມວນຊົນ ໃນວັນທີ 27 ພະຈິກ 2020 ທີ່ກະຊວງການຕ່າງປະເທດວ່າ: ຕະຫຼອດ 45 ປີຜ່ານມາ ສະພາບພາກພື້ນ ແລະ ສາກົນມີຄວາມຜັນແປໄປຢ່າງສັບສົນ ສປປ ລາວ ກໍໄດ້ປະຕິບັດນະໂຍບາຍໂດຍອີງໃສ່ສະພາບການປ່ຽນແປງທີ່ເກີດຂຶ້ນຢູ່ໃນພາກພື້ນ ແລະ ສາກົນແຕ່ລະໄລຍະ ພາຍຫຼັງສະຖາປະນາ ສປປ ລາວ ໃນວັນທີ 2 ທັນວາ 1975 ພັກ-ລັດ ໄດ້ວາງນະໂຍບາຍການຕ່າງປະເທດ ເພື່ອຮັບປະກັນການຮໍາບາດແຜສົງຄາມ ຟື້ນຟູເສດຖະກິດ ຫຼຸດຜ່ອນຄວາມທຸກຍາກຂອງປະຊາຊົນເປັນຕົ້ນ ໄລຍະ 1975-1982 ພັກ-ລັດເຮົາໄດ້ວາງນະໂຍບາຍຖືກຕ້ອງສອດຄ່ອງກັບສະພາບຄວາມເປັນຈິງ ເພື່ອນໍາເອົາປະເທດຊາດຫຼຸດພົ້ນອອກຈາກຄວາມທຸກຍາກ ໂດຍຢຶດໝັ້ນໃນລັດທິສັງຄົມນິຍົມ ໃນໄລຍະນີ້ໄດ້ປະຕິບັດນະໂຍບາຍການຕ່າງປະເທດ “ສັນຕິພາບ ເອກະລາດ ມິດຕະພາບ ແລະ ສັງຄົມນິຍົມ”
ໂດຍຮ່ວມມືກັບບັນດາປະເທດສັງຄົມນິຍົມ ແລະ ຄ້າຍສັງຄົມນິຍົມ ເຮັດໃຫ້ພວກເຮົາສາມາດພັດທະນາປະເທດຊາດຕາມສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາປະເທດຊາດໃນລະດັບໃດໜຶ່ງ.
ໃນຊຸມປີ 90 ເປັນຕົ້ນມາຈົນຮອດປັດຈຸບັນ ສະພາບແວດລ້ອມໄດ້ສ້າງເງື່ອນໄຂອັນດີທາງລະດັບພາກພື້ນ ແລະ ສາກົນ ເອື້ອອໍານວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ ຂອງພວກເຮົາ ພັກ-ລັດຖະບານ ຈຶ່ງໄດ້ປະຕິບັດນະໂຍບາຍການຕ່າງປະເທດທີ່ສະເໝີຕົ້ນສະເໝີປາຍ ເປີດກວ້າງການຮ່ວມມືເພີ່ມມິດ ຜ່ອນສັດຕູ ເພີ່ມທະວີການຮ່ວມມືກັບຕ່າງປະເທດດ້ວຍຫຼາຍຮູບ ຫຼາຍສີ ທັງສອງຝ່າຍ ແລະ ຫຼາຍຝ່າຍດ້ວຍຫຼາຍລະດັບ ການນໍາແຕ່ສູນກາງຮອດທ້ອງຖິ່ນໄດ້ສຸມໃສ່ບຸກທະລຸໃນການປະຕິບັດນະໂຍບາຍການຕ່າງປະເທດ ຈຶ່ງເຮັດໃຫ້ພວກເຮົາສາມາດສ້າງມິດ ເຮັດໃຫ້ສາກົນມີຄວາມເຂົ້າອົກເຂົ້າໃຈຕໍ່ພັກຕໍ່ລັດ ຕໍ່ນະໂຍບາຍການພັດທະນາເສດຖະກິດ-ສັງຄົມຂອງ ສປປ ລາວ ສະແດງອອກໃຫ້ເຫັນຢ່າງຈະແຈ້ງ ປັດຈຸບັນການລົງທຶນ ການໃຫ້ການຮ່ວມມື ການຊ່ວຍເຫຼືອ ສປປ ລາວ ຈາກພາກພື້ນ ແລະ ສາກົນມີທ່ວງທ່າເພີ່ມຂຶ້ນໃນແຕ່ລະປີ ພ້ອມນັ້ນການຮັດແໜ້ນຄວາມສາມັກຄີ ແລະ ສ້າງສາຍພົວພັນເຫັນວ່າປະເທດລາວມີເພື່ອນມິດຫຼາຍປະເທດໃນໂລກ ຊຶ່ງສາມາດສ້າງຕັ້ງສາຍພົວພັນການທູດກັບ 143 ປະເທດ ແລະ ມີສໍານັກງານຕາງໜ້າການທູດລາວປະຈໍາຢູ່ຕ່າງປະເທດທັງໝົດ 40 ແຫ່ງ ນອກນັ້ນຍັງປະກອບສ່ວນເຂົ້າເປັນສະມາຊິກຂອງອົງການຈັດຕັ້ງສາກົນຕ່າງໆ ສະເພາະໃນລະດັບພາກພື້ນ ແລະ ສາກົນ ພົ້ນເດັ່ນ ພາຍຫຼັງທີ່ ສປປ ລາວ ໄດ້ເຂົ້າເປັນສະມາຊິກອາຊຽນ 1997 ເປັນຕົ້ນມາ ຊຶ່ງການເປັນສະມາຊິກນີ້ບໍ່ພຽງແຕ່ເປັນສະມາຊິກໃນຮູບການເທົ່ານັ້ນ ແຕ່ໄດ້ສະແດງໃຫ້ເຫັນບົດບາດການເຂົ້າຮ່ວມຢ່າງຕັ້ງໜ້າ ປະກອບສ່ວນຢ່າງຫ້າວຫັນໃນກິດຈະກໍາ ແລະ ວຽກງານຕ່າງໆໃນຂອບອາຊຽນ.
