ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ລົມໂທລະສັບທາງໄກກັບລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ມານດິວ

ໃນ​ວັນ​ທີ 22 ມັງກອນ 2021, ທ່ານ ສະເຫຼີມ​ໄຊ ກົມ ມະ​ສິດ ລັດຖະມົນຕີ​ກະຊວງ​ການ​ຕ່າງ​ປະເທດ ແຫ່ງ ສປປ ລາວ ໄດ້​ໂອ້​ລົມ​ຜ່ານ​ລະບົບ ​ທາງໄກ ກັບ ​ທ່ານ ອັບ​ດຸນລາ ຊາ​ຮິດ (Abdulla Shahid) ລັດຖະມົນຕີ​ກະຊວງ​ການ​ຕ່າງ ປະເທດ ແຫ່ງ ສາທາລະນະ​ລັດ ມານ​ດິວ ເພື່ອ​ສືບຕໍ່​ຮັດແໜ້ນ​ ສາຍ​ພົວພັນມິດຕະພາບ ແລະ ການ​ຮ່ວມ​ມື​ອັນ​ດີງາມ ລະຫວ່າງ ສອງ​ປະເທດ ລາວ ແລະ ມານ​ດິວ.

ໃນ​ໂອກາດ​ດັ່ງກ່າວ,ທ່ານ ສະເຫຼີມ​ໄຊ ກົມ​ມະ​ສິດ ໄດ້​ຕີ​ລາຄາ​ສູງ​ຕໍ່​ສາຍ​ພົວພັນ​ມິດຕະ ພາບ ແລະ ການ​ຮ່ວມ​ມື​ອັນ​ດີ ລະຫວ່າງ ສອງ​ປະເທດຕະຫຼອດ​ໄລຍະ​ເວລາ 8 ປີຜ່ານມາ, ນັບ​ຕັ້ງແຕ່​ສອງ​ປະເທດ​ໄດ້​ສ້າງຕັ້ງ​ສາຍ​ພົວພັນ​ການ​ທູດ​ນໍາ​ກັນ​ໃນ​ວັນ​ທີ 10 ກຸມພາ 2012 ຜ່ານ​ມາ ຊຶ່ງ​ສະແດງ​ອອກ​ໃນ​ການ​ສະໜັບສະໜູນ​ຊ່ວຍເຫຼືອ ຊຶ່ງ​ກັນ ແລະ ກັນ ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ. ໃນ​ໂອກາດ​ນີ້, ທ່ານ​ລັດຖະມົນຕີ​ຕ່າງປະເທດ ມານ​ດິວ ໄດ້​ສະແດງ​ຄວາມຊົມ ເຊີຍ​ຕໍ່​ຜົນສຳເລັດ​ຂອງ​ກອງ​ປະ ຊຸມ​ໃຫຍ່​ຂອງ​ພັກ​ປະຊາຊົນ​ປະຕິວັດລາວ ຄັ້ງ​ທີ XI ທີ່​ຫາກໍ ສຳເລັດ​ລົງ​ໃນ​ຫວ່າງ​ບໍ່​ດົນ​ຜ່ານ​ມາ ແລະ ຍັງ​ໄດ້​ຊົມເຊີຍ​ທ່ານ​ນາຍົກລັດຖະມົນຕີ ແຫ່ງ ສປປ ລາວ ທີ່​ໄດ້​ຮັບ​ເລືອກ​ຕັ້ງ​ເປັນ​ເລຂາທິການ​ໃຫຍ່ຂອງ​ພັກ​ປະຊາຊົນ ປະຕິວັດ​ລາວ ແລະ ທ່ານ​ລັດຖະມົນຕີ ທີ່​ໄດ້​ຮັບ​ເລືອກ​ຕັ້ງ​ເປັນ ການ​ນໍາ​ຂັ້ນ​ສູງ​ຂອງສູນ​ກາງ​ພັກ​ໃນ​ກອງ​ປະຊຸມ​ໃຫຍ່​ຄັ້ງ​ນີ້. ພ້ອມ​ນີ້, ສອງ​ຝ່າຍ ຍັງ​ໄດ້​ແລກປ່ຽນ​ທັດສະນະ ກ່ຽວ​ກັບ​ການ​ສະກັດ​ກັ້ນ ແລະ ປ້ອງ​ກັນ ການ​ລະບາດ​ຂອງ​ພະຍາດ​ໂຄ​ວິດ-19 ແລະ ປຶກສາ​ຫາລື ກ່ຽວ​ກັບ​ທິດ​ທາງ​ໃນ​ການ​ເສີມ​ຂະ ຫຍາຍ​ການ​ພົວພັນ​ຮ່ວມ​ມື​ສອງ​ ຝ່າຍ ໃນ​ອະ​ນາ​ຄົດ. ນອກຈາກ​ ນີ້, ສອງ​ຝ່າຍ ຍັງ​ໄດ້​ປຶກສາ​ຫາລື ກ່ຽວ​ກັບແຜນການ​ລົງ​ນາມ​ບົດ​ບັນທຶກ​ຄວາມ​ເຂົ້າໃຈ ວ່າ​ດ້ວຍ​ການ​ຮ່ວມ​ມື ລະຫວ່າງ ສອງ​ກະຊວງ​ການ​ຕ່າງປະເທດ​ລາວ ແລະ ມານ​ດິວ ເພື່ອ​ຊຸກຍູ້ ແລະ ສົ່ງເສີມ​ການ​ພົວພັນ​ຮ່ວມ​ມື​ອັນ​ດີ ລະຫວ່າງ​ສອງ​ກະຊວງ​ການ​ຕ່າງປະເທດ ລາວ ແລະ ມານ​ດິວ ໃຫ້​ຂະຫຍາຍຕົວ​ຍິ່ງໆ​ຂຶ້ນ ໃນ​ຊຸມ​ປີ​ຕໍ່​ໜ້າ.

ສອງ​ຝ່າຍ ຍັງ​ໄດ້​ປຶກສາ​ຫາລື​ການ​ຮ່ວມ​ມື ແລະ ເຫັນ​ດີ​ທີ່​ຈະ​ສືບຕໍ່​ໃຫ້ການ​ສະໜັບສະໜູນ ຊຶ່ງ​ກັນ ແລະ ກັນ ທັງ​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ໃນ​ຊຸມ​ປີ​ຕໍ່​ໜ້າ.