ໜັງສືພິມ ປະຊາຊົນ

ອາເມຣິກາ ຈະຈ່າຍເງິນອຸດໜູນ 200 ລ້ານໂດລາໃຫ້ WHO

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 21/02/2021 10:29:27 ຈຳນວນຢ້ຽມຊົມ 302 ຄັ້ງ

ຂ່າວສານຊີອາໄອລາຍງານວ່າ: ວັນທີ 17 ກຸມພາຜ່ານມາ, ທ່ານ ອັນໂຕນີ ບລິນເກນ ລັດຖະມົນຕີກະຊວງການຕ່າງປະເທດອາເມຣິກາ ກ່າວວ່າ: ອາເມຣິກາ ຈະຈ່າຍເງິນອຸດໜູນ 200 ລ້ານໂດລາ ໃຫ້ WHO ຊຶ່ງລວມທັງເງິນອຸດໜູນທີ່ຄ້າງໄວ້ໃນໄລຍະທີ່ ທ່ານ ໂດໂນ ທຣຳ ອະດີດປະທານາທິບໍດີອາເມຣິກາ ຄອງອຳນາດ.

ທ່ານ ອັນໂຕນີ ບລິນເກນ ໄດ້ກ່າວໃນເວລາເຂົ້າຮ່ວມກອງປະຊຸມສະພາຄວາມໝັ້ນຄົງອົງການສະຫະປະຊາຊາດ (ສປຊ) ແບບທາງໄກ. ທ່ານ ຍັງໃຫ້ຄຳໝັ້ນສັນຍາວ່າ: ລັດຖະບານ ໂຈ ໄບເດັ່ນ ຜູ້ນໍາອາເມຣິກາ ຈະຮ່ວມມືກັບປະຊາຄົມໂລກ ໃນການຕ້ານກັບການແຜ່ລະບາດຂອງພະຍາດໂຄວິດ-19.

ຂ່າວແຈ້ງວ່າ: ທ່ານ ໂດໂນ ທຣຳ ໄດ້ໂຈະການຈ່າຍເງິນອຸດໜູນຂອງ ອາເມຣິກາ ໃຫ້ແກ່ WHO ໃນເດືອນເມສາປີ 2020 ແລະ ໄດ້ຖອນຕົວອອກຈາກອົງການດັ່ງກ່າວ ໃນເດືອນກໍລະກົດປີດຽວກັນ. ວັນທີ 20 ມັງກອນປີນີ້, ພາຍຫຼັງ ທ່ານໂຈ ໄບເດັນ ປະທານາທິບໍດີອາເມຣິກາ ຄົນໃໝ່ ສາບານຕົວຂຶ້ນດຳລົງຕຳແໜ່ງ, ທ່ານ ໄດ້ປະກາດຫຼາຍມາດຕະການກ່ຽວກັບແຜນການບໍລິຫານເຊັ່ນ: ອາເມຣິກາ ຈະກັບຄືນເຂົ້າເປັນສະມາຊິກ WHO ແລະ ອື່ນໆ.