ແນວລາວສ້າງຊາດເມືອງພຽງ ແຂວງໄຊຍະບູລີ ຈັດກອງປະຊຸມຄົບຄະນະກຳມະການແນວລາວ ສ້າງຊາດເມືອງພຽງ ຄັ້ງທີ 2 ສະໄໝທີ V ຂຶ້ນເມື່ອບໍ່​ດົນ​ມານີ້ ທີ່ຫ້ອງປະຊຸມໃຫຍ່ຂອງເມືອງ ໂດຍການເປັນ ປະທານຂອງທ່ານ ບຸນຄົງ ຮັກປະສິດ ກຳມະການປະຈຳພັກເມືອງ ປະທານແນວລາວສ້າງຊາດເມືອງ ເປັນກຽດ ເຂົ້າຮ່ວມຂອງທ່ານ ສຸວັນທອງ ພູມມາວົງ ຮອງເລຂາພັກເມືອງ ຜູ້ຊີ້ນຳວຽກງານພັກ-ພະນັກງານຂັ້ນເມືອງ, ມີແຂກ​ຖືກ​ເຊີນ ແລະ ພາກ​ສ່ວນ​ກ່ຽວຂ້ອງຂອງເມືອງເຂົ້າຮ່ວມ.

ກອງປະຊຸມໄດ້ຮັບຟັງການຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານແນວລາວສ້າງຊາດເມືອງ ປະຈຳປີ 2020 ແລະ ແຜນການໃນປີ 2021 ຊຶ່ງຕະຫຼອດໄລຍະຜ່ານມາຄະນະກຳມະການແນວລາວສ້າງຊາດ ແຕ່ຂັ້ນເມືອງລົງຮອດຂັ້ນຮາກຖານໄດ້ເອົາໃຈໃສ່ເຄື່ອນໄຫວຕາມພາລະບົດບາດຂອງຕົນດ້ວຍຄວາມຮັບຜິດຊອບສູງ ໄດ້ສຶກສາອົບຮົມການເມືອງແນວຄິດໃຫ້ແກ່ບັນດາສະມາຊິພັກ, ພະນັກງານ ແລະ ປະຊາຊົນບັນດາເຜົ່າໃຫ້ ມີຫຼັກໝັ້ນຕໍ່ໜ້າທີ່ວຽກງານເປັນເຈົ້າການໃນການປະຕິບັດແຜນພັດທະນາເສດຖະກິດ-ສັງຄົມ. ກອງປະຊຸມ ຍັງໄດ້ຮັບຟັງການເຜີຍແຜ່ຜົນສຳເລັດກອງປະຊຸມໃຫຍ່ຜູ້ແທນແນວລາວສ້າງຊາດ ແຂວງໄຊຍະບູລີ ຄັ້ງທີ 6 ແລະ ການຈັດຕັ້ງປະຕິບັດດຳລັດ 315/ລບ ວ່າດ້ວຍການປົກປ້ອງ ແລະ ຄຸ້ມຄອງສາສະໜາ, ຮັບຟັງການຜ່ານມະຕິຕົກ ລົງຂອງທ່ານເຈົ້າເມືອງວ່າດ້ວຍການແຕ່ງຕັ້ງເລຂາ ແລະ ຮອງເລໜ່ວຍພັກແນວລາວສ້າງຊາດເມືອງ ໃນຄັ້ງນີ້ຕື່ມ ອີກ.

ໃນ​ກອງ​ປະ​ຊຸມ, ບັນດາຜູ້ເຂົ້າຮ່ວມໄດ້ຂຶ້ນມີຄຳຄິດຄຳເຫັນຕໍ່ກັບບົດສະຫຼຸບ ແລະ ທິດທາງແຜນການ ໃນຕໍ່ໜ້າເປັນຕົ້ນແມ່ນວຽກງານການຄຸ້ມຄອງພະສົງ-ສາມະເນນ ແລະ ຄວາມຮັບຜິດຊອບວຽກງານປຸກລະ ດົມການເຮັດບຸນສິນກິນທານ, ການສ້າງຄອບຄົວ ແລະ ບ້ານສາມັກຄີປອງດອງ, ການສ້າງສາພັດທະນາພື້ນ ຖານໂຄງລ່າງເສັ້ນທາງເຂົ້າວັດ ແລະ ການສ້າງວັດສະອາດສວຍງາມເພື່ອພ້ອມກັນປັບປຸງວຽກງານດັ່ງ ກ່າວໃຫ້ມີການພັດທະນາດີຂຶ້ນ ແລະ ໄດ້ຮັບຜົນດີ.

   (ຂ່າວ-ພາບໂດຍ: ແສງສຸດາ ກິ່ງສະຫວັດ).