ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ໄດ້ຈັດກອງປະຊຸມເຜີຍແຜ່ ແລະ ມອບປຶ້ມ ນິພົນເລືອກເຟັ້ນ ມາກ-ອັງແກນ, ເລນິນ ແລະ ນິພົນ ໂຮ່ຈິມິນ ຄົບຊຸດ ໃນວັນທີ 5 ມີນາ​ຜ່ານ​ມານີ້ ທີ່ຫ້ອງປະຊຸມສູນຂໍ້ມູນຂ່າວສານ ຂອງສະຖາບັນດັ່ງກ່າວ. ພາຍໃຕ້ການເປັນປະທານ ແລະ ເຜີຍແຜ່ຂອງທ່ານ ບຸນທີ ເຄືອມີໄຊ ຄະນະຄຸ້ມຄອງໂຄງການແປນິພົນ ໂຮ່ຈິມິນ ຈາກພາສາຫວຽດນາມ ເປັນພາສາລາວ, ມີ​ພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

ທ່ານ ບຸນທີ ເຄືອມີໄຊ ໄດ້ກ່າວວ່າ: ຈຸດປະສົງຂອງກອງປະຊຸມແມ່ນເພື່ອເຜີຍແຜ່ ແລະ ແຈກຢາຍຜະລິດຕະພັນ, ເພື່ອເປັນຂໍ້ມູນໃຫ້​ແກ່ບັນດານັກຄົ້ນຄວ້າ, ຄູ-ອາຈານ, ພະນັກງານ ແລະ ເພື່ອໃຫ້ບົດນິພົນດັ່ງກ່າວໄປຮອດໄປເຖິງທົ່ວປະເທດ. ການ​ແປ​ນິ​ພົນ​ໂຮ່ຈິມິນ ເພື່ອສ້າງຄວາມສະດວກ ແລະ ຕອບສະໜອງຄວາມຮຽກຮ້ອງຕ້ອງການ ໃຫ້ແກ່ການຄົ້ນຄວ້າຂອງພະນັກງານ, ສະມາຊິກພັກ, ນັກການເມືອງ ແລະ ນັກຄົ້ນຄວ້າ, ການແປນິພົນ ໂຮ່ຈິມິນ ທີ່ເປັນນິພົນຄົບຊຸດ ເຫັນວ່າມີຄວາມຈໍາເປັນ. ໂຄງການແປນິພົນແມ່ນທຶນຊ່ວຍເຫຼືອຂອງຫວຽດນາມ ແລະ ທຶນສົມທົບຂອງຝ່າຍລາວ ຊຶ່ງດໍາເນີນມາ ແຕ່ວັນທີ 10 ພຶດສະພາ 2016 ເປັນ​ຕົ້ນ​ມາ. ເປົ້າໝາຍຂອງການແປ ເພື່ອເປັນເອກະສານ ສະໜອງຂໍ້ມູນວິທະຍາສາດ ຮັບໃຊ້ໃຫ້ແກ່ການກໍ່ສ້າງພະນັກງານ, ການຄົ້ນຄວ້າ ວິທະຍາສາດສັງຄົມ ຢູ່ສະຖາບັນການເມືອງ ແລະ ການປົກຄອງແຫ່ງຊາດ ແລະ ບັນດາສະຖາບັນການສຶກສາລະ​ດັບມະຫາ​ວິ​ທະ​ຍາ​ໄລ, ຫຼັງມະຫາ​ມະ​ຫາ​ວິ​ທະ​ຍາ​ໄລ ໃນທົ່ວປະເທ​ດ ແນໃສ່ຂຸດຄົ້ນ -ນໍາໃຊ້ຂໍ້ມູນ ດ້ານແນວຄິດທິດ ສະດີ ທີ່ເປັນວິທະຍາສາດ ມານໍາໃຊ້ ແກ້ໄຂບັນຫາທີ່ຕັ້ງຂຶ້ນຢູ່ປະເທດລາວ. ນິພົນໂຮ່ຈິມິນ ຄົບຊຸດ ​ມີຈໍານວນ 15 ເຫຼັ້ມ ແລະ ວັດ​ຈະ​ນານຸກົມແປສັບ ມີ 1 ເຫຼັ້ມ ລວມມີ 16 ເຫຼັ້ມ, ມີຫຼາຍກວ່າ 10 ພັນໜ້າ ຈາກພາສາຫວຽດນາມ ມາເປັນພາສາລາວ.

