ໜັງສືພິມ ປະຊາຊົນ

ເປີດການນຳໃຊ້ສາຍດ່ວນລັດວິສະຫະກິດໄຟຟ້າລາວ ແລະ ແອັບພີເຄຊັນ EDL Mobile

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 13/01/2021 09:14:50 ຈຳນວນຢ້ຽມຊົມ 795 ຄັ້ງ

ລັດວິສາຫະກິດໄຟຟ້າລາວ ໄດ້ເປີດການນຳໃຊ້ສາຍດ່ວນ 1199 ທີ່ໄດ້ພັດທະນາລະບົບສາຍດ່ວນ ໃຫ້ທຽບເທົ່າກັບສາກົນ ພາຍໃຕ້ການຮ່ວມມືກັບບໍລິສັດ ຊີສເມຕິກ ໄອທີ ໂຊລູຊັນ ຈຳກັດ ຊຶ່ງໄດ້ເພີ່ມ ຈາກ 10 ຄູ່ສາຍ ມາເປັນ 30 ຄູ່ສາຍ ທີ່ສາມາດຮອງຮັບການໂທແຈ້ງເຫດກ່ຽວກັບໄຟຟ້າພ້ອມໆກັນທັງ 30 ຄູ່ສາຍ ໃນຕະຫຼອດ 24 ຊົ່ວໂມງ ແລະ ໄດ້ພັດທະນາແອັບພີເຄຊັນ EDL Mobile ເພື່ອຍົກສູງຄຸນ ນະພາບຂອງການບໍລິການໃຫ້ທັນສະໄໝ, ວ່ອງໄວ ແລະ ໃຫ້ຄວາມສະດວກສະບາຍໃຫ້ແກ່ລູກຄ້າ.

ພິທີເປີດການນໍາໃຊ້ສາຍດ່ວນລັດວິສາຫະກິດ ໄຟຟ້າລາວ 1199 ແລະ EDL Mobile Application ໄດ້ຈັດຂຶ້ນໃນວັນທີ 11 ມັງກອນ ຜ່ານມາ ທີ່ສຳນັກງານໃຫຍ່ຂອງລັດວິສາຫະກິດ ໄຟຟ້າລາວ ໂດຍການໃຫ້ກຽດເປັນປະທານ ຂອງທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ມີທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ທ່ານ ວິຈິດ ຊິນດາວົງ ປະທານສະພາບໍລິຫານບໍລິ ສັດ ຊີສເມຕິກ ໄອທີ ໂຊລູຊັ້ນ ຈຳກັດ (Sysmatik IT Solution Co.,Ltd) ພ້ອມດ້ວຍທຸກພາກສ່ວນກ່ຽວ ຂ້ອງເຂົ້າຮ່ວມ.

ທ່ານ ຄຳມະນີ ອິນທິລາດ ໄດ້ກ່າວວ່າ: ຜົນສໍາເລັດຂອງ ການພັດທະນາສູນບໍລິການ ສາຍດ່ວນ 1199 ແລະ EDL mobile Application ເປັນ ຄວາມພະຍາຍາມຂອງລັດວິສາຫະກິດໄຟຟ້າລາວ ການສະ ໜອງນະໂຍບາຍຂອງລັດຖະ ບານ ເພື່ອຍົກລະດັບການບໍລິ ການທີ່ມີຄວາມທັນສະໄໝ ທັງເປັນການສ້າງຄວາມໝັ້ນໃຈໃຫ້ກັບຜູ້ຊົມໃຊ້ໄຟຟ້າ ຊຶ່ງສາຍດ່ວນ 1199 ແລະ ແອັບພີເຄຊັນດັ່ງກ່າວໄດ້ມີບົດບາດສຳຄັນທີ່ສຸດ ເພື່ອຈະໃຫ້ຮູ້ໄດ້ໂດຍໄວ ເຖິງບັນຫາຕ່າງໆທີ່ເກີດຂຶ້ນຕໍ່ກັບບັນຫາຂອງລະບົບໄຟຟ້າ ແລະ ສາມາດຄຸ້ມຄອງການບໍ ລິການ, ການສ້ອມແປງແກ້ໄຂບັນຫາໄຟຟ້າໃຫ້ໄດ້ທັນການ ພ້ອມທັງຍົກສູງການບໍລິການໃຫ້ມີຄຸນນະພາບສູງຂຶ້ນ, ທັນສະໄໝຂຶ້ນ ແລະ ວ່ອງໄວຂຶ້ນກວ່າເກົ່າ.

ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ໄດ້ກ່າວວ່າ: ສູນບໍລິການສາຍດ່ວນ ລັດວິສາຫະກິດໄຟຟ້າລາວ 1199 ແລະ EDL mobile Application ເປັນໂຄງການທີ່ລັດວິສາຫະກິດໄຟຟ້າລາວ ເອົາໃຈໃສ່ໃນການພັດທະນາ ເພື່ອຫັນວຽກງານການບໍລິການໃຫ້ກ້າວສູ່ທັນ ສະໄໝ ແລະ ມາດຕະຖານລະ ດັບສາກົນ ຊຶ່ງເປັນໂຄງການ ຮ່ວມມືກັນລະຫວ່າງ ລັດວິສາ ຫະກິດໄຟຟ້າລາວ ແລະ ບໍລິສັດ ຊີສເມຕິກ ໄອທີ ໂຊລູຊັນ ຈໍາກັດ ເພື່ອພັດທະນາ ແລະ ປັບປຸງລະບົບ CALL Center ແລະ EDL mobile Application, ສາຍດ່ວນລັດວິສາຫະກິດໄຟ ຟ້າລາວ 1199 ມີສູນກາງຕັ້ງຢູ່ ສໍານັກງານໃຫຍ່ລັດວິສາຫະກິດ ໄຟຟ້າລາວ (ຊັ້ນ10) ເພື່ອພັດ ທະນາລະບົບສາຍດ່ວນທີ່ມີຢູ່ຈາກ 10 ຄູ່ສາຍ ມາເປັນ 30 ຄູ່ສາຍ ເພື່ອຮອງຮັບການແຈ້ງ ເຫດກ່ຽວກັບໄຟຟ້າຕະຫຼອດ 24 ຊົ່ວໂມງ ແລະ ການສົ່ງວຽກ, ລາຍງານວຽກ ເພື່ອແກ້ໄຂວຽກ ງານພາກສະໜາມແບບອອນ ລາຍ. ນອກນັ້ນ ຍັງໄດ້ພັດທະນາລະບົບ EDL mobile Application ໄປຄຽງຄູ່ກັນເພື່ອຕອບສະໜອງເຊື່ອມຕໍ່ກັບລະບົບ Call Center Server ຂອງ ລັດວິສາຫະກິດໄຟຟ້າລາວ ເພື່ອ ໃຫ້ບໍລິການແກ່ລູກຄ້າໂດຍສະ ເພາະແມ່ນຂໍ້ມູນການຊົມໃຊ້ໄຟ ຟ້າແບບ Automatic ເຊັ່ນ: ການກວດເບິ່ງປະຫວັດການຊົມໃຊ້ໄຟຟ້າ, ການຊຳລະເງິນ ຄ່າກະແສໄຟຟ້າ, ການແຈ້ງ ເຫດໄຟຟ້າຂັດຂ້ອງ, ແຈ້ງການ ມອດໄຟ, ຂໍ້ມູນຂ່າວສານກ່ຽວກັບໄຟຟ້າ, ການຂໍຊົມໃຊ້ໄຟຟ້າໃໝ່ ແລະ ຂໍ້ມູນອື່ນໆທີ່ກ່ຽວຂ້ອງ. ໃນອະນາຄົດແມ່ນຈະໄດ້ສືບຕໍ່ພັດທະນາລະບົບໃຫ້ກວມເອົາທຸກສາຂາໃນທົ່ວປະ ເທດ ແລະ ສາມາດຈ່າຍເງິນຄ່າກະແສໄຟຟ້າໄດ້ໂດຍກົງ ຜ່ານທາງແອັບພີເຄຊັນ EDL mobile.

(ຂ່າວ - ພາບ: ສຸກສະຫວັນ)