ຄະນະບໍລິຫານງານຊາວໜຸ່ມ ຖວ​ທ ສະ​ຫຼຸບ​ວຽກ​ງານ​ຊາວ​ໜຸ່ມ​ປະ​ຈຳ​ປີ

ຄະນະບໍລິຫານງານຊາວໜຸ່ມ ກະຊວງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມສະຫຼຸບວຽກງານຊາວໜຸ່ມກະຊວງ ຖວທ ປະຈໍາສົກປີ 2020 ແລະ ທິດທາງແຜນການ ປະຈໍາປີ 2021 ເຜີຍແຜ່ເຊື່ອມຊຶມມະ ຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດສະໄໜທີ VIII  ຂຶ້ນໃນວັນທີ 2 ເມສານີ້ ທີ່ໂຮງຮຽນສີລະປະແຫ່ງຊາດ ໂດຍການເປັນປະທານ ຂອງທ່ານ ບົວໄລ ພານຸວົງ  ວ່າການຫົວໜ້າຫ້ອງການກະຊວງ ຖວທ ທັງເປັນເລຂາຄະນະບໍລິຫານງານຊາວໜຸ່ມ ກະຊວງ ຖວທ, ທ່ານ ວຽງພອນ  ສຸຂະວົງ ຜູ້ອໍານວຍການໂຮງຮຽນສີລະປະແຫ່ງຊາດ ມີຄະນະຮາກຖານຊາວໜຸ່ມ ແລະ ໜ່ວຍຊາວໜຸ່ມຮາກຖານ ພ້ອມດ້ວຍສະມາຊິກ ຊາວໜຸ່ມອ້ອມຂ້າງກະຊວງເຂົ້າຮ່ວມ.

ໃນກອງປະຊຸມ ທ່ານ ວຽງພອນ ສຸຂະວົງ  ໄດ້ຂຶ້ນຜ່ານບົດສະຫຼຸບວຽກງານຊາວ ໜຸ່ມ ປະຈໍາປີ 2020 ແລະ ທິດທາງແຜນການ ປະຈໍາປີ 2021; ເຜີຍແຜ່ມະຕິກອງ ປະຊຸມໃຫຍ່ ຄັ້ງທີ VIII ຂອງຄະນະບໍລິຫານງານຊາວໜຸ່ມກະຊວງ ຖວທ ແລະ ເຜີຍ ແຜ່ມະຕິກອງປະຊຸມ ໃຫຍ່ VIII ຂອງຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ໂດຍທ່ານໄດ້ກ່າວວ່າ: ຜົນ​ສຳ​ເລັດການຈັດຕັ້ງປະຕິບັດວຽກງານຊາວ ໜຸ່ມກະຊວງ ຖວທ  ໃນໄລຍະຜ່ານມາ ຄະ​ນະ​ບໍ​ລິ​ຫານ​ງານ​ຊາວ​ໜຸມ​ປະ​ຊາ​ຊົນ​ປະ​ຕິ​ວັດ​ລາວ ກະ​ຊວງ ຖວ​ທ ໄດ້ຢຶດ​ຖື​ເອົາ​ການນຳພາວຽກງານ​​​ສຶກສາ​ອົບຮົມການ​ເມືອງ-​ແນວ​ຄິດ​ເປັນ​ກົກໃຫ້ແກ່ຊາວໜຸ່ມ-ໄວໜຸ່ມຂອງຕົນດ້ວຍການສ້າງໂອກາດ, ​ຈັດ​ຕັ້ງ ແລະ ຊຸກ ຍູ້-ສົ່ງເສີມ ຮຽນຮູ້ແນວທາງ​ນະ​ໂຍບາຍ​ຂອງ​ພັກ-ລະບຽບ​ກົດໝາຍ​ຂອງ​ລັດ,​ ວິຖີດຳລົງ ຊີວິດ, ສີລະປະວັດທະນະທຳ, ກິລາກາຍະກຳ, ການຊ່ວຍເຫຼືອ​ສັງ​ຄົມ, ສຶກສາ​ມູນ​ເຊື້ອ ຂອງ​ພັກ, ຂອງ​ທ່ານຜູ້ນໍາ, ຮຽນຮູ້ທິດສະດີ, ວິທະຍາສາດ, ​ເຕັກ​ໂນ​ໂລ​ຊີທີ່​ກ້າວໜ້າ​ຂອງ​​ຍຸກສະໄໝ, ​ ຄະນະບໍລິຫານງານຊາວໜຸ່ມກະຊວງ ຖວ​ທ ສະໄໝທີ VIII ປະ ກອບດ້ວຍ 17 ສະຫາຍ ຍິງ 5 ສະຫາຍ, ແຕ່​ປັດຈຸ​ບັນ​ຍັງ 15 ສະ​ຫາຍ ຍິງ 4 ສະ​ຫາຍ.​ ກອງ​ປະ​ຊຸມ​ສາ​ມັນຄົບ​ຄະ​ນະ​ຄັ້ງ​ທີ 2 ​ຄະ​ນະ​ໄດ້​ຕົກ​ລົງແບ່ງງານ, ແບ່ງຄວາມ ຮັບຜິດຊອບຢ່າງຈະ​ແຈ້ງ, ແຕ່ງ​ຕັ້ງ​ກອງ​ເລ​ຂາ​ປະ​ສານ​ງານ, ໄດ້ປັບປຸງແບບແຜນວິທີ ເຮັດວຽກ. ໂຄງປະກອບດ້ານກົງຈັກການຈັດຕັ້ງຂອງຊາວໜຸ່ມກະຊວງ ຖວທ ມີ 2 ຄະ ນະຮາກຖານຊາວໜຸ່ມ ແລະ ມີ 44 ໜ່ວຍຊາວໜຸ່ມຮາກຖານ ແລະ ມີ ກອງ​ເຍົາ​ວະ​ຊົນ​ທັນ​ວາ 1 ກອງທີ່ຂຶ້ນກັບ, ປີ 2020 ໄດ້ຮັບສະມາຊິກເຂົ້າໃໝ່ຈຳນວນ 71 ສະຫາຍ, ສະມາຊິກພົ້ນອາຍຸກະສຽນ 14 ສະຫາຍ, ​ສະມາຊິກຍົກຍ້າຍໄປຢູ່ກະຊວງອື່ນ, ຮຽນຕໍ່ ແລະ ໄປ​ປະ​ຈຳ​ການ​ຢູ່ຕ່າງປະເທດມີ 12 ສະຫາຍ, ​ປັດ​ຈຸ​ບັນ​ມີສະ​ມາ​ຊິກ​ຊາວ​ໜຸ່ມ​ທັງ​ໝົດ 1.264 ສະຫາຍ ຍິງ 588  ສະ​ຫາຍ, ເຍົາ​ວະ​ຊົນ​ມີ 155 ຄົນ ຍິງ 95 ຄົນ.

