ໜັງສືພິມ ປະຊາຊົນ

ຄອບຄົວພົ້ນທຸກ ຍ້ອນການລ້ຽງງົວເປັນຟາມຂາຍ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 25/01/2021 11:34:01 ຈຳນວນຢ້ຽມຊົມ 3196 ຄັ້ງ

ໂດຍ: ສິນທະວົງ ນາກກາລະສິນ

ທ່ານ ຄຳ ຈັນຍະແສງ ອາຍຸ 66 ປີ ປັດຈຸບັນຢູ່ບ້ານກະດັນ ເມືອງມຸນລະປະໂມກ ແຂວງຈຳປາສັກ ໄດ້ເວົ້າສູ່ຟັງວ່າ: ແຕ່ກ່ອນແມ່ນເຮັດແຕ່ນາປູກເຂົ້າ ຫຼັງຈາກເອົາເຂົ້າຂຶ້ນເລົ້າແລ້ວ ແມ່ນບໍ່ໄດ້ເຮັດຫຍັງ ຕື່ມອີກ ມີແຕ່ຖ້າຮອດລະດູການເຮັດນາຈຶ່ງເຮັດ ແຕ່ນາເທົ່ານັ້ນຊີວິດການເປັນຢູ່ໃນຕອນນັ້ນແມ່ນທຸກຍາກ ການກິນຢູ່ຂາດໆເຂີນໆ ດັ່ງນັ້ນ, ຂ້າພະເຈົ້າ ຈຶ່ງໄດ້ປຶກສາຫາລື ແລະ ຕົກລົງກັນກັບຄອບຄົວ ເພື່ອຫັນມາລ້ຽງສັດເປັນອາຊີບເສີມ. ເປັນຕົ້ນລ້ຽງ ງົວຂາຍ ຍ້ອນເຫັນໄດ້ວ່າສະ ພາບແວດລ້ອມຢູ່ບ້ານກະດັນນີ້ເໝາະສົມ ເປັນຕົ້ນມີທົ່ງຫຍ້າທີ່ອຸດົມສົມບູນ ເໝາະແກ່ການລ້ຽງສັດ ໂດຍເລີ່ມແຕ່ປີ 2000 ຂ້າພະເຈົ້າໄດ້ເລີ່ມຊື້ງົວແມ່ພື້ນບ້ານມາລ້ຽງ 10 ໂຕ ແລະ ງົວໂຕຜູ້ 3 ໂຕ, ລວມ 13 ໂຕ, ໃນລາຄາທັງໝົດ 90 ລ້ານກີບ ໃຊ້ທຶນຂອງຕົນເອງ ໂດຍນຳໃຊ້ເນື້ອທີ່ລ້ຽງ 2 ເຮັກຕາ. ມາຮອດປີ 2010 ຂ້າພະເຈົ້າ ມີງົວເພີ່ມຂຶ້ນ 30 ກວ່າໂຕ. ຫຼັງຈາກນັ້ນ ມາຮອດປີ 2015-2016 ທາງຫ້ອງການກະສິກຳ - ປ່າໄມ້ເມືອງ ໄດ້ລົງ ມາແນະນຳວິທີການລ້ຽງງົວ ດ້ວຍການເຮັດເປັນຟາມ, ລ້ຽງ ແບບໃຊ້ເຕັກນິກວິທະຍາສາດ -ວິທະຍາການເຂົ້າຊ່ວຍ, ພ້ອມກັນນັ້ນ ພະນັກງານວິຊາການຂອງເມືອງກໍໄດ້ລົງມາໃກ້ ຊິດຕິດແທດແນະນຳໃນການ ດູແລບົວລະບັດຮັກສາ, ການ ສັກ ຢາປ້ອງກັນພະຍາດລົງເລັບ, ພະຍາດປາກເປື່ອຍ ແລະ ພະຍາດທ້ອງເບັງ ປີໜຶ່ງຈະໄດ້ຮັບການຊ່ວຍເຫຼືອດ້ານການສັກຢາປ້ອງກັນພະຍາດ 2 ຄັ້ງຄື: ໃນເດືອນມິຖຸນາ ແລະ ເດືອນທັນວາ. ປັດຈຸບັນ, ຂ້າພະເຈົ້າມີງົວຢູ່ 320 ໂຕ. ສໍາລັບການຂາຍງົວ ແມ່ນຈະຂາຍແຕ່ງົວໂຕ ບໍ່ງາມອອກ ໃນລາຄາ 3.000.000 ກີບ ແລະ ຄັດໂຕງາມເປັນພໍ່ພັນແມ່ ພັນ, ປີໜຶ່ງແມ່ນໄດ້ຂາຍງົວ ອອກ ປະມານ 20 ຫາ 22 ໂຕ, ສ້າງລາຍຮັບເຂົ້າຄອບຄົວສະເລ່ຍປະມານ 65 ລ້ານກີບຕໍ່ປີ.

