ໜັງສືພິມ ປະຊາຊົນ

ເຂື່ອນໄຟຟ້າຫ້ວຍລຳພັນຕອນລຸ່ມ ຈະຜະລິດໄຟຟ້າໃນກາງເດືອນທັນວານີ້

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 03/12/2020 09:49:30 ຈຳນວນຢ້ຽມຊົມ 3481 ຄັ້ງ

ເຂື່ອນໄຟຟ້າຫ້ວຍລຳພັນຕອນລຸ່ມ ນອກຈາກຈະຜະລິດກະແສໄຟຟ້າແລ້ວ ຍັງເປັນບ່ອນຫາປາຂອງປະຊາຊົນ ແລະ ຈະສ້າງເປັນແຫຼ່ງທ່ອງທ່ຽວ, ນອກຈາກນີ້ ນ້ຳໃນອ່າງສາມາດນຳໄປຜະລິດນ້ຳປະປາຮັບໃຊ້ເທດສະບານແຂວງເຊກອງໃນອະນາຄົດ, ເຂື່ອນດັ່ງ ກ່າວຄາດວ່າ ຈະຜະລິດ ແລະ ຈຳໜ່າຍໄຟຟ້າໃນກາງເດືອນທັນວານີ້ ໂດຍກະແສໄຟຟ້າທັງໝົດຈະຂາຍໃຫ້ລັດວິສາຫະກິດໄຟຟ້າລາວ.

ໃນອາທິດຜ່ານມານີ້ທ່ານ ສີນາວາ ສຸພານຸວົງ ຮອງລັດ ຖະມົນຕີກະຊວງພະລັງງານ ແລະ ບໍ່ແຮ່, ພ້ອມດ້ວຍຄະນະ ໄດ້ລົງໄປເຄື່ອນໄຫວຕິດຕາມກວດກາດ້ານເຕັກນິກໂຄງການກໍ່ສ້າງເຂື່ອນດັ່ງກ່າວ, ທ່ານ ບຸນໂຮມ ຜິວລາລິນ ຫົວໜ້າໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມລາຍງານວ່າ: ໂຄງການກໍ່ສ້າງເຂື່ອນໄຟ ຟ້າຫ້ວຍລໍາພັນຕອນລຸ່ມເລີ່ມລົງມືກໍ່ສ້າງມາແຕ່ວັນທີ 18 ຕຸລາ ປີ 2017 ເປັນຕົ້ນມາ, ຜ່ານການກໍ່ສ້າງທຸກໜ້າວຽກແມ່ນເກືອບສໍາເລັດແລ້ວ ເປັນຕົ້ນ ການກໍ່ສ້າງຕົວເຂື່ອນ, ປະຕູສົ່ງຂອງທໍ່ນໍ້າ, ປະຕູລະບາຍນໍ້າ ລົ້ນ, ເຮືອນຈັກ, ລານໄຟ ແລະ ອື່ນໆ ລວມແລ້ວມີຄວາມຄືບໜ້າ 96,76% ໂດຍໄດ້ເລີ່ມກັກເກັບນໍ້າເຂົ້າອ່າງນັບແຕ່ວັນທີ 3 ກັນຍາ 2020 ເປັນຕົ້ນມາ. ປັດຈຸບັນ ຍັງລໍຖ້າໜ່ວຍງານທີ່ກ່ຽວຂ້ອງຈາກສູນກາງລົງມາກວດກາດ້ານເຕັກ ນິກຂອງເຂື່ອນທັງໝົດອີກເທື່ອໜຶ່ງ ໃນໄວໆນີ້ ຫຼັງຈາກນັ້ນ ໃນກາງເດືອນທັນວາ ປີ 2020 ຈະໄດ້ຜະລິດໄຟຟ້າຈໍາໜ່າຍຕາມແຜນການທີ່ກໍານົດໄວ້.