ທ່ານ ບຸນທີ ເຄືອມີໄຊ ກ່າວຕື່ມອີກວ່າ: ນິພົນ ໂຮ່ຈິມິນ ຄົບຊຸດ 15 ເຫຼັ້ມນີ້, ຂ້າພະເຈົ້າເຊື່ອ ໝັ້ນວ່າ ຖັນແຖວພະນັກງານນໍາພາຄຸ້ມຄອງຂອງພັກ ແລະ ລັດ ​ໂດຍ​ສະ​ເພາະ ແມ່ນພະນັກງານ​ຄູ-ອາ​ຈານ, ນັກຄົ້ນຄວ້າ ຢູ່ສະຖາບັນການເມືອງ ແລະ ການປົກຄອງແຫ່ງຊາດ ແລະ ບັນດາສະຖາບັນການ ສຶກສາ, ສູນຝຶກອົບຮົມ ຕະຫຼອດ​ຮອດພະນັກງາຈະມີຖານຂໍ້ມູນລໍ້າຄ່າ ໃຫ້ແກ່ວຽກງານ ກໍ່ສ້າງ ແລະ ຄົ້ນຄວ້າວິທະຍາສາດຂອງຕົນ.

ເນື້ອໃນພື້ນຖານຂອງນິພົນ ສ່ອງແສງໃຫ້ເຫັນແນວຄິດ ກ່ຽວກັບ ແນວທາງການເລີ່ມຈາກຕົນເອງ ຕໍ່ສູ້ປົດປ່ອຍຕົນເອງ, ເອົາປະຊາຊົນເປັນກົກ ປຸກລະດົມສ້າງຂະບວນການ; ດູດດຶງເອົາປະຊາຊົນເຂົ້າ ຮ່ວມຂະບວນການ; ການຊີ້ນໍາ-ນໍາພາ ຂະບວນການຕໍ່ສູ້ ປົດປ່ອຍປະເທດຊາດ ແລະ ສ້າງສາປະ ເທດຊາດ ຕາມທິດສັງຄົມນິຍົມ; ການກໍ່ສ້າງຂະຫຍາຍພັກ, ຄວາມເປັນແບບຢ່າງຂອງພະນັກງານ, ສະມາຊິກພັກ, ການເສຍສະຫຼະຜົນປະໂຫຍດສ່ວນຕົວ ເພື່ອປະເທດຊາດ ເພື່ອປະຊາຊົນ; ການຍາດແຍ່ງ ການສະໜັບສະໜູນ ຈາກຕ່າງປະເທດ, ເສີມຂະຫຍາຍນໍ້າໃຈສາກົນກໍາມະຊີບອັນຜ່ອງໃສ (ຊ່ວຍເພື່ອນ ແມ່ນຊ່ວຍຕົນເອງ) ແລະ ນອກນັ້ນ ຍັງສ່ອງແສງໃຫ້ເຫັນ ຄຸນສົມບັດຂອງປະ​ທານ ໂຮ່ຈິມິນ ​ທີ່ເສຍ ສະຫຼະຜົນປະໂຫຍດສ່ວນຕົວ ເພື່ອສ່ວນລວມ, ການຮ່ວມສຸກ ຮ່ວມທຸກ ໃນຂະບວນການມະຫາຊົນ, ຄວາມເປັນແບບຢ່າງຮອບດ້ານ ຂອງການປະຕິວັດ, ນໍ້າໃຈສາກົນກໍາມະຊີບທີ່ຜ່ອງໃສ, ແກ້ໄຂຄວາມທຸກ ຍາກຂອງປະຊາຊົນ.

(ຂ່າວ-ພາບ: ແສງຈັນ)