ໜັງສືພິມ ປະຊາຊົນ

ເມືອງປາກກະດິງ ຄັດເລືອກນັກຮຽນເກັ່ງສາຍສາມັນໄປສອບເສັງຂັ້ນແຂວງ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 05/01/2021 09:48:14 ຈຳນວນຢ້ຽມຊົມ 2002 ຄັ້ງ

ການສອບເສັງຄັດເລືອກເອົານັກຮຽນເກັ່ງຊັ້ນ ປ5, ມ4 ແລະ ມ7 ທົ່ວເມືອງປາກກະດິງ ແຂວງບໍລິຄຳໄຊເພື່ອເປັນຕົວແທນໄປສອບເສັງຢູ່ຂັ້ນແຂວງ. ໄດ້ຈັດຂຶ້ນເມື່ອບໍ່ດົນມານີ້ ຢູ່ຫ້ອງປະຊຸມກຸ່ມເສດຖະກິດເມືອງ ພາຍໃຕ້ການເປັນປະທານຂອງທ່ານ ບຸນຍັງ ອຸ່ນຊຽງໃໝ່ ຮອງເຈົ້າເມືອງປາກກະດິງ ຜູ້ຊີ້ນຳວຽກງານວັດທະນະທຳ-ສັງຄົມ, ມີທ່ານ ບຸນເພັງ ເພີນຈິດ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະກຳມະການຮັບຜິດຊອບການສອບເສັງ ແລະ ນັກສອບເສັງທີ່ເປັນຕົວແທນຂອງແຕ່ລະໂຮງຮຽນໃນທົ່ວເມືອງເຂົ້າຮ່ວມ.

ການສອບເສັງຄັ້ງນີ້, ຊັ້ນ ປ5 ມີ 3 ວິຊາ ຄື: ຄະນິດສາດ, ພາສາລາວ ແລະ ໂລກອ້ອມຕົວ. ຊັ້ນ ມ 4 ແລະ ມ 7 ມີ 4 ວິຊາຄື: ພາສາລາວ, ຄະນິດສາດ, ຟີຊິກສາດ ແລະ ເຄມີສາດ, ມີຈຳນວນນັກສອບເສັງທັງໝົດ 141 ຄົນ, ກຳນົດເວລາສອບເສັງແຕ່ລະວິຊາ 2 ຊົ່ວໂມງ.

ການສອບເສັງຄັ້ງນີ້, ເປັນການປະຕິບັດກິດຈະກຳ ການຮຽນການສອນໃຫ້ຄົບ 5 ຫຼັກມູນຂອງການສຶກສາ ທີ່ກະຊວງສຶກສາທິການ ແລະ ກິລາວາງອອກ, ທັງເປັນການທົດສອບຄວາມຮູ້, ຄວາມສາມາດ, ປູກຈິດສຳນຶກ ແລະ ສ້າງຄວາມກະຕືລືລົ້ນໃຫ້ແກ່ນັກຮຽນ ມີຈິດໃຈບຸກບືນຄົ້ນຄ້ວາຮ່ຳຮຽນ ສະແຫວງຫາຄວາມຮູ້ ສ້າງຕົນເອງໃຫ້ມີຄວາມກ້າວໜ້າໃນສັງຄົມ ຊຶ່ງຜົນການສອບເສັງມີດັ່ງນີ້: ປ5 ວິຊາພາສາລາວ ທີໜຶ່ງ ທ້າວບຸນມາ ມະນີວົງ ໂຮງຮຽນປະຖົມສົມບູນຂອນຂວາງ, ທີສອງ ນາງ ດາວຫວັນ ວໍລະສານ ໂຮງຮຽນປະຖົົມສົມບູນໜອງບົວ, ທີສາມ ນາງ ມຸກດາ ພົມຈິນດາ ໂຮງຮຽນປະຖົມສົມບູນນານ້ຳ. ວິຊາຄະນິດສາດ ທີໜຶ່ງ ທ້າວເຕ້ຍ ທຳມະຍາ ປະຖົມສົມບູນດອນໄຊ, ທີສອງ ນາງ ວານິຕາ ຍົດຕິທຳ ປະຖົມສົມບູນໂພນງາມ, ທີສາມ ນາງ ມີ້ນ ມະນີທອງ ປະຖົມສົມບູນ ທົ່ງນ້ອຍ. ວິຊາໂລກອ້ອມຕົວ ທີໜຶ່ງ ນາງເພັດມະນີ ແສງທະວົງ ປະຖົມສົມບູນທົງນາມີ, ທີສອງ ນາງ ດອກແຄ ມາກສົມພານ ປະຖົມສົມບູນດອນໄຊ, ທີສາມ ນາງ ມາຍມິ້ນ ພົງຄຳພັນ ປະຖົມສົມບູນໂພນສີ. ມ4 ວິຊາພາສາລາວ ນາງ ກຸ້ງນາລີ ໄຊຍະວົງສາ ມ ຕົ້ນໂພນສີ, ວິຊາຄະນິດສາດ ທ້າວໃສຢ່າງ ເຈ້ຍມົວ ມໍຕົ້ນທົ່ງນາມີ, ວິຊາຟີຊິກສາດ ທ້າວສີວົງສຸກເຮີ ວາເຮີຕົງລົງ ມໍຕົ້ນທົ່ງນາມີ, ວິຊາເຄມີສາດ ນາງ ຈີເອ້ຍທ່າວ ເພຍຫຼວງ ມ ຕົ້ນ ທົ່ງນາມີ. ມ7 ວິຊາພາສາລາວ ນາງ ທິດາ ຢ່າງ ມສ ວຽງຄຳ, ວິຊາຄະນິດສາດ ທ້າວ ເມັງເຮີ ຈະເລີນ ເຢ່ຍປ່າວເຮີ ມສ ປາກກະດິງ, ວິຊາຟີຊິກສາດ ທ້າວ ມໍລໍ່ ມສ ວຽງຄຳ ແລະ ວິຊາເຄມີສາດ ທ້າວ ຕົ້ນ ສີດາວົງ ມສ ວຽງຄຳ.

(ຂ່າວ-ພາບ: ແສງທອງ)