ທ່ານ ສະເຫຼີມໄຊ ກົມມະສິດກ່າວຕື່ມວ່າ: ຕະຫຼອດໄລຍະ 45 ປີຜ່ານມາ, ການຈັດຕັ້ງປະຕິບັດຂົງເຂດວຽກງານການຕ່າງປະເທດມີຜົນສໍາເລັດຫຼາຍດ້ານ ອັນໄດ້ປະກອບສ່ວນສໍາຄັນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ສະແດງອອກການຈັດຕັ້ງປະຕິບັດແນວທາງການຕ່າງປະເທດຂອງພັກຂອງລັດໃນແຕ່ລະໄລຍະ ພົ້ນເດັ່ນແມ່ນປະກອບສ່ວນສໍາຄັນໃນການປົກປັກຮັກສາ ຮັບປະກັນອະທິປະໄຕ ຄວາມເປັນເອກະລາດແຫ່ງຊາດ ໂດຍການປະຕິບັດນະໂຍບາຍການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມມື ຄຽງຄູ່ກັນນັ້ນກໍຍັງມີສິ່ງທ້າທາຍທີ່ພວກເຮົາກໍາລັງປະເຊິີນຢູ່ ເປັນຕົ້ນ ພາຍຫຼັງທີ່ສະຖາປະນາເປັນປະເທດສາທາລະນະລັດ ປະຊາທິປະໄຕ ປະຊາຊົນລາວແລ້ວ ປະເທດລາວຍັງເປັນປະເທດດ້ອຍພັດທະນາ ຍັງມີຄວາມຈໍາເປັນຕ້ອງໄດ້ອາໄສການສະໜັບສະໜູນ ການຊ່ວຍເຫຼືອການຮ່ວມມືຈາກວົງສາຄະນາຍາດສາກົນ ເພື່ອມາພັດທະນາ ແລະ ສ້າງສາພັດທະນາປະເທດຊາດ ຕ້ອງໄດ້ເອົາໃຈໃສ່ໂຄສະນາໃຫ້ສາກົນມີຄວາມເຂົ້າໃຈຕື່ມກ່ຽວກັບການຈັດຕັ້ງປະຕິບັດເປົ້າໝາຍການພັດທະນາ ໂດຍສະເພາະການປະຕິບັດນະໂຍບາຍການຕ່າງປະເທດທີ່ເປັນເຈົ້າຕົນເອງ ເພື່ອຮັບປະກັນຄວາມເປັນເອກະລາດແຫ່ງຊາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ ສປປ ລາວ ຊຶ່ງການວາງນະໂຍບາຍຕ້ອງອີງໃສ່ຜົນປະໂຫຍດແຫ່ງຊາດຂອງ ສປປ ລາວ ແລະ ການພັດທະນາຊັບພະຍາກອນມະນຸດຍັງບໍ່ທັນໄດ້ຮັບການພັດທະນາເທົ່າທີ່ຄວນ ຊຶ່ງເປັນບັນຫາສໍາຄັນທີ່ຈະຕ້ອງໄດ້ເອົາໃຈໃສ່ ເພື່ອໃຫ້ພະນັກງານ ວິຊາການ ການທູດ ເປັນຜູ້ມີຄວາມຮູ້ຄວາມສາມາດ ມີໄຫວພິບ ແລະ ທັນກັບສະ ພາບການປ່ຽນແປງຕ່າງໆ.
(ໂດຍ: ບຸນຕອມ)

ຂ່າວທີ່ໄດ້ຮັບຄວາມນິຍົມ