ເນື່ອງ​ໃນ​ໂອກາດ​ວັນສ້າງຕັ້ງ​ກອງທັບ​ປະຊາຊົນປະຕິວັດ ​ລາວ​ຄົບຮອບ 72 ປີ (20/1/ 1949-20/1/2021) ທີ່​ໝູນວຽນ​ມາ​ອີກ​ວາລະ​ໜຶ່ງ, ໃນ​ຕອນ​ເຊົ້າ​ວັນ​ທີ 20 ມັງກອນ​ນີ້, ການ​ນໍາ​ຂອງ​ແຂວງໄຊ​ຍະ​ບູ​ລີ ນໍາ​ໂດຍ​ທ່ານ ພົງ​ສະຫວັນ ສິດ​ທະ​ວົງ ເຈົ້າແຂວງໄຊ​ຍະ​ບູ​ລີ ປະທານ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ​ແຂວງ ໄດ້​ເຂົ້າ​ວາງພວງ​ມາ​ລາ​ທີ່​ສຸສານ​ທະຫານ, ທັງ​ນີ້​ກໍເພື່ອ​ເປັນ​ການ​ໄວ້​ອາໄລ ແລະ ລະນຶກ​ເຖິງ​ບຸນ​ຄຸນ​-​ຄຸນງາມຄວາມດີ​ຂອງ​ດວງ​ວິນ​ຍານ​ພະນັກ​ງານ​-​ນັກຮົບ​ປະຕິວັດ​ທີ່​ໄດ້​ເສຍ​ສະຫຼະ​ຊີວິດ​ເລືອດ​ເນື້ອ​ໃນ​ປາງ​ສົງຄາມ, ເພື່ອ​ພາລະກິດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ.

ການ​ເຂົ້າ​ວາງ​ພວງ​ມາລາ​ຄັ້ງ​ນີ້, ປະກອບ​ມີ​ກ້ອນ​ການ​ນໍາ​ຂອງ​ແຂວງ, ກໍາ​ລັງ​ປະກອບ​ອາວຸດ, ກ້ອນ​ເຍົາວະ​ຊົນ, ກ້ອນ​ຊາວ​ໜຸ່ມ, ກ້ອນ​ນັກ​ຮຽນ​-​ນັກ​ສຶກ​ສາ, ກຸ່ມ​ເສດຖະກິດ, ກຸ່ມ​ການເມືອງ, ກຸ່ມ​ວັດ​ທະ​ນະ​ທໍາ-​ສັງຄົມ ແລະ ກ້ອນ​ການ​ນໍາ​ເມືອງ​ໄຊ​ຍະ​ບູ​ລີ. ຈາກ​ນັ້ນ, ກໍ​ໄດ້​ເລົ່າຄືນ​ມູນເຊື້ອ​ວັນ​ສ້າງຕັ້ງ ກອງທັບ​ປະຊາຊົນ​ປະຕິວັດ​ລາວ ຄົບຮອບ 72 ປີ​ຕື່ມ​ອີກ, ທີ່​ສະໂມສອນ ກອງ​ບັນຊາ​ການ ທະຫານ​ແຂວງ, ໃຫ້​ກຽດ​ເລົ່າຄືນ​ມູນເຊື້ອ​ໂດຍ​ແມ່ນທ່ານ ພົງ​ສະຫວັນ ສິດ​ທະ​ວົງ, ເຂົ້າ​ຮ່ວມ​ຮັບ​ຟັງ​ມີ​ບັນດານາຍ ແລະ ພົນທະຫານ, ນາຍ ແລະ ພົນ​ຕໍາ​ຫຼວດ, ມີ​ພະນັກງານ​ພາຍ​ໃນ​ກໍາ​ລັງ​ປະກອບ​ອາວຸດ ແລະ ພະນັກງານ​ຫຼັກ​ແຫຼ່ງ​ອ້ອມ​ຂ້າງ​ແຂວງ​ເຂົ້າ​ຮ່ວມ​ທັງ​ໝົດ 200 ກວ່າ​ຄົນ. (ຂ່າວ​-​ພາບ: ອຸ່ນ​ເຮືອນ ໂພທິ​ລັກ)