ໜັງສືພິມ ປະຊາຊົນ

ຂະແໜ່ງ ຍທຂ ພັດທະນາແລວທາງເຊື່ອມຈອດອາຊຽນ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 14/01/2021 19:19:50 ຈຳນວນຢ້ຽມຊົມ 1740 ຄັ້ງ

ມະຕິກອງປະຊຸມໃຫຍ່ ຄັ້ງທີ X ຂອງພັກ ໄດ້ກໍານົດໄວ້ວ່າ: “ຍົກລະດັບ ແລະ ຂະຫຍາຍ ພື້ນຖານໂຄງລ່າງຢ່າງມີຈຸດສຸມ ແລະ ຕອບສະ ໜອງຄວາມຮຽກຮ້ອງຕ້ອງການໃນການພັດ ທະນາ, ທັງເປັນການເສີມຂະຫຍາຍທ່າແຮງດ້ານທີ່ຕັ້ງພູມສາດ ເປັນໃຈກາງຂອງອະນຸພາກພື້ນ ດ້ວຍການພັດທະນາແລວທາງເຊື່ອມຈອດອາຊຽນ, ລວມທັງທາງລົດໄຟໃຫ້ໄດ້ມາດຕະຖານສາກົນ, ສົ່ງເສີມ ແລະ ຍົກລະດັບຄວາມສາມາດແຂ່ງຂັນຂອງກໍາລັງຂົນສົ່ງພາຍໃນໃຫ້ສູງຂຶ້ນ ຕາມທິດພັດທະນາອຸດສາຫະກໍາການຂົນສົ່ງ ແລະ ໂລຊິສຕິກ (ລະບົບການຂົນສົ່ງທີ່ທັນສະໄໝຄົບຊຸດ) ເພື່ອໃຫ້ເຊື່ອມໂຍງຢ່າງເປັນລະບົບກັບພາກພື້ນ ແລະ ສາກົນ” ຊຶ່ງໃນໄລຍະ 5 ປີຜ່ານມາ ກະຊວງໂຍທາທິການ ແລະ ຂົນສົ່ງ(ຍທຂ) ແມ່ນໄດ້ຕັ້ງໜ້າປະກອບສ່ວນຢ່າງໜັກແໜ້ນໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດ.

ສະຫາຍ ວຽງສະຫວັດ ສີພັນດອນ ເລຂາຄະນະບໍລິຫານງານພັກ ກະຊວງ ຍທຂ ໄດ້ປະກອບຄຳເຫັນຕໍ່ກອງປະຊຸມໃຫຍ່ຄັ້ງທີ XI ຂອງພັກ ເມື່ອວັນທີ 13 ມັງກອນຜ່ານມານີ້, ກ່ຽວກັບການເຊື່ອມຈອດດ້ານຄົມມະນາຄົມຂົນສົ່ງ ແລະ ພັດທະນາຄວາມສາມາດ ໃນການຂົນສົ່ງສິນຄ້າຂ້າມແດນວ່າ: 5 ປີຜ່ານມາໄດ້ນໍາພາ-ຊີ້ນໍາຍົກລະດັບ ແລະ ພັດທະນາໂຄງລ່າງພື້ນຖານຄົມມະນາຄົມ-ຂົນສົ່ງ ຊຶ່ງສໍາເລັດ ການກໍ່ສ້າງເສັ້ນທາງ 13 ເໜືອ (ອຸດົມໄຊ-ປາກມອງ), ການສ້ອມແປງທາງເລກ 9 (ສະຫວັນນະເຂດຊາຍແດນຫວຽດນາມ), ກໍ່ສ້າງທາງເລກ 1A (ບຸນເໜືອ-ລານຕຸຍ); ກໍາລັງຈັດຕັ້ງປະຕິບັດໂຄງການ ກໍ່ສ້າງທາງດ່ວນວຽງຈັນ-ບໍ່ເຕັນ, ປັດຈຸບັນໄດ້ສໍາເລັດການກໍ່ສ້າງ ໄລຍະທີ 1 (ນະຄອນຫຼວງວຽງຈັນ-ວັງວຽງ). ນອກນີ້, ຍັງໄດ້ພັດທະນາທາງຫຼວງແຂວງ, ທາງຊົນນະບົດ, ທາງເຂົ້າຫາເຂດເສດຖະກິດ ແລະ ຈຸດສຸມການຜະລິດ, ດ້ວຍການຮ່ວມມືກັບບັນດາຄູ່ຮ່ວມພັດທະນາຕ່າງໆ. ປະຈຸບັນ, ທົ່ວປະເທດມີລະບົບຕາໜ່າງເສັ້ນທາງທັງໝົດ 58.254 ກມ, ທຽບໃສ່ ປີ 2015 ເພີ່ມຂຶ້ນ 1.922 ກມ. ມີເສັ້ນທາງທຽວໄດ້ຕະຫຼອດປີ ໄປເຖິງທຸກເມືອງໃນທົ່ວປະເທດ. ພ້ອມກັນນີ້, ກໍໄດ້ເອົາໃຈໃສ່ບູລະນະຮັກສາ ແລະ ສ້ອມແປງເສັ້ນທາງຕ່າງໆ, ຊຶ່ງໄດ້ນໍາໃຊ້ 80% ຂອງງົບປະມານລົງທຶນຂອງກະຊວງ ແລະ ຍາດແຍ່ງເອົາການຊ່ວຍເຫຼືອຈາກຕ່າງປະເທດ. ນອກຈາກນີ້, ກໍໄດ້ຄົ້ນຄວ້າອອກນິຕິກໍາຄຸ້ມຄອງມາດຖານຂອງບໍລິສັດກໍ່ສ້າງ-ສ້ອມແປງຂົວ-ທາງ ແລະ ບໍລິສັດທີ່ປຶກສາ. ໄດ້ນໍາພາ-ຊີ້ນໍາພັດທະນາດ້ານໂຍທາທາງນ້ໍາ ໂດຍເຊັນສັນຍາການຮ່ວມມືລົງທຶນພັດທະນາ ທ່າທຽບເຮືອຂອງທ່າເຮືອຫວຸງອ່າງ ກັບ ສສ.ຫວຽດນາມ ໃນການເພີ່ມຮຸ້ນໃຫ້ແກ່ ສປປ ລາວ ຈາກ 20% ມາເປັນ 60%, ໄດ້ປັບປຸງເຄື່ອງໝາຍການເດີນເຮືອ ແລະ ສໍາເລັດການສໍາຫຼວດເສດຖະກິດເຕັກນິກ ການປັບປຸງຄອງເດີນເຮືອແຕ່ຫ້ວຍຊາຍຫາຫຼວງພະບາງ ໃຫ້ໄດ້ມາດຕະຖານເຮືອ 500 ໂຕນ ສາມາດ ແລ່ນໄດ້ຕະຫຼອດປີ, ໄດ້ນໍາພາ-ຊີ້ນໍາຍົກສູງຄຸນນະພາບດ້ານການບິນພົນລະເຮືອນ ຊຶ່ງຖືກຮັບຮອງຈາກອົງການ ການບິນພົນລະເຮືອນສາກົນ ກ່ຽວກັບຄວາມປອດໄພການບິນຮອບດ້ານໃນປີ 2015 ແລະ ວຽກງານ ປ້ອງກັນຄວາມປອດໄພການບິນໃນປີ 2018, ໄດ້ສໍາເລັດການກໍ່ສ້າງຂະຫຍາຍອາຄານສະຫນາມບິນ ສາກົນ ວັດໄຕ, ກໍາລັງຈັດຕັ້ງປະຕິບັດໂຄງການກໍ່ສ້າງສະໜາມບິນໜອງຄ້າງ, ຊຶ່ງຄາດວ່າຈະສໍາເລັດ ໃນທ້າຍ ປີ 2021 ແລະ ໂຄງການປັບປຸງກໍ່ສ້າງສະໜາມບິນຫ້ວຍຊາຍ ເພື່ອຍົກລະດັບສິ່ງອໍານວຍຄວາມສະດວກຂອງອາຄານຜູ້ໂດຍສານໃຫ້ທັນສະໄໝເທື່ອລະກ້າວ. ປັດຈຸບັນ, ມີສະໜາມບິນທັງໝົດ 12 ແຫ່ງ. ໃນນັ້ນ, ສະໜາມບິນສາກົນ 4 ແຫ່ງ, ໄດ້ນໍາພາ-ຊີ້ນໍາພັດທະນາດ້ານທາງລົດໄຟ ໂດຍສຸມໃສ່ຈັດຕັ້ງປະຕິບັດໂຄງການກໍ່ສ້າງທາງ ລົດໄຟລາວ-ຈີນ, ມາຮອດປັດຈຸບັນການກໍ່ສ້າງໂຄງລ່າງພື້ນຖານ ປະຕິບັດໄດ້ 94,15% ກໍາລັງຈັດຕັ້ງ ປະຕິບັດໂຄງການກໍ່ສ້າງທາງລົດໄຟເຊື່ອມຕໍ່ລາວ-ໄທ ໄລຍະ II (ຕອນທີ 2) ແຕ່ສະຖານີທ່ານາແລ້ງ, ສະຖານີວຽງຈັນ (ບ້ານຄໍາສະຫວາດ) ປະຕິບັດໄດ້ 21,81%, ພ້ອມກັນນີ້ ກໍໄດ້ເປີດການແລ່ນລົດ ຂົນສົ່ງສິນຄ້າ ລາວ-ໄທ. ໄດ້ນໍາພາ-ຊີ້ນໍາພັດທະນາການຂົນສົ່ງທາງບົກ, ການຂົນສົ່ງຂ້າມແດນ, ການຂົນສົ່ງໂດຍສານ ບັນດາແຂວງໃນຂອບເຂດທົ່ວປະເທດມີທັງໝົດ119 ສາຍທາງ, ລະຫວ່າງ ສປປ ລາວ ກັບບັນດາປະເທດໃກ້ຄຽງ ມີສາຍທາງການແລ່ນລົດໂດຍສານປະຈໍາທາງ ລາວ-ໄທ, ລາວ-ຈີນ, ລາວ-ຫວຽດນາມ ແລະ ລາວ-ກໍາປູເຈຍ ລວມທັງໝົດມີ 81 ສາຍທາງ. ໃນ 5 ປີຜ່ານມາ ການບໍລິການຂົນສົ່ງໂດຍສານເພີ່ມຂຶ້ນ 15%. ໃນນັ້ນ, ບໍລິມາດຂົນສົ່ງໂດຍສານລະຫວ່າງປະເທດໄດ້ 7,5 ລ້ານກວ່າເທື່ອຄົນ ເພີ່ມຂຶ້ນສະເລ່ຍ 4,5% ຕໍ່ປີ.ການຂົນສົ່ງສິນຄ້າ ໄດ້ນໍາໃຊ້ການບໍລິການທ່າບົກ 5 ແຫ່ງຄື: ສະຖານີລົດໄຟທ່ານາແລງ (ນະຄອນຫຼວງວຽງຈັນ), ເຊໂນ (ສະຫັວນນະເຂດ), ວັງເຕົ່າ (ຈໍາປາສັກ), ນາເຕີຍ (ຫຼວງນ້ໍາທາ) ແລະ ທ່າແຂກ (ຄໍາມ່ວນ); ໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການຈັດຕັ້ງປະຕິບັດ ສັນຍາວ່າດ້ວຍການອໍານວຍຄວາມສະດວກແກ່ການຂົນສົ່ງຂ້າມແດນ (ສະບັບທົດລອງ). ພວກເຮົາໄດ້ສືບຕໍ່ເປັນໃຈກາງປະສານສົມທົບກັບພາກສ່ວນຕ່າງໆ ເພື່ອປັບປຸງກົນໄກ ແລະ ຂອດບໍລິການຢູ່ດ່ານຊາຍແດນ, ຕາມສາຍທາງໃຫ້ຄ່ອງຕົວ ແລະ ສ້າງຄວາມໂປ່ງໃສ, ການກວດກາຕ່າງໆ ບໍ່ໃຫ້ຊ້ໍາຊ້ອນກັນ. ອັນພົ້ນເດັ່ນພວກເຮົາໄດ້ເປັນເຈົ້າການຊຸກຍູ້ ແລະ ສ້າງສໍາເລັດດໍາລັດວ່າດ້ວຍ ດ່ານຊາຍແດນ ແລະ ສະໜາມບິນສາກົນ ສະບັບເລກທີ 558/ລບ, ລົງວັນທີ 31 ທັນວາ 2018 ຊຶ່ງເປັນນິຕິກໍາທີ່ສໍາຄັນໃນການຈັດຕັ້ງປະຕິບັດການອໍານວຍຄວາມສະດວກ ໃຫ້ແກ່ການຂົນສົ່ງຜ່ານແດນ ຂອງ ສປປ ລາວ, ໃນ 5 ປີ ຜ່ານມາ ບໍລິມາດການຂົນສົ່ງສິນຄ້າ ເພີ່ມຂຶ້ນ 9,47%.

ສະຫາຍ ກ່າວຕື່ມວ່າ: ເພື່ອສືບຕໍ່ເສີມຂະຫຍາຍທ່າແຮງທາງດ້ານທີ່ຕັ້ງພູມສາດຂອງປະເທດໃຫ້ເກີດຜົນປະໂຫຍດສູງສຸດ ເພື່ອເຊື່ອມໂຍງ ແລະ ເຊື່ອມຈອດກັບປະເທດອ້ອມຂ້າງ, ອະນຸພາກພື້ນ, ພາກພື້ນ ແລະ ສາກົນ ໃນຕໍ່ໜ້າຈະຕ້ອງໄດ້ສຸມໃສ່ດັ່ງນີ້: ພັດທະນາລະບົບຕາໜ່າງເສັ້ນທາງຕາມລະບົບຕາໜ່າງເຊື່ອມໂຍງແບບ 3911 ຄື: ສາຍຕັ້ງ 3 ເສັ້ນ, ສາຍຂວາງ 9 ເສັ້ນ ແລະ ທາງເຊື່ອມຕໍ່ ສາຍຕັ້ງ ແລະ ສາຍຂວາງ 11 ເສັ້ນ ທີ່ໄດ້ຕາມມາດຖານເຕັກນິກຂອງເສັ້ນທາງຫຼວງອາຊຽນ, ສ້າງຂົວຂ້າມນ້ໍາຂອງປາກຕະພານ-ເຂັມມະລາດ, ຂົວຂ້າມນ້ໍາຂອງສໍາລັບທາງລົດໄຟ ນະຄອນຫຼວງວຽງຈັນ-ໜອງຄາຍ, ສຶກສາ, ສໍາຫຼວດ-ອອກແບບ ແລະ ກໍ່ ສ້າງເສັ້ນທາງເຊື່ອມຕໍ່ທີ່ສິ້ນສຸດ ແລະ ມີປະສິດທິຜົນທີ່ສຸດ ລະຫວ່າງ ນະຄອນຫຼວງວຽງຈັນ - ນະຄອນຫຼວງຮ່າໂນ້ຍ ສສ ຫວຽດນາມ; ປັບປຸງລະບົບບູລະນະຮັກສາເສັ້ນທາງດ້ວຍການສ້າງຕັ້ງກອງສ້ອມແປງເສັ້ນທາງ ເປັນປົກກະຕິປະຈໍາແຕ່ລະຕອນທາງຕາມຮູບແບບທຸລະກິດທີ່ເໝາະສົມ, ສູ້ຊົນໃຫ້ສໍາເລັດການກໍ່ສ້າງ ແລະ ດໍາເນີນການບໍລິການ ການຂົນສົ່ງທາງລົດໄຟ ລາວ-ຈີນ; ລະດົມທຶນ ກໍ່ສ້າງເສັ້ນທາງລົດໄຟ ແຕ່ນະຄອນຫຼວງວຽງຈັນ-ທ່າແຂກ-ມູຢາ ແລະ ສຶກສາຄວາມເປັນໄດ້ເສັ້ນທາງລົດໄຟ ແຕ່ທ່າແຂກ-ສະຫວັນນະເຂດ-ຈໍາປາສັກ-ຊາຍແດນ ລາວ-ກໍາປູເຈຍ ແລະ ຈໍາປາສັກ-ວັງເຕົ່າ. ສືບຕໍ່ປັບປຸງເຄື່ອງໝາຍການເດີນເຮືອຕາມລໍາແມ່ນ້ໍາຂອງ, ປັບປຸງຄອງເດີນເຮືອແຕ່ຫ້ວຍຊາຍ ຫາ ຫຼວງພະບາງ ໃຫ້ໄດ້ມາດຕະຖານເຮືອ 500 ໂຕນ ສາມາດແລ່ນໄດ້, ເຊື່ອມຈອດການຄົມມະນາຄົມທາງນ້ໍາ ກັບ ທາງບົກ ດ້ວຍການສ້າງເສັ້ນທາງເຂົ້າເຖິງດ່ານ ແລະ ນໍາໃຊ້ສາງຮ່ວມກັນ, ສ້າງເສັ້ນທາງບິນທີ່ເຊື່ອມຈອດກັບສາກົນ ເພີ່ມຂຶ້ນຕາມຄວາມຕ້ອງການຂອງຕະຫຼາດການບິນ ພາຍໃນ, ລະຫວ່າງປະເທດ ແລະ ການບິນຜ່ານ ໃນແຕ່ລະໄລຍະ; ປັບປຸງສະໜາມບິນສາກົນຢ່າງໜ້ອຍ ໃຫ້ໄດ້ມາດຕະຖານການບໍລິການພື້ນຖານ ຂອງພາກພື້ນ; ສໍາຫຼວດ ແລະ ອອກແບບສະໜາມບິນ ສາກົນແຫ່ງ ໃໝ່ຢູ່ນະຄອນຫຼວງວຽງຈັນ ແລະ ເຊໂນ ເພື່ອສ້າງ ໃຫ້ເປັນສະໜາມບິນທາງຜ່ານຂອງພາກພື້ນ, ຈັດຕັ້ງການບໍລິການໂລຊິສຕິກຕາມ 3 ຍຸດທະສາດຄື: ຍຸດທະສາດການເຕົ້າໂຮມສິນຄ້າ; ຍຸດທະສາດການສົ່ງເສີມພາກທຸລະກິດ ແລະ ຍຸດທະສາດການຂະຫຍາຍຕະຫຼາດຂົນສົ່ງໂດຍນໍາໃຊ້ການ ບໍລິການ ຢູ່ທ່າບົກ 5 ແຫ່ງ ສະຖານີລົດໄຟທ່ານາແລ້ງ, ທ່າແຂກ, ເຊໂນ, ວັງເຕົ່າ ແລະ ນາເຕີຍ. ສົ່ງເສີມບໍລິສັດຂົນສົ່ງສິນຄ້າຂອງລາວ ໃຫ້ກ້າວຂຶ້ນເປັນບໍລິສັດໂລຊິສຕິກ ໃຫ້ໄດ້ຢ່າງໜ້ອຍ 20% ຂອງຈໍານວນ ບໍລິສັດທັງໝົດ, ສ້າງສະມາຄົມຂົນສົ່ງສິນຄ້າ ມີຄວາມສາມາດໃນການຄຸ້ມຄອງທຸກບໍລິສັດຂົນສົ່ງລະຫວ່າງປະເທດ.

(ຂ່າວ-ພາບ: ສຳນານ ພົມພັກດີ)