ບໍ່​ແກ້ວ ຍຶດຢາບ້າໄດ້ 55 ເປົາ

ເມື່ອ​ບໍ່​ດົນ​ມາ​ນີ້, ເຈົ້າໜ້າທີ່ ປກສ ເມືອງ ຕົ້ນເຜິ້ງ ແຂວງບໍ່​ແກ້ວ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ມີການຂົນສົ່ງຢາເສບຕິດຈາກເມືອງຕົ້ນເຜິ້ງ ຫາເມືອງ ຫ້ວຍຊາຍ ແຂວງບໍ່​ແກ້ວ. ດັ່ງນັ້ນ, ທາງເຈົ້າໜ້າທີ່ ປກສ ເມືອງ ຕົ້ນເຜິ້ງ ສົມທົບກັບ ປກສ ແຂວງ ບໍ່ແກ້ວ ລົງຕິດຕາມກວດ​ກາ ເຫັນວ່າມີມູນຄວາມຈິງ ຈຶ່ງໄດ້ເຂົ້າສະກັດຈັບກຸ່ມລົດເປົ້າ ໝາຍຄັນດັ່ງກ່າວ ຢູ່ເສັ້ນທາງສະຫວ່າງບ້ານໃຫຍ່ ຕົ້ນເຜິ້ງ ຫາ ສີເມືອງງາມ ໄດ້ກັກຜູ້ຖືກຫາໄດ້ ຈໍານວນ 4 ຄົນ ຄື:  ທ້າວ ຕົງເຮີ ອາຍຸ 22 ປີ ຊົນເຜົ້າມົ້ງ ຢູ່ບ້ານ ຈຽງຕອງ ເມຶືອງ ປາກທາ, ທ້າວ ຊົວວາ ອາຍຸ 24 ປີ ຊົນເຜົ່າມົ້ງ ຢູ່ບ້ານ ຈຽງຕອງ ເມືອງ ປາກທາ, ທ້າວ ດົງເຮີ ອາຍຸ 19 ປີ, ຊົນເຜົ່າມົ້ງ ບ້ານຈຽງຕອງ  ເມືອງ ປາກທາ, ທ້າວ ໄຊທໍ່ ອາຍຸ 19 ປີ ຊົນເຜົ່າມົ້ງ ບ້ານ ອຸດົມ ເມືອງ ຫ້ວຍຊາຍ ທັງ 4 ຄົນ​ແມ່ນ​ຢູ່​ແຂວງ ບໍ່ແກ້ວ.

ສໍາລັບຂອງກາງ ທາງເຈົ້າໜ້າທີ່​ຢຶດຢາບ້າໄດ້ ມີຈໍານວນ 55 ເປົາ ຫຼື 5.474.000ເມັດ, ລົດໃຫຍ່ 2 ຄັນ, ອີກຄັນໜຶ່ງແມ່ນໄດ້ຫຼົບໜີ, ໂທລະສັບ 8 ໜ່ວຍ, ປືນ 9 ມມ 1 ກະບອກ ພ້ອມລູກ 15 ລູກ, ສາຍຄໍຄໍາ 1 ເສັ້ນ. ສ່ວນຜູ້ຖືກຫາທາງເຈົ້າໜ້າທີ່ຈະໄດ້ທຳການສືບສວນ - ສອບສວນ ເພື່ອຂະຫຍາຍຜົນຕໍ່ໄປ.

ຂ່າວ: ປກສ ເມືອງ ຕົ້ນເຜິ້ງ.