ທ່ານ ຄຳ ຈັນຍະແສງ ຍັງໄດ້ເວົ້າໃຫ້ຟັງຕື່ມອີກວ່າ: ໃນອະນາຄົດ ຈະຂະຫຍາຍຄອກງົວຕື່ມອີກ 2 ເຮັກຕາ ແລະ ຈະ ຂະຫຍາຍງົວຕື່ມອີກ ຈົນສາ ມາດຂາຍອອກຕ່າງປະເທດໄດ້. ສັງລວມແລ້ວ ພາຍຫຼັງທີ່ໄດ້ຫັນມາລ້ຽງງົວຂາຍເປັນອາຊີບເສີມ ເຫັນໄດ້ວ່າຊີວິດການເປັນຢູ່ຂອງຄອບຄົວມີການຫັນປ່ຽນດີຂຶ້ນ ຈາກຄອບຄົວທີ່ຂາດໆເຂີນໆກາຍມາເປັນຄອບຄົວມີຢູ່ມີກິນ ແລະ ໄດ້ຫຼຸດພົ້ນອອກຈາກຄວາມທຸກຍາກ. ເປັນຕົ້ນ ແມ່ນໄດ້ສ້າງເຮືອນຢູ່ຖາວອນ, ມີເງິນຊື້ລົດໄຖ, ຊື້ລົດຕູ້, ມີເງິນໃຊ້ຈ່າຍພາຍໃນຄອບຄົວ, ມີເງິນສົ່ງລູກຮຽນໜັງສື ແລະ ມີເງິນຝາກທະນາຄານຈຳນວນໜຶ່ງ. ປັດຈຸບັນນີ້ ຄອບຄົວຂອງຂ້າພະເຈົ້າ ໄດ້ກາຍເປັນຕົວແບບດ້ານການລ້ຽງງົວຂາຍເປັນສິນຄ້າຢູ່ບ້ານກະດັນ ເມືອງມຸນລະປະໂມກ ແຂວງຈຳປາສັກ.

ທ່ານ ທອງສຸກ ບົວລະພາ ຫົວໜ້າໜ່ວຍງານລ້ຽງສັດ ແລະ ການປະມົງ ສັງກັດຢູ່ຫ້ອງການກະສິກຳ-ປ່າໄມ້ເມືອງມຸນລະປະໂມກ ໄດ້ຢັ້ງຢືນຕື່ມອີກວ່າ: ກ່ຽວກັບຄອບຄົວຂອງທ່ານ ຄຳ ຈັນຍາແສງ ເປັນຄອບຄົວໜຶ່ງ ທີ່ມັກຮັກໃນການລ້ຽງສັດປັດຈຸ ບັນ, ທ່ານໄດ້ເປັນຄອບຄົວຕົວແບບໃຫ້ແກ່ບ້ານໃຫ້ ແກ່ເມືອງ. ດັ່ງນັ້ນ, ມາຮອດປີ 2015-2016 ພັກ-ລັດເຮົາ ໂດຍສະ ເພາະແມ່ນທາງອຳນາດການປົກຄອງເມືອງມຸນລະປະໂມກ ໄດ້ລົງໄປຊຸກຍູ້ຊີ້ນຳ ແລະ ປຸກ ລະດົມໃຫ້ປະຊາຊົນບັນດາເຜົ່າ ຫັນມາປູກຝັງ-ລ້ຽງສັດໃຫ້ເປັນສິນຄ້າ. ໃນນາມຕາງໜ້າໃຫ້ອຳນາດການປົກຄອງເມືອງ ຂ້າພະເຈົ້າເຫັນວ່າ ປັດຈຸບັນຄອບຄົວຂອງທ່ານ ຄຳ ຈັນຍະແສງ ມີງົວ 320 ໂຕ ຊຶ່ງເປັນທ່າແຮງອັນໜຶ່ງໃນການສ້າງເສດຖະກິດ ເຮັດໃຫ້ການລ້ຽງສັດຂອງຕົນ ຂະຫຍາຍຕົວຂຶ້ນເລື້ອຍໆກາຍ ເປັນແບບຢ່າງການລ້ຽງສັດໃຫ້ແກ່ຄອບຄົວອື່ນໆ.