ໜັງສືພິມ ປະຊາຊົນ

ສະຫຼຸບຖອດຖອນບົດຮຽນ ວຽກງານວິຊາສະເພາະ 5 ປີຜ່ານມາ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 26/01/2021 09:41:17 ຈຳນວນຢ້ຽມຊົມ 2131 ຄັ້ງ

ໃນວັນທີ 25 ມັງກອນນີ້, ຄະນະກວດກາສູນກາງພັກ ແລະ ອົງການກວດກາລັດຖະ ບານ ໄດ້ຈັດກອງປະຊຸມສະຫຼຸບຖອດຖອນບົດຮຽນວຽກງານ ວິຊາສະເພາະໃນໄລຍະ 5 ປີ ຜ່ານມາ ເພື່ອປັບປຸງການຈັດ ຕັ້ງປະຕິບັດວຽກງານວິຊາສະ ເພາະຂອງແຕ່ລະກົມໃນຕໍ່ໜ້າ ຂຶ້ນ ທີ່ສະໂມສອນຂອງຄະນະກວດກາສູນກາງພັກ ແລະ ອົງການກວດກາລັດຖະບານ (ຄກສພ-ອກລ)ໂດຍການເປັນປະທານຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຜູ້ປະຈໍາການຄະນະເລຂາ ທິການສູນກາງພັກ ຮອງນາຍົກ ລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີສະຫາຍ ວິໄລວັນ ບຸດດາຄໍາ ກໍາມະການສໍາຮອງສູນກາງພັກ, ມີຄະນະປະຈໍາພັກ, ຄະນະພັກ, ຫົວໜ້າກົມ-ຮອງກົມ ແລະ ພະ ນັກງານຫຼັກແຫຼ່ງທົ່ວອົງການເຂົ້າຮ່ວມຢ່າງພ້ອມພຽງ.

ໂອກາດນີ້ ສະຫາຍ ສີໄນ ມຽງລາວັນ ຮອງເລຂາຄະນະພັກຮອງປະທານຄະນະກວດກາສູນກາງພັກ ແລະ ອົງການກວດກາລັດຖະບານ ໄດ້ຂຶ້ນຜ່ານຮ່າງບົດສະຫຼຸບ ຖອດຖອນບົດຮຽນວຽກງານວິຊາສະເພາະ ແລະ ການປັບປຸງພາຍໃນ ໄລຍະ 5 ປີຜ່ານມາ ແລະ ທິດທາງ ວິທີການປັບປຸງແກ້ໄຂຕໍ່ໜ້າ ຊຶ່ງໄດ້ຍົກໃຫ້ເຫັນດ້ານດີທີ່ຕັ້ງໜ້າຜົນງານການເຄື່ອນໄຫວໄລຍະ 5 ປີຜ່ານມາ, ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງຕ້ອງປັບປຸງແກ້ໄຂໃນຕໍ່ໜ້າ. ພ້ອມນັ້ນ, ປະທານກອງປະຊຸມໄດ້ມີຄໍາເຫັນ ເຈາະຈີ້ມບາງເນື້ອໃນເພື່ອເຮັດໃຫ້ການປະກອບຄໍາເຫັນຕໍ່ເນື້ອໃນບົດສະຫຼຸບຖອດຖອນບົດຮຽນສະແດງອອກໃຫ້ເຫັນເຖິງການຈັດຕັ້ງປະຕິບັດຕົວຈິງ, ເພື່ອປັບປຸງການຈັດຕັ້ງປະຕິບັດວຽກງານໃຫ້ມີປະສິດທິຜົນສູງ. ຈາກນັ້ນ, ບັນດາກົມ ແລະ ຜູ້ເຂົ້າຮ່ວມກອງປະຊຸມໄດ້ພ້ອມກັນ ປະກອບຄໍາຄິດຄໍາເຫັນຢ່າງກົງໄປກົງມາອັນໄດ້ເຮັດໃຫ້ເນື້ອໃນບົດສະຫຼຸບຄົບຖ້ວນສົມບູນ ສ່ອງແສງໃຫ້ເຫັນໄດ້ດ້ານດີ, ດ້ານອ່ອນຂໍ້ຄົງຄ້າງ ແລະ ວິທີແກ້ໄຂໃນຕໍ່ໜ້າ.

