ໜັງສືພິມ ປະຊາຊົນ

ຍ້ອນໂຄວິດ 19 ເຮັດໃຫ້ເສດຖະກິດ ແຂວງອັດຕະປື ຂະຫຍາຍຕົວບໍ່ໄດ້ຕາມແຜນການ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 29/12/2020 09:44:53 ຈຳນວນຢ້ຽມຊົມ 2318 ຄັ້ງ

ໂດຍອີງຕາມການລາຍງານຂອງທ່ານ ສຸນະຄອນ ແກ້ວວຽງຄໍາ ຫົວໜ້າພະແນກແຜນການ ແລະ ການລົງທຶນ ແຂວງອັດຕະປື ຕໍ່ກອງປະຊຸມສະໄໝສາມັນ ເທື່ອທີ X ຂອງສະພາປະຊາຊົນ ແຂວງອັດຕະປື ຊຸດທີ I ຫວ່າງບໍ່ດົນມານີ້ ວ່າ: ໃນປີ 2020 ແຂວງອັດຕະປື ໄດ້ວາງຄາດໝາຍການຂະຫຍາຍຕົວຂອງເສດຖະກິດໄວ້ເບື້ອງຕົ້ນໃນລະດັບ 8% ແຕ່ການຈັດຕັ້ງປະຕິບັດຕົວຈິງແມ່ນບໍ່ບັນລຸຕາມແຜນການ ສາເຫດຕົ້ນຕໍກໍຍ້ອນໄດ້ຮັບຜົນກະທົບຈາກການແຜ່ລະບາດຂອງພະຍາດ ໂຄວິດ 19,ໂດຍອີງຕາມການປະເມີນຂອງສູນສະຖິຕິປະຈໍາແຂວງ ເຫັນວ່າເສດຖະກິດຂອງແຂວງຂະຫຍາຍຕົວພຽງ 4,6%, ສ້າງມູນຄ່າຕາມລາຄາໃນປີໄດ້ 2.974 ຕື້ກີບ, ສະເລ່ຍຕໍ່ຫົວຄົນໄດ້ 18 ລ້ານ 6 ແສນກີບ ຫຼື ເທົ່າກັບ 2 ພັນກວ່າໂດລາ.
ທ່ານ ສຸນະຄອນ ແກ້ວວຽງຄໍາ ຍັງໄດ້ກ່າວຕື່ມວ່າ: ການຂະຫຍາຍຕົວເສດຖະກິດຂອງແຂວງອັດຕະປື ໃນແຕ່ລະຂົງເຂດມີຄື: ຂະແໜງກະສິກໍາຂະຫຍາຍຕົວ 2,4% ກວມເອົາ 23,39% ຂອງຈີດີພີ, ເຖິງວ່າບໍ່ບັນລຸຕາມແຜນການກໍຕາມແຕ່ເຫັນວ່າຂະແໜງການນີ້ ມີທ່າຂະຫຍາຍຕົວດີພໍສົມຄວນ ຍ້ອນແຮງງານທີ່ໄດ້ຮັບຜົນກະທົບຈາກພະຍາດ ໂຄວິດ-19 ບໍ່ສາມາດປະກອບອາຊີບໄດ້ ຈຶ່ງຫັນໄປສູ່ການຜະລິດກະສິກໍາ ຊຶ່ງແຂວງອັດຕະປືມີທ່າແຮງຢູ່ແລ້ວ, ໃນນີ້ຄາດຄະເນຜົນຜະລິດກະສິກໍາຂະຫຍາຍຕົວ 1,7%, ການປູກຝັງ, ລ້ຽງສັດ ແລະ ການປະມົງຂະຫຍາຍຕົວ 1,7%, 2,1% ແລະ 7,4% ຕາມລໍາດັບ, ສ່ວນປ່າໄມ້ແມ່ນຕິດລົບ 29%. ຂະແໜງອຸດສາຫະກໍາ ຂະຫຍາຍຕົວ 9,9% ກວມເອົາ 39,74% ຂອງຈີດີພີ, ປັດໄຈຫຼັກທີ່ສົ່ງຜົນໃຫ້ຂະແໜງອຸດສາຫະກໍາຂະຫຍາຍຕົວ ມາຈາກອຸດສາຫະກໍາປຸງແຕ່ງ ຂະຫຍາຍຕົວ 14% ການກໍ່ສ້າງຂະຫຍາຍຕົວ 12,8% ແລະ ພະລັງງານໄຟຟ້າ ຂະຫຍາຍຕົວ 4,5%, ຂະແໜງບໍລິການ ຂະຫຍາຍຕົວ 7% ກວມເອົາ 23,39% ຂອງຈີດີພີ ຊຶ່ງຂະແໜງການນີ້ກໍແມ່ນອີກຂະແໜງໜຶ່ງທີ່ໄດ້ຮັບຜົນກະທົບໜັກຈາກການລະບາດຂອງພະຍາດ ໂຄວິດ-19 ໂດຍສະເພາະແມ່ນວຽກງານການທ່ອງທ່ຽວ ແລະ ຂະແໜງການທີ່ຕິດພັນກັບການທ່ອງທ່ຽວ ເປັນຕົ້ນ ໂຮງແຮມ, ເຮືອນພັກ ແລະ ຮ້ານອາຫານ ຫຼຸດລົງເຖິງ 30% ດ້ານໄປສະນີໂທລະຄົມມະນາຄົມ ຂະຫຍາຍຕົວພຽງ 1,2% ແລະ ການຂາຍຍົກ-ຂາຍຍ່ອຍ ຂະຫຍາຍຕົວພຽງ 4,6%. (ຂ່າວ: ວັດທະນາ ຂ, ອັດຕະປື)