ໜັງສືພິມ ປະຊາຊົນ

ບ້ານແຊລະບຳ ໄດ້ຮັບໂຮງຮຽນປະຖົມສົມບູນຫຼັງໃໝ່

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 03/12/2020 10:42:39 ຈຳນວນຢ້ຽມຊົມ 6224 ຄັ້ງ

ເມື່ອບໍ່ດົນມານີ້ ທີ່ໂຮງ ຮຽນປະຖົມສົມບູນຫຼັງໃໝ່ ບ້ານແຊລະບຳ ເມືອງຊະນະສົມບູນ ແຂວງຈຳປາສັກ ໄດ້ຈັດພິທີມອບ-ຮັບອາຄານຮຽນປະຖົມສົມບູນຫຼັງໃໝ່ ບ້ານແຊລະບຳ ໂດຍການກ່າວມອບຂອງທ່ານ ທອງເພັດ ດ້ວງເງິນ ຮອງຜູ້ ອຳ ນວຍການໃຫຍ່ບໍລິສັດຜະລິດໄຟຟ້າລາວ ມະຫາຊົນ ແລະ ກ່າວຮັບໂດຍທ່ານ ພູວົງ ອະໄພ ຮອງຫົວໜ້າພະແນກສຶກສາທິການ ແລະ ກິລາ ແຂວງຈຳປາສັກ ຊຶ່ງມອບຕໍ່ໃຫ້ຫ້ອງການສຶກ ສາທິການ ແລະ ກິລາເມືອງຊະ ນະສົມບູນ, ຜູ້ອຳນວຍການໂຮງ ຮຽນ ແລະ ບ້ານເປັນຜູ້ນຳໃຊ້ຄຸ້ມ ຄອງ, ປົກປັກຮັກສາໃຫ້ເກີດປະໂຫຍດແກ່ລູກຫຼານ ໂດຍມີພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມເປັນສັກຂີພິຍານ.

ອາຄານຮຽນດັ່ງກ່າວ ມີຂະ ໜາດ 7x8 ແມັດ ເປັນອາຄານຮຽນຊັ້ນດຽວມີທັງໝົດ 5 ຫ້ອງຮຽນ 1 ຫ້ອງການຄູ-ອາຈານ, ມີ ລະບຽງບ່ອນນັ່ງຫຼິ້ນ, ເປັນອາ ຄານແບບຖາວອນ, ປະກອບເຄື່ອງເຟີນີເຈີ (ໂຕະ, ຕັ່ງ, ກະ ດານດຳ) ແລະ ເຄື່ອງໄຟຟ້າຄົບ ຊຸດ, ມີຫ້ອງນ້ຳ (ຊາຍ-ຍິງ) ໜຶ່ງຫຼັງ 3 ຫ້ອງ, ເຈາະນໍ້າບາດານປະກອບແທ່ງໃສ່ນໍ້າ, ໂຮງຮຽນ ຫຼັງດັ່ງກ່າວໄດ້ເລີ່ມກໍ່ສ້າງມາ ແຕ່ວັນທີ 26 ພຶດສະພາ 2020 ແລະ ສຳເລັດການກໍ່ສ້າງ 100% ໃນວັນທີ 20 ຕຸລາ 2020 ລວມມູນຄ່າການກໍ່ສ້າງ 1.129.717.997 ກີບ ໂດຍບໍລິສັດເຮັ່ງພູວັນກໍ່ສ້າງ ຈຳກັດເປັນຜູ້ຮັບເໝົາ.

ໃນໂອກາດດັ່ງກ່າວ, ທ່ານ ຮອງເລຂາພັກເມືອງຊະນະສົມ ບູນກໍໄດ້ມອບໃບກຽດຕິຄຸນໃຫ້ແກ່ບໍລິສັດຜະລິດໄຟຟ້າລາວມະຫາຊົນ ເພື່ອເປັນການຍ້ອງຍໍຊົມເຊີຍໃນການປະກອບສ່ວນຊ່ວຍສ້າງອາຄານຮຽນຫຼັງໃໝ່ໃຫ້ແກ່ລູກຫຼານໄດ້ມີອາຄານຮຽນທີ່ຖາວອນ ແລະ ສວຍງາມ.

(ຂ່າວ-ພາບ: ພອນ ມ້າວຄຳຜິວ)