ໜັງສືພິມ ປະຊາຊົນ

ຈຳປາສັກ ມີທ່າແຮງໃນການຜະລິດກະສິກຳເປັນສິນຄ້າ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 24/12/2020 09:21:37 ຈຳນວນຢ້ຽມຊົມ 3212 ຄັ້ງ

ຈໍາປາສັກ ເປັນແຂວງໜຶ່ງທີ່ມີຄວາມຈະເລີນກ້າວໜ້າທາງດ້ານເສດຖະກິດ-ສັງຄົມ ແລະ ເປັນຈຸດສູນກາງທາງດ້ານເສດຖະກິດ-ສັງຄົມຂອງສີ່ແຂວງພາກໃຕ້. ແຂວງຈຳປາສັກ ອຸດົມສົມບູນໄປດ້ວຍແຫຼ່ງຊັບພະຍາກອນ ທຳມະຊາດທີ່ມີທ່າແຮງໃນການຜະລິດກະສິກຳເປັນສິນຄ້າ ຍ້ອນສະພາບຈຸດພິເສດພູມອາກາດທີ່ຫຼາກຫຼາຍ ມີແມ່ນໍ້າຂອງໄຫຼຜ່ານ ມີຄວາມອຸດົມສົມບູນ ດິນດຳນໍ້າຊຸ່ມເໝາະແກ່ການປູກພືດກະສິກຳ ສາມາດທຳການຜະລິດໄດ້ຕະຫຼອດປີ ຜະລິດຕະພັນກະສິກຳທີ່ມີຊື່ສຽງດ້ານການສົ່ງອອກນັ້ນກໍຄືກາເຟ, ຊາ, ເຂົ້າ, ພືດຜັກ, ໝາກໄມ້, ປາ, ໝາກແໜ່ງ ແລະ ອື່ນ ໆ.

ທ່ານ ມະໄລທອງ ກົມມະສິດ ຮອງເຈົ້າແຂວງຈຳປາສັກ ໄດ້ລາຍງານໃຫ້ຮູ້ວ່າ: ທ່າແຮງໃນການຜະລິດກະສິກຳຂອງແຂວງຈຳປາສັກນັ້ນມີຫຼາຍ ແຕ່ຖ້າຊິເຮັດໃຫ້ປະຊາຊົນຮັ່ງມີ ຢູ່ດີ ກິນດີນັ້ນ ຕ້ອງໄດ້ນໍາໃຊ້ເຕັກນິກວິທະຍາສາດສຸມໃສ່ການຜະລິດ ນີ້ແມ່ນຂອດທີ່ພວກເຮົາຈະຕ້ອງໄດ້ເອົາໃຈໃສ່ ໃນສະພາບທີ່ເສດຖະກິດຂອງພວກເຮົາໄດ້ຮັບຜົນກະທົບຈາກພະຍາດໂຄວິດ-19 ດ້ານໜຶ່ງທີ່ພວກເຮົາຈະຕ້ອງໄດ້ຊຸກຍູ້ສົ່ງເສີມແມ່ນການຜະລິດພາຍໃນໃຫ້ຫຼາຍຂຶ້ນເຊັ່ນ: ພືດຜັກ, ໝາກໄມ້, ປາ ແລະ ອື່ນໆ ເພື່ອສົ່ງໄປຂາຍຢູ່ນະຄອນ ຫຼວງວຽງຈັນ, ສ່ວນກາເຟຖືເປັນລາຍຮັບທີ່ສຳຄັນໃຫ້ປະ ຊາຊົນ. ປີນີ້, ລາຄາກາເຟດີຂຶ້ນຫຼາຍ ສະນັ້ນນະໂຍບາຍຂອງແຂວງໄດ້ມີການຄົ້ນຄວ້າສຶກສາເຖິງສາເຫດເພື່ອໃຫ້ກາເຟໄປໄດ້ໄກກວ່ານີ້ ບັນຫາໜຶ່ງແມ່ນຕົ້ນທຶນການຜະລິດສູງ, ການຜະລິດກະສິກຳບໍ່ທັນເຂັ້ມແຂງຍັງອີງໃສ່ການນຳເຂົ້າຫຼາຍ, ການຜະລິດຍັງບໍ່ທັນເປັນສິນຄ້າ, ການນຳໃຊ້ເຕັກນິກບໍ່ທັນຫຼາຍບວກໃສ່ກັບການໄດ້ຮັບຜົນກະທົບຈາກໄພທຳມະຊາດ ເພື່ອກະຕຸ້ນເສດຖະກິດຊ່ວຍຜູ້ປະກອບການໃນໄລຍະຜ່ານມາພວກເຮົາໄດ້ຈັດງານວາງສະແດງຂາຍສິນຄ້າກະສິກຳ-ຫັດຖະກຳເພື່ອສົ່ງເສີມສິນຄ້າພາຍໃນ, ກຳນົດຈຸດສຸມເຂົ້າຢູ່ໃນແຜນ ການ 5 ປີຂອງແຂວງໃນການຊຸກຍູ້ສົ່ງເສີມ, ກຳນົດຈຸດສຸມໃນການຜະລິດ ຊຶ່ງຜ່ານມາໄດ້ມີການກຳນົດແລ້ວສິນຄ້າທີ່ຕະຫຼາດຕ້ອງການຫຼາຍມີເຂົ້າ, ພືດຜັກ, ໝາກໄມ້ກິນໝາກ, ກາເຟ, ຊາ, ມັນຕົ້ນ, ສາລີ, ສັດລ້ຽງ ແລະ ອື່ນໆ. ມາປີນີ້, ພວກເຮົາຕ້ອງໄດ້ທົບທວນຄືນຕະຫຼາດຕ້ອງການສິນຄ້າປະເທດໃດ ເພື່ອສຸມໃສ່ຕອບສະໜອງສິນຄ້າໃຫ້ທັນກັບຄວາມຕ້ອງການຂອງຕະຫຼາດ. ສຳລັບການກໍສ້າງທາງລົດໄຟກຳລັງຈະສຳເລັດໃນມໍ່ໆນີ້ ຖືເປັນເສັ້ນເລືອດໃຫຍ່ໃນການຄົມມະນາຄົມຂົນສົ່ງຂາຍສິນຄ້າພວກເຮົາຈະຕ້ອງໄດ້ທົບທວນຄືນຄວາມຕ້ອງການຢູ່ໃນຕະຫຼາດຈີນມີຫຍັງແດ່ ຫຼັງຈາກນັ້ນ ພວກເຮົາຈະຕ້ອງໄດ້ສຸມໃສ່ການຜະລິດ ເພື່ອຕອບສະໜອງຄວາມຕ້ອງການຂອງຕະຫຼາດຈີນ.