ທ່ານ ບຸນໂຮມ ຜິວລາລິນ ກ່າວອີກວ່າ: ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ຖືກຈັດເປັນບຸລິມະສິດຂອງແຂວງເຊກອງ ເພື່ອເປັນການສ້າງພື້ນຖານໂຄງລ່າງທີ່ເອື້ອອໍານວຍ ແລະ ສົ່ງເສີມໃຫ້ແກ່ການລົງທຶນພາຍໃນ ໂດຍສະເພາະແມ່ນການດຶງດູດຫົວໜ່ວຍທຸ ລະກິດດ້ານການທ່ອງທ່ຽວ, ໃນ ຂະນະດຽວກັນເຂື່ອນແຫ່ງນີ້ຈະເປັນບ່ອນຫາປາຂອງປະຊາ ຊົນ, ໃນຂະນະທີ່ນໍ້າໃນອ່າງຈະຖືກນໍາໄປຜະລິດນໍ້າປະປາຮັບໃຊ້ພາຍໃນເທດສະບານແຂວງເຊກອງ ໃນອະນາຄົດ.

ທ່ານ ສີນາວາ ສຸພານຸວົງ ໄດ້ເນັ້ນໜັກໃຫ້ໂຄງການຕ້ອງເຂັ້ມງວດຂັ້ນຕອນກັກເກັບນໍ້າ ໃຫ້ເປັນໄປຕາມລະບຽບການ ແລະ ຂັ້ນຕອນດ້ານເຕັກນິກ, ການບໍລິຫານຈັດການນ້ຳຕ້ອງໄດ້ປະສົມປະສານກັບໂຄງການຫ້ວຍລໍາພັນໃຫຍ່ທີ່ຢູ່ຕອນເທິງຢ່າງໃກ້ຊິດ, ເປັນລະບົບ, ການປະສານງານກັບທ້ອງຖິ່ນໃຫ້ວ່ອງໄວ ແລະ ທັນການຫາກມີກໍລະນີສຸກເສີນເກີດຂຶ້ນ.

ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ຕັ້ງຢູ່ບ້ານລາວີລໍາພັນ ເມືອງ ລະມາມ, ຫ່າງຈາກເທດສະ ບານແຂວງເຊກອງໄປທາງທິດຕາເວັນຕົກ ປະມານ 24 ກິ ໂລແມັດ, ເປັນປະເພດເຂື່ອນດິນໜຽວ, ມີລວງຍາວ 492 ແມັດ, ສູງ 55 ແມັດ, ມີກໍາລັງ ຕິດຕັ້ງທັງໝົດ 15 ເມກາວັດ (MW), ສາມາດຜະລິດກະ ແສໄຟຟ້າໄດ້ 68,31 ລ້ານ GWh/ປີ, ເປັນໂຄງການເຂື່ອນ ຂະໜາດນ້ອຍທີ່ໄດ້ຮັບອະນຸ ຍາດພັດທະນາ ແລະ ຄຸ້ມຄອງຂອງແຂວງເຊກອງ, ມູນຄ່າການກໍ່ສ້າງທັງໝົດ 48 ລ້ານໂດລາ, ຜູ້ພັັດທະນາໂຄງການແມ່ນບໍລິສັດຜະລິດໄຟຟ້າລາວມະຫາຊົນ (EDL-GEN) ຖືຮຸ້ນ 60% ແລະ ບໍລິສັດ ວຽງຈັນ ອໍໂຕເມຊັນ ແອນເອັນຈີເນຍຣິງ ຈຳກັດ (VASE) ຖືຮຸ້ນ 40%. ຜູ້ອອກແບບ ແລະ ດຳ ເນີນການກໍ່ສ້າງແມ່ນບໍລິສັດ CGGC ຈາກ ສປ ຈີນ. ສໍາລັບ ພະລັງງານໄຟຟ້າທີ່ຜະລິດໄດ້ ທັງໝົດຈະຈໍາໜ່າຍໃຫ້ລັດວິສາຫະກິດໄຟຟ້າລາວ.

(ຂ່າວ: ຄຳປະສິດ)