ໜັງສືພິມ ປະຊາຊົນ

ຄະນະນຳກະຊວງ ປກສ ວາງພວງມາລາຢູ່ອະນຸສາວະລີ ນັກຮົບນິລະນາມ ແລະ ຕໍ່ໜ້າຮູບປັ້ນ ປະທານ ໄກສອນ ພົມວິຫານ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 05/04/2021 10:17:25 ຈຳນວນຢ້ຽມຊົມ 6802 ຄັ້ງ

ໃນວັນທີ 4 ເມສາ 2021, ຄະນະນຳກະຊວງ ປກສ ນຳໂດຍ ທ່ານ ພົທ ວິໄລ ຫຼ້າຄໍາຟອງ ລັດຖະມົນຕີກະຊວງ ປກສ ໄດ້ນຳເອົາພວງມາລາ ແລະ ກະຕ່າດອກໄມ້ ເຂົ້າວາງຢູ່ ອະນຸສາວະລີນັກຮົບນິລະນາມ ແລະ ໜ້າຮູບປັ້ນ ປະທານ ໄກສອນ ພົມວິຫານ ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ ( 5 ເມສາ 1961-5 ເມສາ 2021 ) ເພື່ອເປັນການສະແດງຄວາມຂໍ່ານັບ ແລະ ສັນລະເສີນຄຸນງາມຄວາມດີຕໍ່ນັກຮົບນິລະນາມ ແລະ ປະທານ ໄກສອນ ພົມວິຫານ ທີ່ໄດ້ເສຍສະຫຼະຊີວິດເຂົ້າໃນພາລະກິດຕໍ່ສູ້ກູ້ຊາດ.

ກໍາລັງປ້ອງກັນຄວາມສະຫງົບປະຊາຊົນ ແມ່ນກໍາລັງປະກອບອາວຸດປະຕິວັດອັນແຫຼມຄົມ ໂດຍແມ່ນພັກປະຊາຊົນ ປະຕິວັດລາວ ເປັນຜູ້ສ້າງຕັ້ງ, ນໍາພາເດັດຂາດ, ໂດຍກົງຮອບດ້ານ, ເປັນກໍາລັງທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອຮັບໃຊ້ສິດຜົນປະໂຫຍດຂອງປະຊາຊົນລາວບັນດາເຜົ່າ, ກຳລັງປ້ອງກັນຄວາມສະຫງົບປະຊາຊົນ ໄດ້ກໍາເນີດ ແລະ ເຕີບໃຫຍ່ຂະຫຍາຍຕົວໃນຂະບວນການຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ, ປົກປັກຮັກສາ ແລະ ສ້າງສາພັດທະນາປະເທດຊາດ, ເວລາໃດກໍມີມູນເຊື້ອການຕໍ່ສູ້ຢ່າງອົງອາດກ້າຫານ, ມີນ້ຳໃຈເສຍສະຫຼະເດັດດ່ຽວບໍ່ຍອມຈໍານົນ, ມີຄວາມສັດຊື່ບໍລິສຸດ ແລະ ມີຄວາມສາມັກຄີເປັນປຶກແຜ່ນ.

ນັບແຕ່ມື້ສ້າງຕັ້ງ ຈົນມາເຖິງປັດຈຸບັນ ກຳລັງປ້ອງກັນຄວາມສະຫງົບ ມີຜົນງານໂດດເດັ່ນຢ່າງຫຼວງຫຼາຍໃນການເຮັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ ເປັນຕົ້ນແມ່ນຮ່ວມກັບກຳລັງປ້ອງກັນຊາດຕ້ານສັດຕູຜູ້ຮຸກຮານ, ສາມາດປ້ອງກັນການນຳພັກ-ລັດໃຫ້ມີຄວາມປອດໄພ 100%, ແກ້ໄຂເປົ້າໝາຍ ແລະ ກຸ່ມຄົນບໍ່ດີທີ່ເຄື່ອນໄຫວກໍ່ອາຊະຍາກຳ, ກໍ່ຄວາມບໍ່ສະຫງົບ, ສາມາດສະກັດກັ້ນ ແລະ ແກ້ໄຂບັນຫາປະກົດການຫຍໍ້ທໍ້ຕ່າງໆ ເຊັ່ນ: ບັນຫາຢາເສບຕິດ, ປຸ້ນຈີ້ຊິງຊັບ, ລັກຊັບ, ຄ້າ-ຂາຍເຖື່ອນ ເຮັດໃຫ້ສັງຄົມມີຄວາມສະຫງົບໂດຍພື້ນຖານ.

ໃນໂອກາດທີ່ສຳຄັນດັ່ງກ່າວ, ການນຳ ກະຊວງ ປກສ ຈຶ່ງໄດ້ພ້ອມກັນນຳພວງມາລາ ແລະ ກະຕ່າດອກໄມ້ມາວາງ ຕໍ່ໜ້າອະນຸສາວະລີນັກຮົບນິລະນາມ ແລະ ຮູບປັ້ນປະທານ ໄກສອນ ພົມວິຫານ ເພື່ອລະ ນຶກເຖິງຄຸນງາມຄວາມດີຂອງບັນດາຜູ້ນຳພັກ-ລັດ, ນັກຮົບ ທີ່ໄດ້ເສຍສະຫຼະຊີວິດ ແລະ ເລືອດເນື້ອ ເພື່ອການປະຕິວັດຕໍ່ສູ້ປົດປ່ອຍຊາດ ສາມາດຍາດໄດ້ໄຊຊະນະມາເຖິງທຸກວັນນີ້ ພ້ອມທັງເປັນການເສີມຂະຫຍາຍມູນເຊື້ອອັນພິລະອາດຫານຂອງບັນດາທ່ານຜູ້ນຳ ແລະ ນັກຮົບເຂົ້າໃນວຽກງານປ້ອງກັນຄວາມສະຫງົບ ໃຫ້ນັບມື້ນັບເຕີບໃຫຍ່ເຂັ້ມແຂງ.