ວິທະຍຸກະຈາຍສຽງຫວຽດນາມລາຍງານວ່າ: ຜ່ານການເຮັດວຽກຢູ່ສະຖານທູດ, ພົວພັນກັບພໍ່ແມ່ປະຊາຊົນຢູ່ບັນດາເຂດຂອງປະເທດລາວ, ຂ້າພະເຈົ້າເຫັນວ່າປະຊາຊົນລາວ ແມ່ນຜູ້ມີນິດໄສໃຈດີ.

ຂ່າວລາຍງານວ່າ: ວັນທີ 19 ເມສາຜ່ານມາ, ຢູ່ນະຄອນຫຼວງຮ່າໂນ້ຍ ໄດ້ຈັດພິທີເປີດງານວາງສະແດງຮູບແຕ້ມຂອງນັກຈິດຕະກອນ ເລຢຸງເກື່ອງ ກັບປະເທດລາວ. ເລຢຸງເກື່ອງ ແມ່ນນັກຈິດຕະກອນຄົນໜຶ່ງ ທີ່ເຄີຍເຮັດວຽກຢູ່ ສປປລາວ, ອະດີດພະນັກງານຂະແໜງການທູດ, ທ່ານ ໄດ້ແຕ້ມບັນດາພາບເຄິງຄີງ, ພິເສດແມ່ນໄດ້ແຕ້ມບັນດາຜູ້ທີ່ມີຊື່ສຽງ, ບັນດາການນຳທີ່ມີອິດທິພົນຊື່ສຽງຂອງ 2 ປະເທດ ຫວຽດນາມ - ລາວ ໃນໂອກາດພິເສດ.

ໃນງານວາງສະແດງຄັ້ງນີ້, ທ່ານ ເລຢຸງເກື່ອງ ໄດ້ແນະນຳກັບຜູ້ຊົມພາບຖ່າຍກວ່າ 50 ແຜ່ນ, ລວມມີຫຼາຍຫົວເລື່ອງ ດ້ວຍວັດຖຸແຕ້ມຫຼາຍຢ່າງຄື: ເຈ້ຍແຂງ, ສໍສີ, ເຈ້ຍສາ, ໃນນັ້ນມີຮູບແຕ້ມຫຼາຍແຜ່ນແມ່ນກ່ຽວກັບການດຳລົງຊີວິດປັດຈຸບັນ, ປະເທດຊາດ ແລະ ຮີດຄອງປະເພນີຂອງປະຊາຊົນລາວ, ບັນດາຮູບແຕ້ມເຄິງຄີງນາງສາວລາວ ແລະ ບັນດາໝູ່ເພື່ອນຂອງທ່ານ. ນັກຈິດຕະກອນ ເລຢຸງເກື່ອງ ແນະນໍາວ່າ: ຮູບແຕ້ມແຕ່ລະແຜ່ນ ແມ່ນເປັນອະນຸສອນຢ່າງເລິກເຊິ່ງໃນຂະບວນວິວັດການເຮັດວຽກ ແລະ ການເຄື່ອນໄຫວດ້ານວິຈິດສິນຂອງຕົນ.

ທ່ານ ເລຢຸງເກື່ອງ ກ່າວວ່າ:ຜ່ານການເຮັດວຽກຢູ່ສະຖານທູດ, ການພົວພັນກັບພໍ່ແມ່ປະຊາຊົນຢູ່ບັນດາຂົງເຂດຂອງປະເທດລາວ, ຂ້າພະເຈົ້າເຫັນວ່າ: ປະຊາຊົນລາວ ແມ່ນຜູ້ມີນິດໄສໃຈດີ. ຍ້ອນຂ້າພະເຈົ້າເຄີຍຮຽນວິຈິດສິນ, ສະນັ້ນ ຂ້າພະເຈົ້າໄດ້ເຊື່ອມຕໍ່ 2 ພື້ນຖານວັດທະນະທຳ, ເຊື່ອມຕໍ່ງານບຸນ, ຮີດຄອງປະເພນີຂອງປະຊາຊົນລາວ ຜ່ານບັນດາຮູບແຕ້ມ.

ຂ່າວລະບຸວ່າ: ທຸກຫົວເລື່ອງທີ່ ນັກຈິດຕະກອນ ເລຢຸງເກື່ອງ ແຕ້ມເຊັ່ນ: ຮູບແຕ້ມເຄິ່ງຄີງຕະຫຼອດຮອດຮູບແຕ້ມວັດຖຸສິ່ງຂອງ, ທິວທັດທຳມະຊາດຂອງປະເທດ ຫວຽດນາມ ແລະ ລາວ ຫຼື ບັນດາຮູບແຕ້ມທີ່ ທ່ານ ເກື່ອງ ພົບເຫັນຢູ່ຕາມທາງ ແມ່ນມີຊີວິດຊີວາທີ່ສຸດ. ໂດບສະເພາະ ແມ່ນການລະບາຍສີໃນບັນດາຮູບແຕ້ມແມ່ນຮຸ່ງເຫຼືອງທີ່ສຸດ, ນີ້ໄດ້ສະແດງໃຫ້ເຫັນນິດໄສຂອງຈິດຕະກອນຜູ້ໜຶ່ງ ຊຶ່ງຍາມໃດກໍ່ມີຄວາມປະທັບໃຈ, ມີຄວາມຮັກຕໍ່ຊີວິດ ແລະ ສິລະປະ.

ງານວາງສະແດງຄັ້ງນີ້, ໄດ້ສ້າງຄວາມປະທັບໃຈທີ່ສຸດສຳລັບແຂກທີ່ເຂົ້າຊົມ. ບັນດາຮູບແຕ້ມຂອງນັກຈິດຕະກອນ ເລຢຸງເກື່ອງ ໄດ້ວາງສະແດງຢູ່ເຮືອນວາງສະແດງສະມາຄົມວິຈິດສິນຫວຽດນາມ, ເລກທີ 16 ຖະໜົນ ໂງກວ່ຽນ, ຮ່າໂນ້ຍ ນັບແຕ່ວັນທີ 19 – 27 ເມສາ 2021.