ໜັງສືພິມ ປະຊາຊົນ

ກອງປະຊຸມທາບທາມເນື້ອໃນ ແລະ ບຸກຄະລາກອນເຂົ້າໃນໂຄງປະກອບຂອງຄະນະບໍລິຫານງານສູນກາງພັກ ສະໄໝທີ XI ຂອງພັກ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 06/01/2021 08:59:22 ຈຳນວນຢ້ຽມຊົມ 1872 ຄັ້ງ

ເພື່ອປະຕິບັດຕາມແຜນ ດຳເນີນງານຂອງຄະນະບໍລິ ຫານງານສູນກາງພັກ. ໃນລະຫວ່າງວັນທີ 4-5 ມັງກອນ 2021 ນີ້, ກອງປະຊຸມທາບທາມເນື້ອໃນກອງປະຊຸມໃຫຍ່ຄັ້ງທີ XI ຂອງພັກ ແລະ ຕິດພັນກັບການທາບທາມບຸກຄະລາກອນ ເຂົ້າໃນໂຄງປະກອບຂອງຄະນະບໍລິຫານງານສູນກາງພັກ ສະໄໝ XI (ຮອບທີ 3) ໄດ້ເປີດຂຶ້ນຢ່າງເປັນທາງການ ພ້ອມກັນ ຢູ່ 7 ຈຸດໃນຂອບເຂດທົ່ວປະເທດ. ໂດຍມີບັນດາສະຫາຍກຳມະການກົມການເມືອງສູນກາງພັກ ແລະ ຄະນະເລຂາທິການສູນກາງພັກ, ບັນດາສະຫາຍຜູ້ແທນສົມບູນ ທີ່ຕາງໜ້າໃຫ້ກະຊວງ-ອົງການ, ທ້ອງຖິ່ນ ແລະ ນະຄອນຫຼວງວຽງຈັນ ຈໍານວນ 600 ກວ່າສະຫາຍ ໄດ້ເຂົ້າຮ່ວມຢ່າງພ້ອມພຽງ. ສະເພາະຢູ່ນະຄອນຫຼວງວຽງຈັນ ພາຍໃຕ້ການເປັນປະທານຂອງ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ເພື່ອພ້ອມກັນຄົ້ນຄວ້າ ແລະ ປະກອບຄວາມເຫັນ ໃສ່ເອກະສານສຳຄັນຕົ້ນຕໍ ຄື: 1) ຮ່າງລາຍງານການເມືອງຕໍ່ກອງປະຊຸມໃຫຍ່ຄັ້ງທີ XI ຂອງພັກ; 2) ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX; 3) ຮ່າງກົດລະບຽບຂອງພັກປະຊາຊົນປະຕິວັດລາວ ສະໄໝທີ XI; 4) ຮ່າງບົດສຳຫຼວດການນຳພາລວມຂອງຄະນະບໍລິຫານງານສູນກາງພັກ ສະໄໝທີ X. ພ້ອມດຽວກັນ ກອງປະຊຸມຍັງຈະໄດ້ຈັດຕັ້ງການທາບທາມບຸກຄະລາກອນ ເຂົ້າໃນໂຄງປະກອບຄະ ນະບໍລິຫານງານສູນກາງພັກຊຸດໃໝ່ (ສະໄໝທີ XI) ຕື່ມອີກ.

ກອງປະຊຸມໄດ້ຮັບຟັງການປະກອບຄວາມເຫັນຢ່າງກົງໄປກົງມາ ແລະ ເປັນເອກະພາບສູງ ດ້ານທັດສະນະ, ຫຼັກ ການ, ທິດນຳ ແລະ ແຜນນະໂຍບາຍ ທີ່ຈະກຳນົດອອກ ໃນແນວທາງການເມືອງ ແລະ ແນວທາງການຈັດຕັ້ງຂອງພັກເຮົາໃນຊຸມປີຕໍ່ໜ້າ. ອັນໄດ້ປະກອບສ່ວນຢ່າງໜັກແໜ້ນ ເປັນພື້ນຖານໃຫ້ອະນຸກຳມະການກ່ຽວຂ້ອງ ນຳໄປສືບ ຕໍ່ປັບປຸງເນື້ອໃນໃຫ້ຈະແຈ້ງ, ເລິກເຊິ່ງ, ຄົບຖ້ວນສົມບູນ ແລະ ມີຄວາມສາມາດຈັດຕັ້ງປະຕິບັດໃຫ້ປະກົດຜົນເປັນຈິງໄດ້.

ກອງປະຊຸມທາບທາມເນື້ອໃນ ແລະ ບຸກຄະລາກອນກອງປະຊຸມໃຫຍ່ ຄັ້ງທີ XI ຂອງພັກ ໄດ້ດຳເນີນໄປດ້ວຍບັນຍາກາດ ຟົດຟື້ນ ແລະ ສຳເລັດຜົນເປັນຢ່າງດີຕາມຈຸດປະສົງ ແລະ ລະດັບຄາດໝາຍທີ່ວາງໄວ້ທຸກປະການ.

(ຂ່າວ: ຫ້ອງວ່າການສູນກາງພັກ)