ໜັງສືພິມ ປະຊາຊົນ

ທ່ານ ທັນສະໄໝ ກົມມະສິດ ຕ້ອນຮັບທູດອາເມລິກາ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 22/01/2021 09:14:54 ຈຳນວນຢ້ຽມຊົມ 2188 ຄັ້ງ

ທ່ານ ທັນສະໄໝ ກົມມະສິດ ລັດຖະມົນຕີກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຕ້ອນຮັບ ທ່ານ ປີເຕີ ເຮມ໋ອນ (Dr. Peter M. Haymond) ເອກອັກຄະລັດຖະທູດຜູ້ມີອຳນາດເຕັມແຫ່ງ ສະຫະລັດ ອາເມຣິກາ ປະຈໍາ ສປປ ລາວເຂົ້າຢ້ຽມຂໍ່ານັບ ໃນວັນທີ 19 ມັງກອນຜ່ານມາ ເພື່ອປຶກສາຫາລືກ່ຽວກັບການເສີມຂະຫຍາຍການຮ່ວມມື ໂດຍສະເພາະດ້ານການພັດທະນາລະບົບຄວາມປອດໄພດ້ານດີຈີຕອນ ແລະ ການລິເລີ່ມໂຄງການ Clean Network.

ໃນໂອກາດນີ້, ທ່ານ ທັນສະໄໝ ກົມມະສິດ ໄດ້ສະແດງຄວາມຕ້ອນຮັບ, ຊົມເຊີຍ ຕໍ່ການເຂົ້າຢ້ຽມຂໍ່ານັບຂອງ ທ່ານ ປີເຕີ ເຮມ໋ອນ. ທັງສອງຝ່າຍໄດ້ປຶກສາຫາລື, ແລກປ່ຽນຄໍາຄິດເຫັນກ່ຽວກັບການພັດທະນາລະບົບຄວາມປອດໄພ ແລະ ການແກ້ໄຂເຫດສຸກເສີນທາງຄອມພິວເຕີໂດຍສັງເຂບ ໂດຍສະເພາະ, ການລິເລີ່ມໂຄງການ Clean Network ຊຶ່ງເປັນໂຄງການປ້ອງກັນຄວາມປອດໄພຂອງຂໍ້ມູນ ເພື່ອໃຫ້ Network ໄດ້ຮັບຄວາມປອດໄພ ແລະ ໄດ້ມາດຕະຖານສູງສຸດ.

ໃນຕອນທ້າຍ, ທ່ານ ປີເຕີ ເຮມ໋ອນ ກໍໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີກະຊວງ ປທສ ໄດ້ສະຫຼະເວລາ ອັນມີຄ່າ ຕ້ອນຮັບການເຂົ້າຢ້ຽມຢາມໃນຄັ້ງນີ້ ຢ່າງອົບອຸ່ນ, ເປັນກັນເອງ ແລະ ໄດ້ມີການແລກປ່ຽນຄຳຄິດຄຳເຫັນ ຢ່າງກົງໄປກົງມາ.

(ພາບ-ຂ່າວ: ປທສ)