ສະມາຊິກຊາວໜຸ່ມທົ່ວກະຊວງ ໄດ້ເອົາໃຈໃສ່ເປັນເຈົ້າການປະກອບສ່ວນປະຕິບັດ ໜ້າທີ່ວຽກງານວິຊາສະເພາະຂອງຕົນ ໄປຄຽງຄູ່ກັບພັນທະໜ້າທີ່ຊາວໜຸ່ມປະຊາຊົນປະ ຕິວັດລາວຢ່າງຫ້າວຫັນຕໍ່ເນື່ອງ ໂດຍສະເພາະແມ່ນສຸມໃສ່ການໂຄສະນາເຜີຍແຜ່ມູນ ເຊື້ອການນໍາພາຂອງພັກ, ບົດບາດ ແລະ ຄວາມສໍາຄັນຂອງພັກ, ຕິດ​ພັນ​ກັບການ​ສ້າງ​ສາ​ພັດ​ທະ​ນາ​ປະ​ເທດ​ຊາດກໍຄື​ເຫດ​ການ​ຕ່າງໆທີ່ເກີດ​ຂຶ້ນ​ຢູ່​ພາຍ​ໃນ ແລະ ຕ່າງ​ປະ​ເທດ ຜ່ານສື່ຕ່າງໆ,​ ໄດ້ສຸມ​ໃສ່ການສະແດງສິລະປະ, ກາ​ຍະ​ສິນ, ລະຄອນ ແລະ ສາຍ​ຮູບ​ເງົາ ເພື່ອຂໍ່ານັບຊົມເຊີຍ ແລະ ສະເຫຼີມສະຫຼອງວັນສໍາຄັນຂອງຊາດຕ່າງໆ ໃຫ້ມີບັນ ຍາກາດຟົດຟື້ນເປັນ​ຕົ້ນ​ແມ່ນ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 65 ປີ, ວັນຊາດ ຄົບຮອບ 45 ປີ, ວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 65 ປີ, ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 100 ປີ ລວມ ທັງຈັດບັນດາກິດຈະກໍາປິ່ນອ້ອມຕ່າງໆ. ພ້ອມນັ້ນ, ຊາວໜຸ່ມກະຊວງ ຖວທ ໄດ້ຮັບ ຮອງເປັນກະຊວງ 4 ບຸກ 3 ປີຊ້ອນ ແລະ ໄດ້ຮັບທຸງໄຊນໍາໜ້າຂະບວນການແຂ່ງ ຂັນ 4 ບຸກ ຢ່າງສົມກຽດ ໃນວັນທີ 22 ມັງກອນ 2020; ໄດ້ເຂົ້າຮ່ວມບາງກິດຈະ ກໍາທີ່ສໍາຄັນທີ່ທາງສູນກາງຊາວໜຸ່ມ ກໍຄືຂະແໜງການຈັດຂຶ້ນຢ່າງມີປະສິດທິຜົນ.

ຄຽງຄູ່ກັບບັນດາໝາກຜົນທີ່ພົ້ນເດັ່ນຂ້າງເທິງນັ້ນ, ຊາວໜຸ່ມກະຊວງຍັງໄດ້ປະກອບ ສ່ວນເຂົ້າໃນວຽກງານສະເພາະກິດຢ່າງຕັ້ງໜ້າ ໂດຍສະເພາະການໂຄສະນາເຜີຍແຜ່ ບັນດາມະຕິຄຳສັ່ງ, ແຈ້ງການ, ບົດແນະນໍາ, ການຖະແຫຼງຂ່າວຂອງລັດຖະບານ, ຂອງ ຄະນະສະເພາະກິດເພື່ອປ້ອງກັນ, ຄວບຄຸມ, ສະກັດກັ້ນ  ແລະ ແກ້ໄຂການລະບາດ ຂອງພະຍາດໂຄວິດ-19 ລວມເຖິງບັນດາແຈ້ງການຂອງແຕ່ລະກະຊວງ, ອົງການຈັດ             ຕັ້ງຕ່າງໆທັງສູນກາງ ແລະ ທ້ອງຖິ່ນ. 

ຂ່າວ-ພາບ: ຍຸ​ພິນ​ທອງ