ທ່ານໄດ້ກ່າວເນັ້ນຕື່ມວ່າ: ຕໍ່ບັນຫາດັ່ງກ່າວທາງການນຳແຂວງຈະພະຍາຍາມຊ່ວຍຊຸກຍູ້, ປຶກສາຫາລືກົນໄກການປະສານງານເພື່ອຊ່ວຍຜູ້ປະກອບການກໍຄືທະນາຄານ ແລະ ພະແນກການອື່ນໆ. ພ້ອມນີ້, ກໍຢາກໃຫ້ຜູ້ປະກອບການປັບປຸງຕົນເອງໃນການດຳເນີນທຸລະກິດເພື່ອໃຫ້ແທດເໝາະກັບສະພາບປັດຈຸບັນ ຊຶ່ງລັດ ຖະບານໄດ້ມີນະໂຍບາຍສົ່ງ ເສີມຜູ້ປະກອບການເຂົ້າຫາແຫຼ່ງທຶນ ເພື່ອມາພັດທະນາທຸລະກິດ ແຕ່ຜູ້ປະກອບການຕ້ອງມີມາດຕະຖານ ເພື່ອເຂົ້າເຖິງແຫຼ່ງທຶນເພື່ອຊຸກຍູ້ການຜະລິດທຸລະກິດ, ນີ້ຖືເປັນວຽກທີ່ສຳຄັນຫຼາຍ ເພື່ອການພັດທະນາທີ່ຍືນຍົງ ທັງເປັນການກະຕຸ້ນໃຫ້ການຜະລິດກະສິກຳຢູ່ພາຍໃນແຂວງມີຄວາມເຂັ້ມແຂງ ປະກອບສ່ວນເຂົ້າໃນການພັດ ທະນາເສດຖະກິດ-ສັງຄົມຂອງແຂວງໃຫ້ເຕີບໃຫຍ່ເຂັ້ມ ແຂງເປັນກ້າວໆ.

(ໂດຍ: ພູວັນ)