ໜັງສືພິມ ປະຊາຊົນ

ນ້ຳປະປາ ແຂວງຫຼວງພະບາງ ປະກາດນາມມະຍົດ ເປັນສະຫະພັນກໍາມະບານ 5 ເປັນເຈົ້າ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 19/01/2021 13:25:47 ຈຳນວນຢ້ຽມຊົມ 3132 ຄັ້ງ

ລັດວິສາຫະກິດນ້ຳປະປາແຂວງ ໄດ້ຈັດພິທີປະກາດນາມມະຍົດເປັນ ສະຫະພັນກໍາມະບານ 5 ເປັນເຈົ້າ ຄັ້ງທີ 3 ຂຶ້ນເມື່ອບໍ່ດົນມານີ້, ທີ່ຫ້ອງປະຊຸມ ລັດວິສາຫະກິດດັ່ງກ່າວ ໂດຍໃຫ້ກຽດເຂົ້າຮ່ວມຂອງສະຫາຍ ສົມມາລີ ຄໍາເກັ່ງ ກໍາມະການພັກແຂວງ ຄະນະບໍລິຫານງານສູນກາງສະຫະພັນກຳມະບານລາວ ປະທານສະຫະພັນກໍາມະບານແຂວງຫຼວງພະບາງ, ມີສະຫາຍ ສຸລິດ ຈີນດາມະນີ ຄະນະພັກຮາກຖານ ຜູ້ອຳນວຍການລັດວິສາຫະກິດ ນ້ໍາປະປາແຂວງ ພ້ອມດ້ວຍແຂກຖືກເຊີນເຂົ້າຮ່ວມ.

ໃນພິທີສະຫາຍ ສຸລິເດດ ທິດາວັນ ປະທານສະຫະພັນກຳມະບານ ລັດວິສາຫະກິດ ນ້ຳປະປາແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າ ປະຈຳປີ 2019 ແລະ ທິດທາງແຜນການໃນຕໍ່ໜ້າ ຊຶ່ງໄດ້ຕີລາຄາ ສະພາບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ໃນໄລຍະ 1 ປີຜ່ານມາ ສະແດງໃຫ້ເຫັນ ດ້ານດີ-ດ້ານອ່ອນ, ຂໍ້ຄົງຄ້າງ ແລະ ທິດທາງແຜນການໃນຕໍ່ໜ້າ. ຈາກນັ້ນ, ສະຫາຍ ບຸນທະວີ ຜົນສະຫວັດ ຄະນະບໍລິຫານງານສະຫະພັນກຳມະບານແຂວງ ຫົວໜ້າຂະແໜງຂະບວນການແຂ່ງຂັນ-ຍ້ອງຍໍ ສະຫະພັນກຳມະບານແຂວງ ໄດ້ຂຶ້ນຜ່ານຂໍ້ຕົກລົງຂອງສະຫາຍປະທານສະຫະພັນກຳມະບານ ແຂວງຫຼວງພະບາງວ່າດ້ວຍການຮັບຮອງເອົາສະຫະພັນກໍາມະບານ ລັດວິສາຫະກິດນ້ຳປະປາ 5 ເປັນເຈົ້າ ຮອບທີ 3, ໃຫ້ກຽດມອບໃບຢັ້ງຢືນໂດຍສະຫາຍ ສົມມາລີ ຄຳເກັ່ງ.

ໂອກາດນີ້, ສະຫາຍ ສົມມາລີ ຄຳເກັ່ງ ໄດ້ເນັ້ນໜັກເພີ່ມຕື່ມ ກ່ຽວກັບການປະຕິບັດຂໍ້ແຂ່ງຂັນ 5 ເປັນເຈົ້າ ຂອງສູນກາງສະຫະພັນກໍາມະບານລາວ ແລະ ສະຫະພັນກໍາມະບານແຂວງ ໃຫ້ເປັນຂະບວນການຟົດຟື້ນ, ຖືກຕ້ອງຕາມມາດຖານ, ເງື່ອນໄຂ, ຂັ້ນຕອນ, ຕັ້ງໜ້າເອົາໃຈໃສ່ນໍາພາ ຈັດຕັ້ງເຄື່ອນໄຫວຕາມພາລະບົດບາດ, ສິດ ແລະ ໜ້າທີຂອງຕົນ, ການປະສານສົມທົບກັບຂະແໜງການທີ່ກ່ຽວຂ້ອງຢ່າງເປັນປົກກະຕິ.