ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ ຄັ້ງທີ XI ຂອງ​ພັກ, ສະຫາຍ ພັນ​ເອກ ບີ​ມົວ ໄຟ​ດາ​ເຢຍ ຈ່າ ຮອງ​ຜູ້​ອໍາ​ນວຍ​ການ​ໃຫຍ່ ບໍລິສັດ ​ສະ​ຕາ​ໂທລະ​ຄົມ ໄດ້​ປະກອບ​ຄວາມ​ເຫັນ​ຕໍ່​ກອງ​ປະຊຸມ​ຄັ້ງ​ນີ້​ວ່າ: ບໍລິສັດ​ ສະ​ຕາ​ໂທລະ​ຄົມ ແມ່ນ​ບໍລິສັດ​ຮ່ວມ​ທຶນ​ດໍາເນີນ​ທຸລະ​ກິດ ລະຫວ່າງ ລັດຖະບານ​ແຫ່ງ ສປປ ລາວ, ຕາງໜ້າ​ໂດຍ ບໍລິສັດ ລາວ​-​ເອເຊຍ​ໂທລະ​ຄົມ “LAT” ຖື​ຮຸ້ນ 51% ແລະ ລັດຖະບານ ແຫ່ງ ສສ ຫວຽດນາມ ຕາງໜ້າ​ໂດຍ ບໍລິສັດ Viettel Global (VTG) ຖື​ຮຸ້ນ 49% ໄດ້​ເຊັນ​ສັນຍາຮ່ວມ​ທຸລະ​ກິດ ໃນ​ວັນ​ທີ 24 ພະຈິກ 2007 ໄດ້​ສ້າງຕັ້ງ​ເປັນ​ບໍລິສັດ ສະ​ຕາ​ຣ​ໂທລະ​ຄົມ ແລະ ເຄື່ອນ​ໄຫວ​ດໍາ​ເນີນ​ທຸລະ​ກິດ ຢ່າງ​ເປັນ​ທາງ​ການ ໃນ​ວັນ 1 ເມສາ 2008 ແລະ ໃນ​ວັນ​ທີ 16 ຕຸລາ 2009 ບໍລິສັດ​ສະ​ຕາ​​ໂທລະຄົມ ໄດ້​ເປີດ​ໂຕ​ເຄື່ອງໝາຍ​ການ​ຄ້າ ຢູ​ນີ​ເທວ “ Unitel” ຢ່າງ​ເປັນທາງການ.

