ກອງປະຊຸມໃຫຍ່ ຜູ້ແທນແນວລາວສ້າງຊາດເມືອງສີໂຄດຕະບອງ ຄັ້ງທີ VII ໄດ້ໄຂຂຶ້ນໃນ​ເມື່ອບໍ່​ດົນ​ມານີ້, ທີ່ຫ້ອງປະຊຸມໃຫຍ່ຂອງເມືອງ ນະ​ຄອນຫຼວງວຽງ​ຈັນໂດຍເປັນປະທານຂອງທ່ານ ບຸນເຖິງ ວັນນາມະຫາໄຊ ຄະນະປະຈໍາພັກເມືອງ, ປະທານແນວລາວສ້າງຊາດເມືອງສີໂຄດຕະບອງ, ເປັນກຽດເຂົ້າຮ່ວມມີທ່ານ ຖະໜອມ ທຳທອງ ຄະນະປະຈຳພັກນະຄອນຫຼວງ ປະທານແນວລາວສ້າງຊາດນະຄອນຫຼວງວຽງຈັນ, ມີ​ພາກ​ສ່ວນ​ກ່ຽວ​ຂ້ອງ ແລະ ແຂກຖືກເຊີນເ​ຂົ້າຮ່ວມ.

   ທ່ານ ບຸນເຖິງ ວັນນາມະຫາໄຊ ໄດ້ຜ່ານບົດລາຍງານການເມືອງຂອງຄະນະກຳມະການແນວລາວສ້າງຊາດເມືອງ ຊຸດທີ VI, ທິດທາງແຜນການ ແລະ ວຽກງານຈຸດສຸມໃນຕໍ່ໜ້າ ​ຊຶ່ງທ່ານໄດ້ຍົກໃຫ້ເຫັນວ່າ: ຕະຫຼອດໄລຍະ 5 ປີຜ່ານມາ ແນວລາວສ້າງຊາດເມືອງ ໄດ້ເຜີຍແຜ່ມະຕິກອງປະຊຸມໃຫຍ່ຂອງພັກ, ຂອງແນວລາວສ້າງຊາດ ຂັ້ນສູນກາງ, ຂັ້ນນະຄອນຫຼວງ ແລະ ຂັ້ນເມືອງໃຫ້ປະຊາຊົນໄດ້ຮັບຮູ້ເຊື່ອມຊຶມ, ກຳແໜ້ນໄດ້ຢ່າງເລິກເຊິ່ງ; ຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຊຶ່ງເປັນການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ ໂດຍຫັນເອົາຫົວໜ່ວຍຄອບຄົວ ແລະ ບ້ານເປັນໃຈກາງສຳຄັນ, ໄດ້ເຂົ້າຮ່ວມໄກ່ເກ່ຍຂໍ້ຂັດແຍ່ງຂັ້ນບ້ານຈຳນວນໜຶ່ງທີ່ເກີດຂຶ້ນ ເຮັດໃຫ້ປະຊາຊົນມີຄວາມສາມັກຄີ ຮັກແພງ; ໄດ້ນຳພາປະຊາຊົນປົກປັກຮັກສາ ແລະ ເສີມຂະຫຍາຍຮີດຄອງປະເພນີ ອັນດີງາມຂອງຊາດ ຂອງເຜົ່າ, ໄດ້ເກັບກຳຄຳຄິດຄຳເຫັນ ຄວາມຂັດຂ້ອງໝອງໃຈ ຂອງປະຊາຊົນ ສະເໜີຕໍ່ສະມາຊິກສະພາ ແລະ ລາຍງານໃຫ້ແນວລາວສ້າງຊາດ ນະຄອນຫຼວງວຽງຈັນ. ພ້ອມນີ້ໄດ້ຮັບຮອງເອົາຄະນະກໍາມະການແນວລາວສ້າງຊາດເມືອງ ຊຸດໃໝ່ ຈໍານວນ 53 ທ່ານ, ພຣະສົງ 7 ອົງ, ຍິງ 8 ທ່ານ; ໃນນັ້ນ, ຮັບຮອງເອົາ ທ່ານ ບຸນເຖິງ ວັນນາມະຫາໄຊ ເປັນປະທານແນວລາວສ້າງຊາດເມືອງ, ທ່ານ ສົງກາ ອໍລະສິນ ແລະ ທ່ານ ນາງ ດວງພະໄທ ແກ້ວປະເສີດ ເປັນຮອງປະທານແນວລາວສ້າງຊາດເມືອງ ແລະ ຮັບຮອງຄະນະປະຈຳ ຂອງແນວລາວສ້າງຊາດເມືອງ ຈຳນວນ 5 ທ່ານ.

 ໂອກາດນີ້, ທ່ານ ປະທານແນວລາວສ້າງຊາດ ນະຄອນຫຼວງວຽງຈັນ ໄດ້ເນັ້ນໃຫ້ຄະນະກໍາມະການແນວລາວສ້າງຊາດເມືອງຊຸດໃໝ່ ຈົ່ງສືບຕໍ່ສຶກສາອົບຮົມການເມືອງແນວຄິດໃຫ້ຖັນແຖວສະມາຊິກພັກ-ພະນັກງານ ແລະ ໃຫ້ປະຊາຊົນບັນດາເຜົ່າ, ປຸກລະດົມປະຊາຊົນຮັກສາມູນເຊື້ອຄວາມສາມັກຄີປອງດອງ, ປົກປັກຮັກສາ ແລະ ເສີມຂະຫຍາຍຮີດຄອງປະເພນີຂອງປະຊາຊົນລາວບັນດາເຜົ່າ, ສືບຕໍ່ສຶກສາຄົ້ນຄວ້າແນວທາງນະໂຍບາຍຂອງພັກ-ລະບຽບກົດໝາຍຂອງລັດ; ພາລະບົດບາດ, ສິດ ແລະ ໜ້າທີ່ຂອງແນວລາວສ້າງຊາດ ໃຫ້ສາມາດກຳແໜ້ນ ແລະ ເຂົ້າໃຈໄດ້ຢ່າງເລິກເຊິ່ງ ເພື່ອເປັນບ່ອນອີງໃນການເຄື່ອນໄຫວວຽກງານແນວລາວສ້າງຊາດ ໃຫ້ໄດ້ຮັບຜົນສຳເລັດ.

ຂ່າວ-ພາບ: ​ຈາກ ສນ​ຊ