ເມືອງປະທຸມພອນຈັດງານປະກວດສິລະປະ

   ຫ້ອງການສຶກສາທິການ ແລະ ກິລາ ເມືອງປະທຸມພອນ ແຂວງ​ຈຳ​ປາ​ສັກ ໄດ້ຈັດງານ ປະກວດສິລະປະຂຶ້ນໃນວັນທີ 16 ກຸມພາຜ່ານ​ມາ ທີ່ເດີ່ນຫ້ອງການເມືອງດັ່ງກ່າວ ພາຍໃຕ້ການ ເປັນປະທານຂອງທ່ານ ວິທະຍາ ໜື່ນວິເສດ ຄະນະຫ້ອງການສຶກສາທິການ ແລະ ກິລາເມືອງ, ທ່ານ ນາງ ມະໂນໄມ ສິງດອນຖານ ຄະນະຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ມີບັນ ດາຜູ້ບໍລິຫານການສຶກສາ 10 ກຸ່ມການສຶກສາ, ໂຮງຮຽນ, ຄູ-ອາຈານ ແລະ ນັກຮຽນເຂົ້າຮ່ວມ.

     ງານແຂ່ງຂັນປະກວດສິລະປະໃນຄັ້ງນີ້, ແມ່ນເພື່ອເປັນການສ້າງຂະບວນການ ການຮຽນ-ການສອນ, ການສະແດງຄວາມຮູ້, ຄວາມສາມາດດ້ານສິລະປະ, ພອນສະຫວັນຂອງນັກຮຽນ ແລະ ເພື່ອຂໍ່ານັບຮັບຕ້ອນວັນສໍາຄັນຕ່າງໆ ເປັນຕົ້ນການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມະຊິກສະພາປະຊາຊົນແຂວງຊຸດທີ II ທີ່ຈະໄຂຂຶ້ນໃນທ້າຍເດືອນກຸມພານີ້.

 ການປະກວດສິລະປະຄັ້ງນີ້, ແບ່ງອອກເປັນ 3 ກຸ່ມຄື: ກຸ່ມການສຶກສາ (ປະຖົມ) ມີ 10 ໂຮງ​ຮຽນ; ​ກຸ່ມມັດທະຍົມຕອນຕົ້ນມີ 4 ໂຮງຮຽນ; ກຸ່ມມັດທະຍົມຕອນປາຍມີ 8 ໂຮງຮຽນ ຜົນການ ແຂ່ງຂັນທີມທີ່ໄດ້ຊະນະເລີດໄດ້ແກ່ ກຸ່ມການສຶກສາໄດ້ທີໜຶ່ງ ກຸ່ມຫຼັກ 40, ທີສອງ ກຸ່ມບ້ານມ່ວງ, ທີ​ສາມ ກຸ່ມສະໂນດ. ມັດທະຍົມຕອນຕົ້ນ: ​ທີ​ໜຶ່ງ ມຕ ນໍ້າອ້ອມ, ​ທີ​ສອງ ມຕ ພະລາຍ, ທີ​ສາມ ມຕ ຄອນທູດ. ມັດທະຍົມຕອນປາຍ ທີ​ໜຶ່ງ ມປ ຫຼັກ 40, ທີ​ສອງ ມປ ບ້ານບຸ່ນ, ທີ​ສາມ ມປ ບັງລຽງ. 

   (ຂ່າວ-ພາບ : ຖວທ ປະທຸມພອນ)