ພາຍ​ໃຕ້​ການ​ຊີ້​ນໍາ​ໂດຍ ກົງ​ຂອງ​ກະຊວງ​ປ້ອງ​ກັນປະ ເທດ ແລະ ການ​ຊີ້​ນໍາ-ນໍາພາ ຂອງ​ ຄະ​ນະ​ອໍາ​ນວຍການ ບໍລິ ສັດ ​ສະ​ຕາ​​ໂທລະ​ຄົມ ໄດ້​ສຸມ​ໃສ່​ພັດທະນາ​ເຕັກນິກ​ ພື້ນຖານ​ໂຄງ​ລ່າງຂະຫຍາຍເຄືອ​ຂ່າຍ ໄດ້​ຫຼາຍ​ກວ່າ 8.000 ສູນ​ ສະ ຖານີ​ຮັບ​-​ສົ່ງ​ສັນຍານ​ມື​ຖື ກວມ​ເອົາ 93% ຂອງ​ປະຊາກອນ ໃນ​ທົ່ວ​ປະເທດ ທຽບໃສ່​ປີ 2014 ເພີ່ມ​ຂຶ້ນ 2.824 ສະຖານີ ເທົ່າ​ກັບ 35%, ມີ​ປ່ອງ​ບໍລິການ​ກວມ​ເອົາ 100% ຂອງ​ບັນດາ​ເມືອງ​ໃນ​ທົ່ວ​ປະເທດ; ປັບປຸງ​ການ​ຕະຫຼາດ​ໃຫ້​ສອດຄ່ອງ ແລະ ຕອບ​ສະໜອງ​ກັບ​ຄວາມ​ຕ້ອງການ​ຕົວ​ຈິງ​ຂອງ​ຜູ້​ຊົມໃຊ້, ໃຫ້​ບໍລິການ​ລູກ​ຄ້າ​ດ້ວຍ​ຄຸນ​ນະ​ພາບ​ທີ່​ດີ​ທີ່​ສຸດ ແລະ ສ້າງ​ລະບົບ​ເຄືອ​ຂ່າຍ​ໂທລະ​ຄົມ​ທີ່​ທັນ​ສະໄໝ, ສ້າງ​ພາບ​ພົດ​ທີ່​ສະໜິດ​ສະ​ໜົມ​ກັບ​ຜູ້​ຊົມໃຊ້ ດັ່ງ​ວິໄສ​ທັດ​ທີ່​ວ່າ: “ໃຫ້​ຊີວິດທີ່​ ສົດໃສ” ຕະຫຼອດ​ໄລຍະ 11 ປີ ແຫ່ງ​ການ​ພັດທະນາ, ຢູ​ນີເທ​ວ​ ໄດ້​ປະສົບ​ຜົນ​ສໍາ​ເລັດ ກາຍເປັນ​ເຄີອ​​ຂ່າ​ຍ​ໂທລະ​ຄົມ​ທີ່​ນຳ​ໜ້າ​ໃນ​ຕະຫຼາດ​ຂອງ​ລາວ ມີ​ຜູ້​ຊົມໃຊ້​ຫຼາຍ​ກວ່າ 3,3 ລ້ານ​ເລກ​ໝາຍ​ມື​ຖື ແລະ ອິນ​ເຕີ​ເນັດ​ຄວາມ​ໄວ​ສູງ 54.000 ເລກ​ໝາຍ, ຄາດ​ຄະເນ​ລາຍ​ຮັບ​ລວມ​ຍອດ ​ໝົດ​ປີ 2020 ບັນລຸ​ໄດ້ 1,8 ຕື້​ໂດ​ລາ ມອບ​ພັນທະ​ໃຫ້​ລັດຖະບານ 600 ລ້ານ​ໂດ​ລາ ແລະ ຊ່ວຍເຫຼືອ​ສັງ​ຄົມ. ນອກ​ນັ້ນ, ຍັງ​ຊ່ວຍເຫຼືອ​ເປັນ​ວັດຖຸ​ພັນ, ຜະລິດ​ຕະ​ພັນທີ່​ມີ​ມູນ​ຄ່າ​ຫຼວງຫຼາຍ ຊຶ່ງ​ສ້າງ​ວຽກ​ເຮັດ​ງານ​ທໍາ​ໃຫ້​ຄົນ​ລາວ​ໄດ້ 27.000 ກວ່າ​ຄົນ ໃນ​ທົ່ວ​ປະເທດ (ລວມ​ທັງ​ພະນັກງານ​ຂອງ​ຢູ​ນີ​ເທວ 1.500 ກວ່າ​ຄົນ).

ຈາກ​ຜົນ​ສໍາ​ເລັດ​ທີ່​ກ່າວ​ມາ​ຂ້າງ​ເທິງ​ນັ້ນ, ຊຸມ​ປີຜ່ານມາ ຈຶ່ງ​ໄດ້​ຮັບ​ການ​ຍ້ອງຍໍ​ຢ່າງ​ສົມ​ກຽດ ຈາກ​ພັກ​-​ລັດຖະບານ​ຄື: ໄດ້​ຮັບ​ຫຼຽນ​ໄຊ​ພັດທະນາ ຊັ້ນ I ຈໍາ​ນວນ 1 ໜ່ວຍ (ປີ 2019); ຫຼຽນ​ໄຊ​ອິດສະຫຼະ ຊັ້ນ I ຈໍາ​ນວນ 1 ໜ່ວຍ (2019); ຫຼຽນ​ໄຊ​ແຮງ​ງານ ຊັ້ນ II ຈໍາ​ນວນ 1 ໜ່ວຍ (2019). ໃນ​ເວທີສາກົນ ບໍລິສັດ ສະ​ຕາ​​ໂທລະ​ຄົມ ໄດ້​ຮັບ​ລາງວັນ​ເຄືອ​ຂ່າຍ​ໂທລະຄົມ ​ດີເດັ່ນ ຂອງ​ບັນດາ​ປະເທດ​ທີ່​ກໍາ​ລັງ​ພັດທະນາ ປະ​ຈໍາ​ປີ 2012 ແລະ ລາງວັນ​ເຄື່ອງໝາຍ​ການ​ຄ້າ​ໂທລະ​ຄົມທີ່​ດໍາ​ເນີນ​ທຸລະ​ກິດ​ດີເດັ່ນ​ອັນ​ດັບ​ໜຶ່ງ ຂອງ​ບັນດາ​ປະເທດ​ອາຊີ​ຕາເວັນ​ອອກສຽງ​ໃຕ້ ປະ​ຈໍາ​ປີ 2016 ຈາກ​ອົງການ Brand Finance ແລະ ລາງວັນ​ອື່ນໆ ​ອີກ​ຈໍາ ​ນວນ​ໜຶ່ງ.

(ຂ່າວ​-​ພາບ: ກົງ​ມາລີ)