ໜັງສືພິມ ປະຊາຊົນ

ຮັ່ງມີຂຶ້ນ ຍ້ອນເຮັດການບໍລິການ ແລະ ລ້ຽງສັດ ເປັນຟາມ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 17/12/2020 12:43:05 ຈຳນວນຢ້ຽມຊົມ 5017 ຄັ້ງ

ໂດຍ: ວັນໄຊ ຕະວິນຍານ

ກ່ອນໜ້ານີ້ຫຼາຍສິບປີ, ທ່ານ ສະໄໝ ສຸກກະເສີມ ຢູ່ບ້ານທ້າວແກ່ນ ເມືອງແກ່ນທ້າວ ແຂວງໄຊຍະບູລີ ມີອາຊີບເຮັດໄຮ່,ເຮັດສວນ ແລະ ລ້ຽງສັດ ດໍາລົງຊີວິດແບບປະຊາຊົນທົ່ວໄປ. ພາຍຫຼັງທີ່ພັກ-ລັດຖະບານໄດ້ມີແນວທາງໃຫ້ຊາວກະສິກອນຢຸດຕິການເຮັດໄຮ່ປູກເຂົ້າ ເພື່ອປົກປັກຮັກສາປ່າໄມ້ ແລະ ສິ່ງແວດລ້ອມ ຫັນຊາວກະສິກອນມາເຮັດອາຊີບຄົງທີ່ດ້ວຍການປູກພືດ-ລ້ຽງສັດເປັນສິນຄ້າສົ່ງອອກຕາມເງື່ອນໄຂຂອງແຕ່ລະຄອບຄົວ. ຫຼາຍປີຕໍ່ມາຜົນຜະລິດຂອງຊາວກະສິກອນ ໂດຍສະເພາະແມ່ນ ສາລີ,ໝາກເດືອຍ, ມັນຕົ້ນ, ຝ້າຍ, ໝາກຂາມຫວານຫຼາຍຂຶ້ນ,ໃນປີ 2005 ທ່ານ ສະໄໝ ສຸກກະເສີມ ໄດ້ຕັດສິນໃຈເຮັດການບໍລິການຄ້າຂາຍຮັບຊື້ຜົນຜະລິດຂອງຊາວກະສິກອນສົ່ງອອກໄປຕ່າງປະເທດ, ເມື່ອມີທຶນຮອນແດ່ແລ້ວ ກໍໄດ້ຊ່ວຍຊາວກະສິກອນທີ່ຂາດທຶນຮອນ ດ້ວຍການອອກເງິນຊື້ແນວພັນ, ຈ່າຍຄ່າແຮງງານກຽມດິນປູກ, ເກັບຊື້ ເພື່ອສົ່ງເສີມການປູກພືດກະສິກຳ ສົ່ງອອກ.
ເມື່ອເຫັນບ້ານເມືອງມີການພັດທະນາສ້າງສາດີຂຶ້ນ, ປະຊາຊົນຕ້ອງການຊື້ວັດຖຸກໍ່ສ້າງຫຼາຍຂຶ້ນ ຕົນເອງໄດ້ຕັ້ງຮ້ານຂາຍເຄື່ອງວັດສະດຸກໍ່ສ້າງຄົບວົງຈອນຄ່ຽງຄູ່ກັນໄປ ເຮັດໃຫ້ທຸລະກິດສາມາດດຳເນີນຕໍ່ໄປໄດ້ດີ.
