ສປປ ລາວ ສົ່ງຜະລິດຕະພັນເຫຼັກເສັ້ນ ຄັ້ງທຳອິດອອກສູ່ຕ່າງປະເທດ

   ທ່ານ ຈີຢອງຊວນ  (JI YONG QUAN) ຜູ້ອຳນວຍການບໍ​ລິ​ສັດຮ່ວມ​ມື ໄດ້​ກ່າວ​ຕໍ່​ສື່ມວນ​ຊົນເມື່ອບໍ່​ດົນ​​ມານີ້​ວ່າ: ບໍລິສັດ ເຫຼັກ​ຂຸນເພັງ ວຽງຈັນຈຳກັດ ແລະ ບໍລິສັດ ອຸດສາຫະກຳເຫຼັກ ຄູນຄຳ ຈໍາກັດ (VIENTIANE KUNPENG STEEL SOLE CO.,LTD & KHOUNKHAM STEEL INDUSTRY SOLE CO.,LTD) ໄດ້ສົ່ງອອກຜະລິດຕະພັນເຫຼັກເສັ້ນຂອງ ສປປ ລາວ ຄັ້ງທຳອິດຈຳນວນ 300 ໂຕນ ໂດຍ​ຜ່ານດ່ານສາກົນໜອງນົກຂຽນ ແຂວງຈຳປາສັກ (ຊາຍແດນລະ ຫວ່າງ ສປປ ລາວ-ກຳປູເຈຍ) ໄປນະຄອນຫຼວງພະນົມເປັນ, ລາຊາອານາຈັກກຳປູເຈຍ.

   ຜະລິດຕະພັນເຫຼັກທີ່​ສົ່ງ​ອອກ​ຄັ້ງ​ນີ້, ມີ​ປະ​ເພດເຫຼັກປ້ອງອ້ອຍຂະໜາດ 25 mm, ຈຳ ນວນ 300 ໂຕນ, ເປັນຜະລິດຕະພັນເຫຼັກເສັ້ນທີ່ຜະລິດພາຍໃຕ້ການຮ່ວມມືລະຫວ່າງບໍລິສັດ  ເຫຼັກ​ຂຸນເພັງ ວຽງຈັນຈຳກັດ ແລະ ບໍລິສັດ ອຸດສາຫະກຳເຫຼັກ ຄູນຄຳ ຈໍາກັດ, ທັງສອງບໍລິສັດໄດ້ມີ​ການຮ່ວມມືກັນຮອບດ້ານແຕ່ຕົ້ນປີ 2018 ເປັນຕົ້ນມາລວມທັງການ ຜະລິດ, ການຂາຍຜະລິດຕະພັນເຫຼັກ ແລະ ການບໍລິການຄົບວົງຈອນທີ່ໃ​ຫຍ່ທີສຸດໃນ ສປປ ລາວ. ຜະລິດຕະພັນເຫຼັກເສັ້ນຂອງພວກເຮົາແມ່ນໄດ້ຮັບການ ຢັ້ງຢືນຄຸນນະພາບມາດຕະຖານ SR24、SD30、SD40 ຈາກກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຢີ, ໄດ້ຮັບການຢັ້ງຢືນມາດຕະຖານ ISO 9001:2015 ແລະ ເປັນໂຮງງານແຫ່ງ ທຳອິດທີສາມາດຜະລິດເຫຼັກເສັ້ນກົມກ້ຽງຂະໜາດ 6 mm ແລະ ເຫຼັກເສັ້ນປ້ອງອ້ອຍຂະໜາດ 6,5 mm ທີໄດ້ຄຸນນະພາບມາດຕະຖານກວ່າໝູ່ໃນ ສປປ ລາວ, ໃນປັດຈຸບັນທາງໂຮງງານ ຂອງພວກເຮົາມີກຳລັງການຜະລິດ 300.000 ໂຕນ/ປີ ແລະ ມີຕົວແທນຈຳໜ່າຍທົ່ວປະເທດ.

    ການສົ່ງອອກຜະລິດຕະພັນເຫຼັກ​ເສັ້ນຂອງ ສປປ ລາວ ຈໍາເປັນຕ້ອງມີໃບຢັ້ງຢືນ ແຫຼ່ງກຳເນີດສິນຄ້າ FORM D ແລະ ບໍລິສັດຮ່ວມມືຂອງພວກເຮົາ ກໍ່ໄດ້ຮັບໃບຢັ້ງຢືນ ແຫຼ່ງກຳເນີດສີນຄ້າ FORM D ຂອງຜະລິດຕະພັນເຫຼັກເສັ້ນເປັນໃບທຳອິດຂອງ ສປປ ລາວເພື່ອເປັນການສຸກຍູ້ ແລະ ຮັບປະກັນທາງດ້ານຄຸນນະພາບມາດຕະຖານໃນການ ສົ່ງອອກຜະລິດຕະພັນເຫຼັກເສັ້ນ. ທ່ານ ສູນທອນ ຈັນທະເດດ ຫົວໜ້າ ສູນຢັ້ງຢືນມາດ ຕະຖານ ແລະ ກວດກາຄຸນນະພາບແຫ່ງຊາດ ກໍໄດ້ລົງມາໂຮງງານເພື່ອກວດກາ ແລະ ເກັບຕົວຢ່າງຜະລິດຕະພັນເຫຼັກເສັ້ນ, ຫຼັງຈາກຜ່ານການກວດສອບ, ວັດແທກ ແລະ ທົດ ລອງ ທີ່ບໍລິສັດລັດວິສາຫະກິດສຳຫຼວດອອກແບບ ແລະ ວິໃຈວັດສະດຸກໍ່ສ້າງ SDMT ໄດ້ອອກໃບຢັ້ງຢືນ ຄຸນນະພາບໃຫ້.