ຂ່າວຕ່າງປະເທດລາຍງານ ເມື່ອວັນທີ 19 ເມສາທີ່ຜ່ານມາ, ກະຊວງການເງິນຍີ່ປຸ່ນ ໄດ້ເປີດເຜີຍວ່າ: ຈໍານວນການສົ່ງອອກຂອງຍີ່ປຸ່ນ ໃນເດືອນມີນາທີ່ຜ່ານມາ ເພີ່ມຂຶ້ນ 16,1% ເມື່ອທຽບແບບລາຍປີ ຊຶ່ງສູງກວ່າທີ່ນັກວິເຄາະໄດ້ຄາດຄະເນໄວ້ຈະເພີ່ມຂຶ້ນພຽງ 11,6% ເນື່ອງຈາກຄວາມຕ້ອງການສິນຄ້າຍີ່ປຸ່ນໃນຕະຫຼາດຕ່າງປະເທດເລີ່ມຟື້ນຕົວຂຶ້ນ.

ຂ່າວລະບຸວ່າ: ຈໍານວນການສົ່ງອອກຂອງຍີ່ປຸ່ນ ໄດ້ປັບຕົວດີຂຶ້ນໃນເດືອນມີນາທີ່ຜ່ານມາ ຫຼັງຈາກທີ່ຫຼຸດລົງ 4,5% ໃນເດືອນກຸມພາ. ສ່ວນຈໍານວນການນໍາເຂົ້າໃນເດືອນມີນາ ປັບຕົວຂຶ້ນ 5,7% ເມື່ອທຽບແບບລາຍປີ ຊຶ່ງດີກວ່າທີ່ບັນດານັກວິເຄາະໄດ້ຄາດຄະເນໄວ້ ຈະເພີ່ມຂຶ້ນພຽງ 4,7%, ສົ່ງຜົນໃຫ້ ຍີ່ປຸ່ນ ມີຍອດເກີນດູນການຄ້າໃນເດືອນມີນາຢູ່ໃນລະດັບ 6,637 ແສນລ້ານເຢນ ໂດຍສູງກວ່າທີ່ນັກວິເຄາະໄດ້ຄາດຄະເນໄວ້ 4,90 ແສນລ້ານເຢນ.