ມາຮອດປີ 2009 ອີງໃສ່ເງື່ອນໄຂຄວາມສະດວກ ແລະ ທຶນຮອນພຽບພ້ອມ,ບວກກັບການຊຸກຍູ້ສົ່ງເສີມ ແລະ ອໍານວຍຄວາມສະດວກຂອງອໍານາດການປົກຄອງເມືອງ ທ່ານ ສະໄໝ ສຸກກະເສີມ ຈຶ່ງໄດ້ສ້າງຕັ້ງເປັນບໍລິສັດການຄ້າຂາອອກ-ຂາເຂົ້າຈຳກັດ ເພື່ອເຮັດໜ້າທີ່ເຄື່ອນໄຫວວຽກງານສົ່ງເສີມກະສິກໍາເປັນສິນຄ້າ ທີ່ຄົບວົງຈອນ ໂດຍໄດ້ສຸມທຶນຮອນເຂົ້າໃນການພັດທະນາພື້ນຖານໂຄງລ່າງຂອງບໍລິສັດໃຫ້ມີຄວາມຮັບປະກັນຮອງຮັບຜົນຜະລິດກະສິກຳເປັນຕົ້ນແມ່ນໄດ້ຈັດຊື້ພາຫະນະຮັບໃຊ້, ເຮັດສາງເກັບມ້ຽນ, ເຮັດລານຕາກ, ສ້າງຕັ້ງໂຮງອົບແຫ້ງສາລີລ້ຽງສັດ ແລະ ສິ່ງເອື້ອອຳນວຍຈຳນວນໜຶ່ງ ເພື່ອເຮັດໃຫ້ພືດກະສິກຳທີ່ຮັບຊື້ຈາກຊາວກະສິກອນໄດ້ຮັບການປຸງແຕ່ງດ້ານຄຸນນະພາບ, ສ້າງມູນຄ່າເພີ່ມຂຶ້ນ ແລະ ຂາຍສົ່ງອອກຕ່າງປະເທດ. ປີ 2010 ວຽກງານການສົ່ງເສີມກະສິກໍາມີການຂະຫຍາຍຕົວ ແລະ ຜົນຜະລິດມີປະລິມານເພີ່ມຂຶ້ນທາງອົງການປົກຄອງເມືອງແກ່ນທ້າວ ຈຶ່ງໄດ້ຈັດຕັ້ງສະມາຄົມນັກທຸລະກິດເກັບຊື້ ແລະ ສົ່ງອອກຂຶ້ນເພື່ອໃຫ້ມີຄວາມເຂັ້ມແຂງໃນການດໍາເນີນທຸລະກິດ, ທ່ານ ສະໄໝ ສຸກກະເສີມ ຫົວໜ້າ ບໍລິສັດ ການຄ້າຂາອອກ-ຂາເຂົ້າ ຈຳກັດ. ທາງບໍລິສັດໄດ້ສະໝັກໃຈເຂົ້າເປັນສະມາຊິກ ຊຶ່ງມີ 36 ບໍລິສັດ.ພາຍຫຼັງມີກອງປະຊຸມເລືອກຕັ້ງປະທານກຸ່ມນັກທຸລະກິດ ທ່ານ ສະໄໜ ສຸກກະເສີມ ໄດ້ຮັບເລືອກຕັ້ງເປັນປະທານສະມາຄົມ ເພື່ອເຮັດໜ້າທີ່ເກັບຊື້ື ແລະ ສົ່ງອອກຜົນຜະລິດກະສິກຳ ຢູ່ພາຍໃນ ແລະ ຕ່າງປະເທດຮ່ວມກັນ.
ທ່ານ ສະໄໝ ສຸກກະເສີມ ເວົ້າສູ່ຟັງວ່າ: ໃນຊຸມປີຜ່ານມາ ຍ້ອນມີການຂະຫຍາຍຕົວທາງດ້ານເສດຖະກິດ-ສັງຄົມ, ດ້ານການຄ້າ ແລະ ການບໍລິການ ໄດ້ມີສະພາບຄ່ອງ ບໍລິສັດຂ້າພະເຈົ້າກໍໄດ້ເອົາໃຈໃສ່ເກັບຊື້ ແລະ ສົ່ງອອກຜົນຜະລິດກະສິກຳຈາກປະຊາຊົນເປັນຈຳນວນຫຼາຍສົມຄວນ ໂດຍສະເພາະແມ່ນສາລີ ແຕ່ໃນໄລຍະ 2-3 ປີຫຼັງມານີ້ຍ້ອນອີງໃສ່ສະພາບດິນຟ້າອາກາດມີການປ່ຽນແປງເຮັດໃຫ້ການປູກສາລີຂອງຊາວກະສິກອນບໍ່ໄດ້ຮັບຜົນດີ ມາຮອດປີ 2016 ປະຊາຊົນຈຶ່ງໄດ້ຫັນມາປູກມັນຕົ້ນເປັນຈຳນວນຫຼວງຫຼາຍ ແລະ ມີທ່າອ່ຽງເພີ່ມຂຶ້ນ ຂ້າພະເຈົ້າກໍໄດ້ປະສານກັບອົງການປົກຄອງເມືອງ ແລະ ຂະແໜງການທີ່ກ່ຽວຂ້ອງ ເພື່ອຫາຊ່ອງທາງຈໍາໜ່າຍຜົນຜະລິດໃຫ້ກັບຊາວກະສິກອນ ແລະ ໄດ້ເກັບຊື້ຜົນຜະລິດດັ່ງກ່າວ ຊຶ່ງໃນໄລຍະ 5 ປີຜ່ານມາບໍລິສັດເກັບຊື້ສາລີໄດ້ທັງໝົດ ຈຳນວນ 60.000 ໂຕນ ມູນຄ່າການສົ່ງອອກ 11,25 ຕື້ກີບ, ຊື້ມັນຕົ້ນ 30.000ໂຕນ, ມູນຄ່າ 43,5 ຕື້ກີບ ໄປຄ່ຽງຄູ່ກັນນັ້ນ, ຄອບຄົວຂອງຂ້າພະເຈົ້າຍັງໄດ້ປະກອບອາຊີບເປີດບໍລິການຂາຍເຄື່ອງວັດສະດຸກໍ່ສ້າງແບບຄົບວົງຈອນ ໃນເບື້ອງຕົ້ນແມ່ນໄດ້ເປີດຂາຍຢູ່ເຮືອນ ຕໍ່ມາຍ້ອນໄດ້ຮັບການຕອບສະໜອງຈາກລູກຄ້າດີ ຈຶ່ງໄດ້ຂະຫຍາຍກິດຈະການ ໄດ້ປຸກສ້າງສາງເກັບມ້ຽນເຄື່ອງເພີ່ມຕື່ມ 2 ຫຼັງ, ມາຮອດປີ 2017 ຂ້າພະເຈົ້າໄດ້ເປີດກິດຈະການ ເປັນຕົວແທນຈໍາໜ່າຍດ້ານແນວພັນ (ໂດຍສະເພາະແນວພັນສາລີ ແປຊີຟີກຈາກປະເທດໄທ) ເພື່ອສະໜອງໃຫ້ພໍ່ຄ້າຄົນກາງ ແລະ ຊາວກະສິກອນຢູ່ພາຍໃນເມືອງແກ່ນທ້າວ ແລະ ເມືອງອ້ອມຂ້າງພາຍໃນແຂວງໄຊຍະບູລີ ໃຫ້ມີຄວາມສະດວກບໍ່ຕ້ອງເດີນທາງໄປຊື້ໄກ. ຜ່ານການດໍາເນີນທຸລະກິດຂອງຄອບຄົວຂ້າພະເຈົ້າໃນປີໜຶ່ງແມ່ນມີລາຍຮັບຈາກການບໍລິການວັດສະດຸກໍ່ສ້າງ ແລະ ຈຳໜ່າຍແນວພັນສາລີເປັນມູນຄ່າ 1,5 ຕື້ກີບ; ພ້ອມກັນນີ້,ເພື່ອສືບຕໍ່ເສີມຂະຫຍາຍການລ້ຽງສັດໃຫຍ່ທີ່ຄອບຄົວໄດ້ເລີ່ມລ້ຽງມາແຕ່ປີ 2011 ໃຫ້ມີການຂະຫຍາຍຕົວ ແລະ ກ້າວໄປເຖິງການລ້ຽງແບບເຕັກນິກໃໝ່ທີ່ທັນສະໄໝ, ຂ້າພະເຈົ້າກໍໄດ້ນໍາເອົາບົດຮຽນຈາກພາຍໃນ ແລະ ຕ່າງປະເທດມານຳໃຊ້ ຊຶ່ງມາຮອດປັດຈຸບັນ ຄອບຄົວຂ້າພະເຈົ້າມີສວນຫຍ້າລ້ຽງສັດທັງໝົດມີ 4 ຕອນໃຫຍ່ ເນື້ອທີ່ປະມານ 100 ເຮັກຕາ, ມີເຄື່ອງອັດເຟືອງແຫ້ງທີ່ທັນສະໄໝຈຳນວນ 1 ເຄື່ອງ. ປີ 2015 ມີງົວຢູ່ 105 ໂຕ ( ສາຍພັນງົວແມ່ນບາຊິນ, ບາມັນ ແລະ ໄທໃຫຍ່) ມາຮອດປັດຈຸບັນມີງົວທັງໝົດ 180 ໂຕ, ໃນນີ້ເປັນງົວແມ່ພັນ 150 ໂຕ, ພໍ່ພັນ 8 ໂຕ. ໃນໄລຍະຜ່ານມານີ້ຂ້າພະເຈົ້າໄດ້ລ້ຽງໃສ່ສວນຫຍ້າພັນລູຊີ ແບບເປັນລ໋ອກ ໝູນວຽນ ກໍໄດ້ຮັບຜົນດີພໍສົມຄວນ ສັດທີ່ລ້ຽງແມ່ນໄດ້ຄັດ ແລະ ນຳອອກຂາຍເລີຍ ເຮັດໃຫ້ບໍ່ໄດ້ນໍ້າໜັກ ແລະ ບໍ່ມີຊີ້ນຫຼາຍ, ມາຮອດປີ 2018 ຂ້າພະເຈົ້າໄດ້ແບ່ງເດີ່ນຫຍ້າພັນລູຊີມາທົດລອງປູກຫຍ້າພັນເນເປຍ ໃນເນື້ອທີ່ 5 ຮັກຕາ, ມີລະບົບນໍ້າຫົດຫຍ້າທີ່ທັນສະໄໝ (ລະບົບສະປີງເກີ)ດູດຈາກນໍ້າເຫືອງຂຶ້ນມາ ເຫັນວ່າການປູກຫຍ້າດັ່ງກ່າວແມ່ນໄດ້ຮັບຜົນດີ, ເວລາຕັດຫຍ້າໃນຮອບວຽນໜຶ່ງຈະໃຊ້ເວລາ 45-60 ວັນຂຶ້ນໄປ ໂດຍໃຊ້ລົດຕັດຫຍ້າແບບທັນສະໄໝ (ຕັດ ແລະ ບົດພ້ອມ), ສັດໂຕໃດທີ່ເຫັນວ່າເໝາະສົມທີ່ຈະນຳອອກຂາຍ ກໍຈະໄດ້ຄັດເລືອກ ແລະ ນຳໄປໃສ່ຄອກເພື່ອໃຫ້ອາຫານ ກິນເປັນເວລາໃຫ້ນໍ້າ, ຫຍ້າບົດ ແລະ ມີອາຫານປະສົມຂຸ້ນ ຊຶ່ງເອີ້ນວ່າ: ງົວທອມ, ງົວຂຸນ. ການທອມຊຸດໜຶ່ງໄດ້ປະມານ 30 ໂຕ ໃຊ້ເວລາທອມປະມານ 4-6 ເດືອນ,ໄລຍະເວລາທອມອີງຕາມນໍ້າໜັກ ແລະ ອາຍຸຂອງງົວ ພາຍຫຼັງທອມແລ້ວງົວໂຕໜຶ່ງຈະມີນໍ້າໜັກສະເລ່ຍ 350 ກິໂລ ຈຶ່ງເອົາອອກຂາຍ ໂດຍມີພໍ່ຄ້າພາຍໃນມາຮັບຊື້ກັບທີ່. ລ້ຽງແບບນີ້ຈະເຮັດໃຫ້ສັດມີຊີ້ນຫຼາຍ ຊຶ່ງເປັນທີ່ຕ້ອງການຂອງຕະຫຼາດພາຍໃນ ແລະ ຕ່າງປະເທດ ໃນໜຶ່ງປີຂາຍງົວອອກ ປະມານ 30 ໂຕ, ສັງລວມໃນໄລຍະ 5 ປີຜ່ານມາສາມາດນຳງົວອອກຂາຍປະມານ 150 ໂຕ ໄດ້ເງິນ 1 ຕື້ກວ່າກີບ.
ທ່ານ ສະໄໝ ສຸກກະເສີມ ເວົ້າຕື່ມວ່າ: ໃນການລ້ຽງສັດຂອດສຳຄັນແມ່ນການຕິດຕາມກວດກາ ເຝົ້າລະວັງພະຍາດສັດຢ່າງເປັນປົກກະຕິ, ເອົາໃຈໃສ່ສັກຢາປ້ອງກັນພະຍາດປີໜຶ່ງ 2 ຄັ້ງຕໍ່ໂຕ (ຢາວັກຊິນກັນປາກເປື່ອຍລົງເລັບ ແລະ ເຕົ້າໂຮມເລືອດ),ເອົາໃຈໃສ່ຮັກສາສວນຫຍ້າ ທີ່ສະໜອງອາຫານໃຫ້ຕໍ່ເນື່ອງ,ເອົາໃຈໃສ່ບຳລຸງຮັກສາ ທໍາຄວາມສະອາດບໍ່ໃຫ້ຮົກເຮື້ອ, ສວນໜຶ່ງຈະແບ່ງເປັນ 2-3 ຕອນ,ແຕ່ລະຕອນໃຊ້ເວລາເອົາງົວເຂົ້າກິນຫຍ້າປະມານ 7 ວັນຈຶ່ງໝູນອອກໄປຕອນໃໝ່, ນອກຈາກເຮັດການບໍລິການຄ້າຂາຍ ແລະ ລ້ຽງສັດແລ້ວຄອບຄົວຂ້າພະເຈົ້າຍັງໄດ້ເຮັດນາປູກເຂົ້າໃນເນື້ອທີ່ 6,5 ເຮັກຕາ, ໄດ້ຜົນຜະລິດເຂົ້າເຖິງປີລະ 25-30 ໂຕນ ຊຶ່ງໃນແຕ່ລະປີຢູ່ໃນຄອບຄົວໄດ້ຂາຍເຂົ້າປະມານ 15 ໂຕນ ເປັນເງິນບໍ່ຕໍ່າກວ່າ 30 ລ້ານກີບ.