ຕອນທ້າຍກອງປະຊຸມໄດ້ຮັບຟັງການໂອ້ລົມຂອງສະຫາຍ ບຸນທອງ ຈິດມະນີ ໂດຍສະຫາຍໄດ້ເນັ້ນໃຫ້ຄະນະ ພັກ, ຄະນະນໍາ, ຄະນະກົມ ຕ້ອງຖືເອົາການສຶກສາອົບຮົມການເມືອງແນວຄິດເປັນກົກ ດ້ວຍຫຼາຍຮູບການ, ຫຼາຍວິທີ ແລະ ແທດເໝາະກັບເປົ້າໝາຍ; ຕ້ອງກຳແໜ້ນທັດສະນະຂອງພັກກ່ຽວກັບວຽກງານຕິດຕາມ, ກວດກາພັກ, ກວດກາລັດຖືວຽກງານນີ້ເປັນໜຶ່ງໃນພາລະບົດບາດການນໍາພາຂອງ ພັກ ແລະ ຄວາມຮັບຜິດຊອບໂດຍກົງຂອງຄະນະພັກ;ຕ້ອງ ເອົາໃຈໃສ່ເປັນພິເສດຕໍ່ວຽກ ງານບໍາລຸງ, ກໍ່ສ້າງພັກ-ພະນັກ ງານ, ສະມາຊິກພັກໃນດ້ານການເມືອງແນວຄິດ, ຄຸນທາດການເມືອງ ແລະ ຄຸນສົມບັດສິນທຳປະຕິວັດ; ຕ້ອງມີແບບແຜນນໍາພາ ແລະ ວິທີເຮັດວຽກວິທະຍາສາດ, ຢຶດໝັ້ນຫຼັກການລວມສູນປະຊາທິປະໄຕ, ຕົກລົງເປັນໝູ່ຄະນະ, ແບ່ງງານແບ່ງຄວາມຮັບຜິດຊອບໃຫ້ບຸກຄົນຈະແຈ້ງ; ການດຳເນີນກວດກາຕໍ່ເປົ້າໝາຍໃດໜຶ່ງຕ້ອງມີການ ຄົ້ນຄວ້າເລືອກເຟັ້ນເອົາພະນັກ ງານ ໂດຍສະເພາະຜູ້ເປັນຫົວ ໜ້າຕ້ອງເປັນຜູ້ທີ່ມີຄວາມຮູ້, ຄວາມສາມາດ, ມີຄຸນສົມບັດ, ສັດຊື່ບໍລິສຸດ, ມີບົດຮຽນ ແລະ ມີປະສົບການ; ຕ້ອງມີການຕິດ ຕາມ, ກວດກາ ແລະ ປະເມີນ ຜົນດ້ານການຝຶກຝົນຫຼ່ໍຫຼອມ ດ້ານຄຸນທາດການເມືອງ, ຄຸນ ສົມບັດສິນທຳປະຕິວັດ, ແບບ ແຜນດຳລົງຊີວິດ, ການປະຕິບັດໜ້າທີ່ວຽກງານວິຊາສະເພາະຂອງພະນັກງານເປັນປົກກະຕິ, ແທດຕົວຈິງ ແລະ ຄະນະພັກ, ສະມາຊິກພັກ, ພະ ນັກງານທີ່ມີຜົນສໍາເລັດ, ມີຜົນ ງານທີ່ດີເດັ່ນຕ້ອງມີການຍ້ອງຍໍສັນລະເສີນທັນເວລາ. ພ້ອມນັ້ນ ຜູ້ເຮັດວຽກງານບໍ່ຫຼ້ອນໜ້າທີ່, ລະເມີດລະບຽບວິໄນຂອງພັກ, ກົດໝາຍຂອງລັດ ຕ້ອງສໍາຫຼວດກວດກາ ແລະ ລົງວິໄນຕາມກົດລະບຽບຂອງພັກ ແລະ ກົດໝາຍຂອງລັດ. (ຂ່າວ: ນາງ ສີອາມອນ ໄຍຮຽງອ່ອນ)

ຂ່າວທີ່ໄດ້ຮັບຄວາມນິຍົມ