ໂດຍ: ແສງຈັນ

ປະ​ຊາ​ຊົນບ້ານສີບຸນເຮືອງ ເມືອງຈັນທະບູລີ ນະຄອນຫລວງວຽງຈັນ ຕື່ນຕົວອອກໄປໃຊ້ສິດປ່ອນບັດ ເລືອກຕັ້ງ ເອົາ​ສະມາຊິກສະພາແຫ່ງຊາດ (ສສຊ) ຊຸດທີ IX​ ແລະ ​ສະມາຊິກສະພາປະຊາຊົນນະ​ຄອນຫຼວງວຽງ​ຈັນ ຊຸດທີ II​, ໃນວັນທີ 21 ກຸມພານີ້.

     ໃນໂອກາດນີ້, ທ່ານ ແສງເດືອນ ຄົງສຸວັນຄຳ ເລຂາພັກບ້ານ ນາຍບ້ານໆສີບຸນເຮືອງ ໄດ້ໃຫ້ສໍາພາດ ວ່າ: ການປ່ອນບັດພາຍໃນບ້ານສີບຸນເຮືອງ ແມ່ນຈັດຢູ່ວັດບ້ານສີບຸນເຮືອງ, ປະກອບມີຈໍານວນພົນທັງໝົດ 1.965 ຄົນ  ຍິງມີ 1.010 ຄົນ ໃນນັ້ນ ມີຜູ້ມີສິດປ່ອນບັດເລືອກຕັ້ງ 1.505 ຄົນ ເປັນຍິງ 884 ຄົນ; ການເລືອກຕັ້ງຄັ້ງນີ້ ໄດ້ດໍາເນີນໄປດ້ວຍບັນຍາກາດຟົດຟື້ນ ເຫັນປະຊາຊົນພາຍໃນບ້ານໄດ້ໃຫ້ການຮ່ວມມືເປັນຢ່າງດີ ແລະ ໄດ້ ພ້ອມພຽງຮຽງໜ້າກັນ ມາໃຊ້ສິດປ່ອນບັດຄັດເລືອກເອົາ ສສຊ ແລະ ສສຂ​ ດ້ວຍຄວາມເຕັມໃຈ ແລະ ມີຄວາມຮັບຜິດຊອບສູງ.

      ແມ່ຕູ້ ມະນີຈັນ ລັດຕະນະມຸງຄົນ ​ປະ​ຊາ​ຊົນ​ບ້ານ​ສີ​ບຸນ​ເຮືອງ ໄດ້ສະແດງຄວາມຮູ້ສຶກອອກມາວ່າ: ປີນີ້, ເຖິງວ່າອາຍຸຈະ 86 ປີແລ້ວກໍຕາມ  ແຕ່ແມ່ຕູ້ກໍແຂງແຮງດີ ແລະ ມີຄວາມຮູ້ສຶກ ດີໃຈຫຼາຍທີ່ອອກ​ມາ​ໃຊ້​ສິດ​ຂອງ​ຕົນ ເພື່ອ​ເລືອກ​ເອົາ​ຕົວ​ແທນ​ແຫ່ງ​ສິດ​ຜົນ​ປະ​ໂຫຍດ​ຂອງ​ປະ​ຊາ​ຊົນ, ການເລືອກຕັ້ງ ມັນເໝືອນກັບປາງບຸນໃຫຍ່ຂອງຊາດ ປວງຊົນລາວຈຶ່ງໄດ້ຕື່ນຕົວພ້ອມພາກັນມາປ່ອນບັດເລືອກເອົາຜູ້ທີ່ເປັນຕົວແທນຂອງປະຊາຊົນ​ເຂົ້າ​ໄປ​ໃນ​ສະ​ພາ ເພື່ອ​ພິ​ຈາ​ລະ​ນາ ແລະ ສະ​ເໜີ​ຄຳ​ຄິດ​ເຫັນ, ຄວາມ​ເດືອດ​ຮ້ອນ​ຂອງ​ປະ​ຊາ​ຊົນ ໃຫ້​ພາກ​ສ່ວນ​ກ່ຽວ​ຂ້ອງ​ໄດ້​ພິ​ຈາ​ລະ​ນາ​ແກ້​ໄຂ.

      ທ່ານ ນາງ ມະລີຈັນ ຊະນະນິຄົມ ​ປະ​ຊາ​ຊົນ​ບ້ານ​ສີ​ບຸນ​ເຮືອງ ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈຫຼາຍ ທີ່ໄດ້ເຮັດໜ້າທີ່ເປັນພົນລະເມືອງລາວທີ່ດີ ກໍຄືການໄປໃຊ້ສິດຂອງຕົນ ເລືອກເອົາຜູ້ແທນປະຊາຊົນເຂົ້າໄປເຮັດວຽກໃນສະພາ ເພື່ອປະກອບສ່ວນພັດທະນາປະເທດຊາດ, ເພື່ອສິດ ແລະ ຜົນປະໂຫຍດອັນຊອບທໍາມາສູ່ປວງຊົນລາວ, ໂດຍສະເພາະ ນໍາເອົາສິດຜົນປະໂຫຍດມາສູ່ ແມ່ຍິງ ແລະ ເດັກນ້ອຍ ໃຫ້ໄດ້ຮັບການສຶກສາຮໍ່າຮຽນ, ຍົກລະດັບຊີວິດການເປັນຢູ່ ໃຫ້ດີຂືຶ້ນເລື້ອຍໆ. 

ທ່ານ ນາງ ລັດຕະນະວັນ ວົງຈັນດີ, ສະແດງຄວາມຮູ້ສຶກອອກມາວ່າ: ດີໃຈຫຼາຍ ທີ່ໄດ້ມາໃຊ້ສິດຂອງຕົນເລືອກຕັ້ງເອົາຜູ້ແທນຂອງປະຊາຊົນ ກໍຄື ຜູ້ແທນທີ່ຕົນມັກ ເຂົ້າໄປເຮັດວຽກໃນສະພາ ເພື່ອພັດທະນາໜ້າທີ່ວຽກງານທີ່ປະຊາຊົນໄດ້ມອບໝາຍໃຫ້ ນັ້ນກໍຄື ຜົນປະໂຫຍດລວມຂອງປະຊາຊົນລາວບັນດາເຜົ່າໃຫ້ໄປສູ່ ຄຸນນະພາບທີ່ດີ.

 ທ່ານ ຄໍາສີ ຈື່ໝັ້ນ ອາຍຸ 25 ປີ ກໍລັງສຶກສາຢູ່ວິທະຍາໄລສິລະປະສຶກສາ, ສະແດງຄວາມຮູ້ສຶກອອກມາວ່າ: ການປ່ອນບັດຄັ້ງນີ້ ສໍາລັບຂ້າພະເຈົ້າ ແມ່ນເປັນຄັ້ງທີສອງ,  ມີຄວາມຮູ້ສຶກເປັນກຽດຢ່າງຍິ່ງ ທີ່ໄດ້ມາປ່ອນບັດເລືອກເອົາຕົວແທນຂອງຕົນເຂົ້າໄປເຮັດວຽກໃນສະພາ ເພື່ອຈະນໍາເອົາຜົນປະໂຫຍດທີ່ດີ ມາພັດທະນາວຽກງານການສຶກສາ (ການຮຽນ-ການສອນ) ໄປສູ່ເຂດຫ່າງໄກສອກຫຼີກຢ່າງທົ່ວເຖິງ ແລະ ເຮັດໃຫ້ວຽກງານການສຶກສາໄດ້ຮັບການພັດທະນາ ຍິ່ງໆຂຶ້ນ.

ທ່ານ ນາງ ລິດດາ ທະວີວັນ, ອາຍຸ 22 ປີ, ກໍາລັງສຶກສາທີ່ ວິທະຍາໄລ ສິລະປະສຶກສາ ກ່າວວ່າ: ການເລືອກຕັ້ງຄັ້ງນີ້ ເປັນຄັ້ງທໍາອິດ ທີ່ຕົນເອງ ໄດ້ໃຊ້ສິດເລືອກຕັ້ງ  ຮູ້ສຶກຕື່ນເຕັ້ນ ແລະ ມີຄວາມພູມໃຈຫຼາຍ ທີ່ໄດ້ອອກມາໃຊ້ສິດ ເພື່ອເລືອກເອົາຜູ້ແທນຂອງຕົນ ຊຶ່ງເປັນຜູ້ແທນທີ່ຕົນມັກ ຕ້ອງເປັນຄົນທີ່ມີຄວາມຮູ້, ຄວາມສາມາດ, ຜູ້ທີ່ມີຄວາມຊື່ສັດບໍລິສຸດ ຕໍ່ພັກ, ຕໍ່ລັດ, ຕໍ່ປະເທດຊາດ  ແລະ ພ້ອມທີ່ຈະນຳພາປະເທດຊາດ ກ້າວໄປສູ່ຄວາມຈະເລີນກ້າວໜ້າຢ່າງບໍ່ຢຸດຢັ້ງ.

       ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແມ່ນຂະບວນການປະຕິບັດໜ້າທີ່ການເມືອງ ແລະ ສິດປະຊາທິປະໄຕຂອງພົນລະເມືອງລາວ ໃນການເລືອກເອົາບຸກຄົນທີ່ມີມາດຕະຖານຄົບຖ້ວນ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍການເລືອກຕັ້ງສະມາຊິກ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຂົ້າໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເປັນຕົວແທນປະຕິບັດສິດ ອຳນາດ ຂອງປະຊາຊົນລາວບັນດາເຜົ່າ ຊຶ່ງການໄປໃຊ້ສິດໃນວັນເລືອກຕັ້ງ ແມ່ນກຽດສັກສີ, ສິດ, ໜ້າທີ່ ແລະ ພັນທະຂອງພົນລະເມືອງລາວໝົດທຸກຄົນ ທີ່ມີອາຍຸແຕ່ 18 ປີຂຶ້ນໄປ ແມ່ນມີສິດປ່ອນບັດເລືອກຕັ້ງ ເວັ້ນເສຍແຕ່ຜູ້ເປັນບ້າ, ເສຍຈິດ ແລະ ຜູ້ຖືກສານຕັດສິນລົງໂທດຕັດອິດສະຫຼະພາບ, ປົດສິດເລືອກຕັ້ງ ແລະ ສະໝັກຮັບເລືອກຕັ້ງ.