ບໍ່ແກ້ວ ມອບອຸປະກອນການປ້ອງກັນ ການແຜ່ລະບາດຂອງພະຍາດໂຄວິດ-19 ໃຫ້ບັນດາໂຮງຮຽນ

ເມື່ອບໍ່​ດົນ​ມານີ້, ທ່ານ ວັນດີ ທໍາມະວົງ ຫົວໜ້າພະແນກສຶກສາທິການ ແລະ ກິລາ(ສ​ສກ) ແຂວງບໍ່ແກ້ວ ໄດ້ລົງພົບປະໂອ້ລົມຄູ-ອາຈານ ແລະ ນັກຮຽນ ພ້ອມທັງເອົາອຸປະກອນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໄປມອບໃຫ້ຄູ-ອາຈານ ແລະ ນັກຮຽນ ຢູ່ບັນດາໂຮງຮຽນທີ່ມີຊາຍແດນຕິດຈອດກັບບັນດາປະເທດທີ່ມີການແຜ່ລະບາດຂອງເຊື້ອພະຍາດໂຄວິດ-19 ເປັນຕົ້ນແມ່ນຢູ່ ເມືອງ ຫ້ວຍຊາຍ, ເມືອງ ຕົ້ນເຜິ້ງ ແລະ ເມືອງ ເມິງ.

ຈຸດປະສົງຂອງການລົງພົບປະຄັ້ງ​ນີ້, ເພື່ອເຮັດໃຫ້ການຈັດຕັ້ງປະຕິບັດຕາມແຈ້ງການແນະນໍາຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂອງສູນກາງ ກໍຄືຂອງແຂວງ ໃຫ້ເປັນຮູບປະທໍາ ແລະ ທ່ວງທັນກັບສະພາບການ ພ້ອມທັງເຮັດໃຫ້ຄູ-ອາຈານ, ນັກຮຽນ ທີ່ຢູ່ໂຮງຮຽນເຂດຊາຍແດນຕິດຈອດກັບບັນດາປະເທດ ທີ່ມີການແຜ່ລະບາດຂອງເຊື້ອພະຍາດໂຄວິດ-19  ໄດ້ມີສະຕິລະວັງຕົວໃນການປ້ອງກັນຕົນເອງ ເພື່ອບໍ່ໃຫ້ຕິດເຊື້ອພະຍາດໂຄວິດ-19, ທັງເປັນການສະກັດກັ້ນ ແລະ ຄວບຄຸມພະຍາດດັ່ງກ່າວ ບໍ່ໃຫ້ມີການແຜ່ລະບາດເຂົ້າໃນຂະແໜງການສຶກສາ ກໍຄືແຂວງບໍ່ແກ້ວ.

ອຸປະກອນທີ່ນໍາໄປມອບໃຫ້ແຕ່ລະໂຮງຮຽນໃນຄັ້ງນີ້, ແມ່ນໄດ້ຮັບການແບ່ງປັນຈາກກະຊວງ ສ​ສກ ທີ່ໄດ້ຮັບການຊ່ວຍເຫຼືອຈາກຕ່າງ​ປະ​ເທດ ເພື່ອນໍາໃຊ້ເຂົ້າໃນການປ້ອງກັນ, ສະກັດກັ້ນ ແລະ ຄວບຄຸມການແຜ່ລະບາດຂອງເຊື້ອພະຍາດໂຄວິດ-19 ໃນ ສສປ ລາວ ຊຶ່ງປະກອບມີ ຜ້າອັດປາກ-ອັດດັງ ຈໍານວນ 13.000 ແຜ່ນ, ເຈວລ້າງມື 90 ກ່ອງ ແລະ ເຄື່ອງວັດແທກອຸນຫະພູມ 30 ເຄື່ອງ ລວມເປັນມູນຄ່າທັງໝົດ 60 ​ລ້ານກວ່າກີບ.

(ຂ່າວ: ບຸນຄົງ ວັນນະສິດ)