ໜັງສືພິມ ປະຊາຊົນ

ຄະນະບໍລິຫານງານສູນກາງພັກ ສະໄໝທີ XI ວາງກະຕ່າດອກໄມ້ທີ່ຫໍພິພິທະພັນ ປະທານ ໄກສອນ ພົມວິຫານ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 18/01/2021 09:09:21 ຈຳນວນຢ້ຽມຊົມ 3175 ຄັ້ງ

ພາຍຫຼັງການດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ໄດ້ສຳເລັດລົງຢ່າງຈົບງາມ, ຄະນະບໍລິຫານງານສູນກາງພັກ ສະໄໝທີ XI ນຳໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ສະ ໄໝທີ XI ພ້ອມຄະນະ ໄດ້ນຳເອົາກະຕ່າດອກໄມ້ມາວາງ ແລະ ຈັດພິທີສະດຸດີຕໍ່ໜ້າຮູບປັ້ນຫຼໍ່ ປະທານ ໄກສອນ ພົມວິຫານ ໃນວັນທີ 16 ມັງ ກອນນີ້ ທີ່ຫໍພິພິທະພັນປະທານ ໄກສອນ ພົມວິຫານ ເພື່ອສະ ແດງຄວາມເຄົາລົບຮັກ, ກະຕັນ ຍູຮູ້ບຸນຄຸນ ແລະ ລະນຶກເຖິງປະທານ ໄກສອນ ພົມວິຫານ ຜູ້ນຳທີ່ດີເດັ່ນ ແລະ ເຄົາລົບຮັກຂອງພັກ, ຂອງລັດ ແລະ ຂອງປວງຊົນລາວທັງຊາດ, ລູກຜູ້ປະເສີດຂອງປະຊາຊົນລາວບັນດາເຜົ່າ, ວິລະບູລຸດທີ່ປີຊາສາມາດ, ສະຫຼາດສ່ອງໃສ ເວລາໃດ ກໍເປັນແວ່ນແຍງອັນໃສແຈ້ງ, ເປັນແບບຢ່າງທີ່ດີເລີດຂອງທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ຊີວິດ ແລະ ພາລະກິດປະຕິວັດຂອງ ປະທານ ໄກສອນ ພົມວິຫານ ຍືນຍົງຢູ່ໃນດວງໃຈຂອງປວງຊົນລາວທັງຊາດຕະຫຼອດໄປ.

ຈາກນັ້ນ, ສະຫາຍ ທອງລຸນ ສີສຸລິດ ພ້ອມຄະນະ ກໍຍັງໄດ້ເຂົ້າຢ້ຽມຊົມຮູບພາບການເຄື່ອນໄຫວຂອງ ປະທານ ໄກສອນ ພົມວິຫານ ໃນແຕ່ລະໄລຍະຂອງການເຄື່ອນໄຫວພາລະກິດປະຕິວັດ ແລະ ການປົກປັກຮັກສາ, ສ້າງສາພັດທະນາປະເທດຊາດ.

(ຂ່າວ: ສຸກສະຫວັນ)