ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະໄດ້ຕ້ອນຮັບ ທ່ານ ມະໄລທອງ ກົມມະສິດ ປະທານອົງການກວດສອບແຫ່ງລັດ ພ້ອມຄະນະ ໃນໂອກາດມາເຄື່ອນໄຫວວຽກງານ ຢູ່ແຂວງ ຈຳປາສັກ ໃນວັນທີ 31 ມີນາຜ່ານມາ ທີ່ຫ້ອງວ່າການແຂວງຈຳປາສັກ.
ທ່ານ ວິໄລວົງ ບຸດດາຄຳ ໄດ້ສະແດງຄວາມຕ້ອນຮັບທ່ານປະທານອົງການກວດສອບແຫ່ງລັດ ແລະ ຄະນະໃນການເຄື່ອນໄຫວວຽກງານ ຢູ່ແຂວງຈຳປາສັກເທື່ອນີ້, ພ້ອມກັນນັ້ນກໍໄດ້ສະແດງຄວາມ ຊົມເຊີຍຕໍ່ທ່ານ ມະໄລທອງ ກົມມະສິດ ທີ່ໄດ້ຮັບຄວາມໄວ້ເນື້ອເຊື່ອໃຈ ຈາກການນຳພັກ-ລັດ ຮັບການ ແຕ່ງຕັ້ງເປັນປະທານອົງການກວດສອບແຫ່ງລັດ ແລະ ຂໍໃຫ້ທ່ານປະທານ ພ້ອມດ້ວຍຄະນະນໍາຂອງ ອົງການກວດສອບແຫ່ງລັດ ແລະ ອົງການກວດສອບປະຈໍາພາກແຕ່ລະຂັ້ນປະຕິບັດສິດ, ພາລະບົດບາດ ແລະ ໜ້າທີ່ຂອງຕົນດ້ວຍຄວາມຮັບຜິດຊອບສູງ.
ໂອກາດນີ້, ທ່ານ ມະໄລທອງ ກົມມະສິດ ໄດ້ສະແດງຄວາມຂອບໃຈ ແລະ ຊົມເຊີຍຕໍ່ຜົນສຳ ເລັດຂອງກອງປະຊຸມໃຫຍ່ ຄັ້ງທີ XI ຂອງພັກ ແລະ ກອງປະຊຸມໃຫຍ່ ຄັ້ງທີ VIII ຜູ້ແທນອົງຄະນະ ພັກແຂວງຈຳປາສັກ, ຊົມເຊີຍຕໍ່ການຊີ້ນຳ-ນໍາພາຂອງການນຳແຂວງຈຳປາສັກ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຂວງຜ່ານມາ ເຫັນໄດ້ເຖິງການປ່ຽນແປງໃນທາງທີ່ດີຂຶ້ນ. ພ້ອມ ກັນນັ້ນ ກໍໄດ້ແຈ້ງຈຸດປະສົງຕົ້ນຕໍໃນການມາເຄື່ອນໄຫວວຽກງານຢູ່ແຂວງຈຳປາສັກເທື່ອນີ້ ແມ່ນເພື່ອ ກ່າວລາໜ້າທີ່ການນຳແຂວງຈຳປາສັກຕໍ່ທ່ານເຈົ້າແຂວງ ແລະ ພົບປະໂອ້ລົມຄະນະນຳ, ພະນັກງານ ພາຍໃນອົງການກວດສອບປະຈໍາພາກໃຕ້ຢູ່ແຂວງຈຳປາສັກນຳອີກ.
(ຂ່າວ: ທັດຊະນະ)