ສັງລວມແລ້ວຂ້າພະເຈົ້າມີກຳໄລສຸດທິຈາກການບໍລິການ,ລາຍຮັບຈາກການຂາຍສັດ, ເກັບຊື້ຜົນຜະລິດ, ຂາຍເຂົ້າໄດ້ທັງໝົດ 2,97 ຕື້ກີບສະເລ່ຍໃສ່ຫົວຄົນພາຍໃນຄອບຄົວໄດ້ 494 ລ້ານກວ່າກີບຕໍ່ຄົນຕໍ່ປີ ຫຼື ເທົ່າກັບ 58.117 ໂດລາ.
ທ່ານ ສະໄໝ ສຸກກະເສີມ ຫົວໜ້າ ບໍລິສັດ ການຄ້າຂາອອກ-ຂາເຂົ້າ ຈຳກັດ ຢູ່ບ້ານທ້າວແກ່ນເມືອງແກ່ນທ້າວ, ແຂວງໄຊຍະບູລີ ນອກຈາກການສ້າງເສດຖະກິດຄອບຄົວຮັ່ງມີຂຶ້ນແລ້ວ ຍັງເປັນບໍລິສັດທີ່ປະຕິບັດຕາມລະບຽບກົດໝາຍ ໂດຍສະເພາະແມ່ນການມອບພັນທະອາກອນ, ຕໍ່ປະຕັງທຸລະກິດຢ່າງເປັນປົກກະຕິ ພ້ອມກັນນັ້ນກໍໄດ້ເອົາໃຈໃສ່ປະກອບສ່ວນຊ່ວຍພັກ-ລັດ, ຊ່ວຍເຫຼືອສັງຄົມ, ຊຸມຊົນ, ການສຶກສາ, ວັນບຸນ, ງານສຳຄັນຕ່າງໆຂອງພັກຂອງຊາດ ລວມມູນຄ່າປະມານ 110 ລ້ານກີບ. ໃຫ້ການຮ່ວມມືກັບອົງການປົກຄອງ, ອຳນວຍຄວາມສະດວກໃຫ້ເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງໃນການກວດກາຄວາມເປັນລະບຽບຮຽບຮ້ອຍຂອງກຳມະກອນຢ່າງເປັນປົກກະຕິໄປຄຽງຄູ່ກັບການເຄື່ອນໄຫວທຸລະກິດບໍລິສັດກໍໄດ້ເອົາໃຈໃສ່ເປັນກະບອກສຽງຕິດຕາມການເຄື່ອນໄຫວຂອງສັງຄົມ ກໍຄື ກຸ່ມຄົນບໍ່ດີຊ່ວຍພັກ-ຊ່ວຍລັດຢ່າງຈິງໃຈ.
ຈາກທີ່ເປັນຊາວກະສິກອນຢູ່ຊົນນະບົດຄົນໜຶ່ງມີລາຍຮັບພຽງແຕ່ກຸ້ມກິນເປັນວັນໆໄປ. 45 ປີຜ່ານມາ ໄດ້ຮັບການສຶກສາອົບຮົມແນວທາງຂອງພັກ ແລະ ລັດ,ອໍານາດການປົກຄອງເມືອງ ແລະ ແຂວງໄດ້ອໍານວຍຄວາມສະດວກໃນທຸກດ້ານ, ຊ່ວຍເຫຼືອດ້ານເຕັກນິກວິຊາການດ້ານຕ່າງໆ ຈຶ່ງເຮັດໃຫ້ການສ້າງເສດຖະກິດຄອບຄົວຂອງ ທ່ານ ສະໄໝ ສຸກກະເສີມ ດຳເນີນໄປດ້ວຍຄວາມສຳເລັດຮັ່ງມີຂຶ້ນ, ໄດ້ຮັບການຍ້ອງຍໍຊົມເຊີຍຈາກການຈັກຕັ້ງທຸກຂັ້ນ ແລະ ໄດ້ຮັບການປ່ອນບັດເລືອກຕັ້ງເປັນສະມາຊິກສະພາປະຊາຊົນແຂວງໃນປັດຈຸບັນ.