ໜັງສືພິມ ປະຊາຊົນ

ຕີລາຄາການຊີ້ນຳ-ນຳພາ ພັດທະນາ ເຂດຈຸດສຸມໃຈກາງຢູ່ໄຊສົມບູນ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 17/12/2020 08:53:32 ຈຳນວນຢ້ຽມຊົມ 2789 ຄັ້ງ

ຂປລ. ກອງປະຊຸມສະຫຼຸບຕີລາຄາການນຳພາ-ຊີ້ນຳ ຂອງຄະນະຮັບຜິດຊອບຊີ້ນຳການພັດທະນາເຂດຈຸດສຸມໃຈກາງ ຢູ່ແຂວງໄຊສົມບູນ ໄດ້ຈັດຂຶ້ນໃນ ວັນທີ 15 ທັນວາຜ່ານມາ ໂດຍການເປັນປະທານຂອງທ່ານ ພັນຄຳ ວິພາວັນ ຮອງປະທານປະເທດ ຫົວໜ້າຄະນະຊີ້ນຳພັດທະນາເຂດຈຸດສຸມໃຈກາງ, ມີບັນດາຮອງລັດຖະມົນຕີ ຫົວ ໜ້າກົມ ຮອງກົມທີ່ມາຈາກສູນກາງ ພ້ອມດ້ວຍຄະນະພັກ-ຄະນະນຳແຂວງໄຊສົມບູນ ແລະ ພາກສ່ວນກ່ຽວຂ້ອງເຂົ້າຮ່ວມ ເພື່ອຕີລາຄາວຽກງານທີ່ພົ້ນເດັ່ນ, ຈຸດດີ, ຈຸດອ່ອນ ແລະ ບັນຫາຂໍ້ຄົງຄ້າງອື່ນໆ ແລະ ວາງທິດທາງການຈັດຕັ້ງປະຕິບັດໃນຕໍ່ໜ້າ ໃຫ້ມີຄວາມຮັດກຸມ ແລະ ມີປະສິດທິພາບດີຂຶ້ນກວ່າເກົ່າ.
ໂອກາດນີ້, ທ່ານ ພັນຄຳ ວິພາວັນໄດ້ມີຄຳເຫັນໂອ້ລົມຕໍ່ກອງປະ ຊຸມ ໂດຍທ່ານໄດ້ເນັ້ນໜັກໃຫ້ຄະນະພັກ-ອົງການປົກຄອງແຂວງໄຊສົມບູນທຸກຂັ້ນ ຈົ່ງເພີ່ມທະວີຄວາມສາມັກຄີພາຍໃນພັກ ແລະ ປະຊາຊົນໃຫ້ແໜ້ນແຟ້ນ, ຖືເອົາການສຶກສາອົບຮົມການເມືອງ-ແນວຄິດ ໃຫ້ພະນັກງານສະມາຊິກພັກ, ທະຫານ, ຕຳຫຼວດ, ຕະຫຼອດຮອດປະຊາຊົນບັນດາເຜົ່າ ເປັນໜ້າທີ່ໃຈກາງ ໂດຍນຳເອົາແນວ ທາງນະໂຍບາຍຂອງພັກ, ແຜນ ພັດທະນາເສດຖະກິດ-ສັງຄົມ ຂອງລັດລົງໂຄສະນາເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ໂດຍຕິດ ພັນກັບການສ້າງພັກ-ພະນັກ ງານສືບທອດກັບທີ່ຢ່າງມີການເລືອກເຟັ້ນໃຫ້ມີຈຳນວນເພີ່ມຂຶ້ນທັງປະລິມານ ແລະ ຄຸນນະພາບ ໄປຄຽງຄູ່ກັບວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ເພື່ອຮັບປະກັນຄວາມສະຫງົບປອດໄພໃນສັງຄົມ ຢ່າງໜັກແໜ້ນ, ຖືເອົາການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າເປັນວຽກງານຕົ້ນ ຕໍ, ທັງພ້ອມກັນສືບຕໍ່ສ້າງສາພັດທະນາແຂວງໄຊສົມບູນໃຫ້ຈະເລີນກ້າວໜ້າ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ພ້ອມກັນນີ້, ທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ໄດ້ລາຍງານກ່ຽວກັບສະພາບທີ່ພົ້ນເດັ່ນ ໃນການພັດທະນາແຂວງໄຊສົມບູນ ໃນໄລຍະ 1 ປີ ຜ່ານມາ, ຄະນະພັກ-ອົງການປົກຄອງແຂວງ ໄດ້ຖືເອົາວຽກງານສຶກສາອົບຮົມ-ການເມືອງແນວຄິດ ເປັນບັນຫາສຳຄັນ ໂດຍສອດຫ້ອຍກັບວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ແລະ ສາມາດຮັບປະກັນໄດ້ຄວາມມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ ແລະ ມີຄວາມສະຫງົບປອດໄພຢ່າງໜັກແໜ້ນ, ເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ ໂດຍເສດຖະກິດຂອງແຂວງ ໄດ້ຮັບການຂະຫຍາຍຕົວໃນລະດັບ 5%, ລວມຍອດຜະລິດຕະພັນພາຍໃນບັນລຸ 1.097 ຕື້ກີບ, ສະເລ່ຍໃສ່ຫົວຄົນໄດ້ 11.300.000 ກວ່າກີບ ຫຼືເທົ່າກັບ 1.225 ໂດລາ.
(ຂ່າວ: ຈິນລະວອນ ວໍລະສົມບູນ)

ຂ່າວທີ່ໄດ້ຮັບຄວາມນິຍົມ