ໜັງສືພິມ ປະຊາຊົນ

ກອງປະຊຸມໃຫຍ່ຜູ້ແທນແນວລາວສ້າງຊາດແຂວງວຽງຈັນ ຄັ້ງທີ VII

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 12/01/2021 09:30:55 ຈຳນວນຢ້ຽມຊົມ 3114 ຄັ້ງ

ກອງປະຊຸມໃຫຍ່ຜູ້ແທນແນວລາວສ້າງຊາດແຂວງວຽງຈັນ ຄັ້ງທີ VII ໄດ້ເປີດຂຶ້ນເມື່ອບໍ່ດົນມານີ້, ທີ່ສະໂມສອນເຂື່ອນໄຟຟ້ານ້ຳງື່ມ 1 ແຂວງວຽງຈັນໂດຍການເຂົ້າຮ່ວມຂອງທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ, ຕາງໜ້າຈາກບັນດາພະແນກ, ອົງການຈັດຕັ້ງມະຫາຊົນຂອງແຂວງ, ເມືອງເຂົ້າຮ່ວມ.

ກອງປະຊຸມ, ທ່ານ ທອງສະຫວັນ ວົງສຳພັນ ຮອງເລຂາພັກແຂວງ ກໍາມະການສູນກາງແນວລາວສ້າງຊາດ ປະທານແນວລາວສ້າງຊາດແຂວງວຽງຈັນ ໄດ້ຜ່ານບົດລາຍງານການເມືອງທັງສອງພາກຄື: ຕີລາຄາ ຜົນການຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງການແນວລາວສ້າງຊາດ ແຂວງວຽງຈັນ ຄັ້ງທີ VI ຄາດ ໝາຍສູ້ຊົນ, ທິດທາງໜ້າທີ່ ແລະ ວຽກງານຈຸດສຸມໃນຕໍ່ໜ້າ. ຕະຫຼອດໄລຍະ 5 ປີຜ່ານມາຄະນະກຳມະການແນວລາວສ້າງຊາດແຂວງ ໄດ້ນຳເອົາແນວທາງນະໂຍບາຍຂອງພັກ-ລະບຽບກົດໝາຍຂອງລັດ ໂຄສະນາເຜີຍແຜ່ ໃຫ້ສະມາຊິກພັກ-ພະນັກງານ ແລະ ປະຊາຊົນໄດ້ຮັບຮູ້ເຊື່ອມຊຶມ ແລະ ກຳແໜ້ນ. ໄດ້ເປີດຂະບວນການແຂ່ງ ຂັນສ້າງຄອບຄົວ ແລະ ບ້ານສາມັກຄີປອງດອງຕິດພັນກັບຂະບວນການ ແຂ່ງຂັນຮັກຊາດ ແລະ ພັດທະນາ, ຕິດພັນກັບການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຢ່າງເປັນຂະບວນການຟົດຟື້ນ, ໄດ້ມີການເກັບກຳຫາງສຽງຂອງສັງຄົມ ເພື່ອສັງລວມແລ້ວລາຍງານໃຫ້ພາກສ່ວນທີ່ກ່ຽວຂ້ອງ ເພື່ອຄົ້ນຄວ້າແກ້ໄຂ, ໄດ້ປຸກລະດົມປະຊາຊົນໃຫ້ເປັນເຈົ້າການຕັ້ງໜ້າເຂົ້າຮ່ວມຕ້ານ, ສະກັດກັ້ນພະຍາດອາດຍາສິດ ແລະ ການຫຼິ້ນກິນຟູມເຟືອຍ; ສຶກສາອົບຮົມໃຫ້ປະຊາຊົນມີການປົກປັກຮັກສາວັດທະນະທຳ ແລະ ຮີດຄອງປະເພນີ ອັນດີງາມຂອງແຕ່ລະຊົນເຜົ່າ. ພ້ອມກັນນີ້, ໄດ້ຮັບຟັງປະກອບຄໍາເຫັນກ່ຽວກັບຄອບຄົວຕົວແບບໃນການປູກຝັງ, ບົດຮຽນການສ້າງຄອບຄົວ ແລະ ບ້ານສາມັກຄີປອງດອງ.

ກອງປະຊຸມຄັ້ງນີ້, ໄດ້ຮັບ ຮອງເອົາຄະນະກໍາມະການແນວລາວສ້າງຊາດແຂວງຊຸດໃໝ່ຈໍານວນ 99 ທ່ານ, ຍິງ 16 ທ່ານ, ພະສົງ 5 ອົງ ແລະ ໄດ້ຮັບຮອງເອົາ ທ່ານ ເທບພະໄທ ແກ້ວເຂັມເພັດ ເປັນປະທານແນວ ລາວສ້າງຊາດແຂວງ ຊຸດໃໝ່, ທ່ານ ພວງພັນ ຈັນທະລັງສີ, ທ່ານ ສົມເພັດ ສີພອນໄຊ ແລະ ທ່ານ ນາງ ຄຳກອງ ຂັນທະວົງ ເປັນຮອງປະທານ ແລະ ຮັບຮອງຄະນະປະຈຳແນວລາວສ້າງຊາດ ແຂວງຈຳນວນ 5 ທ່ານ.

ໃນຕອນທ້າຍ ທ່ານ ຮອງປະທານສູນກາງແນວລາວສ້າງຊາດ ໄດ້ເນັ້ນໃຫ້ຄະນະກຳມະການແນວລາວສ້າງຊາດແຂວງຊຸດໃໝ່ ຈົ່ງນຳເອົາ ມະຕິກອງປະຊຸມໃຫຍ່ໃນຄັ້ງນີ້ ໄປຈັດຕັ້ງເຜີຍແຜ່ໃຫ້ສະມາ ຊິກພັກ-ພະນັກງານ ແລະ ປະ ຊາຊົນລາວບັນດາເຜົ່າໄດ້ຮັບຮູ້ເຂົ້າໃຈ ແລະ ນຳໄປຈັດຕັ້ງຜັນຂະຫຍາຍໃຫ້ເປັນແຜນງານ, ໂຄງການ ແລະ ກິດຈະກຳ ຢ່າງລະອຽດ ເພື່ອເປັນບ່ອນອີງ ໃນການເຄື່ອນໄຫວວຽກງານແນວລາວສ້າງຊາດ ໃຫ້ໄດ້ຮັບຜົນສຳເລັດດີຂຶ້ນເທື່ອລະກ້າວ, ປຸກລະດົມຂົນຂວາຍປະຊາຊົນ ໃຫ້ມີສ່ວນຮ່ວມໃນການຈັດຕັ້ງ ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວແຂວງຢ່າງຮອບດ້ານ, ສືບ ຕໍ່ສຶກສາອົບຮົມ, ເຕົ້າໂຮມຄວາມສາມັກຄີເປັນປຶກແຜ່ນແໜ້ນໜາ, ຊຸກຍູ້ຂະບວນການຜະລິດກະສິກຳເປັນສິນຄ້າ, ສົ່ງເສີມການອະນຸລັກຮັກສາວັດທະນະທຳ-ຮີດ ຄອງປະເພນີອັນດີງາມຂອງຊາດ, ຂອງເຜົ່າ; ເອົາໃຈໃສ່ຊີ້ນຳ-ນຳພາ ແລະ ສ້າງເງື່ອນໄຂອຳນວຍຄວາມສະດວກ ໃນການເຄື່ອນໄຫວວຽກງານຕາມພາລະບົດບາດ ໃຫ້ມີເນື້ອໃນສົມບູນຂຶ້ນກວ່າເກົ່າ.

(ຂ່າວ-ພາບ: ສນຊ)

ຂ່າວທີ່ໄດ້ຮັບຄວາມນິຍົມ