ພະແນກສຶກສາທິການ ແລະ ກິລາແຂວງສາລະວັນ ຈັດພິທີຍົກຍ້າຍ, ແຕ່ງຕັ້ງ ຮອງຫົວໜ້າພະແນກສຶກສາທິການ ແລະ ກິລາແຂວງຄົນໃໝ່ ຂຶ້ນ​ໃນວັນທີ 4 ມິຖຸນາຜ່ານ​ມານີ້ ທີ່​ພະ​ແນກ​ດັ່ງ​ກ່າວ  ໂດຍການເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ສີລິສັັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງ,  ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ອີງຕາມກົດໝາຍວ່າດ້ວຍການປົກຄອງທ້ອງຖິ່ນ (ສະບັບປັບປຸງ) ເລກທີ 68/ສພຊ, ໝວດທີ 4, ມາດຕາ 20 ຂໍ້ທີ 11 ສິດຂອງເຈົ້າແຂວງ ໃນການຍົກຍ້າຍ, ແຕ່ງຕັ້ງ ຊຶ່ງໄດ້ຜ່ານຂໍ້ຕົກລົງ ເລກທີ 360/ຈຂ.ສວ, ລົງວັນທີ 26 ພຶດສະພາ 2021 ວ່າດ້ວຍ ການແຕ່ງຕັ້ງຮອງຫົວໜ້າພະແນກສຶກສາທິການ ແລະ ກິລາແຂວງຄົນໃໝ່ ໂດຍການແຕ່ງຕັ້ງ ທ່ານ ນາງ ພູວຽງ ອິນທະສອນ ຮອງຜູ້ອຳນວຍການວິທະຍາໄລຄູສາລະວັນ  ໄປຮັບໜ້າທີ່ເປັນຮອງຫົວໜ້າພະແນກສຶກສາທິການ ແລະກິລາແຂວງຄົນໃໝ່ ແລະ ແຕ່ງຕັ້ງ ທ່ານ ຄຳເຟືອງ ອິນທິສອນ ຫົວໜ້າຂະແໜງອະຊີວະສຶກສາ ມາເປັນຮອງຫົວໜ້າພະແນກສຶກສາທິການ ແລະ ກິລາແຂວງຄົນໃໝ່. ແລະ ຂໍ້ຕົກລົງເລກທີ 361/ຈຂ.ສວ, ລົງວັນທີ 26 ພຶດສະພາ 2021 ວ່າດ້ວຍ: ຍົກຍ້າຍ ທ່ານ ວັດທະນາ ໝັ້ນວິໄລ ຮອງຫົວໜ້າພະແນກສຶກສາທິການ ແລະ ກິລາແຂວງ ຄົນເກົ່າ ໄປຮັບໜ້າທີ່ໃໝ່ເປັນຮັກສາການຜູ້ອຳນວຍການວິທະຍາໄລຄູສາລະວັນ ຄົນໃໝ່ ແລະ ຂໍ້ຕົກລົງ ເລກທີ 366/ຈຂ.ສວ ລົງວັນທີ 26 ພຶດສະພາ 2021 ວ່າດ້ວຍ ການຍົກຍ້າຍ ທ່ານ ນາງ ທອງໃບ ໄຊຍະສານ ຮອງຫົວໜ້າພະແນກສຶກສາທິການ ແລະ ກິລາແຂວງ ໄປຮັບໜ້າທີ່ໃໝ່ ຢູ່ສະພາປະຊາຊົນແຂວງສາລະວັນ.

     ທັງນີ້ກໍເພື່ອເປັນການປັບປຸງກົງຈັກການຈັດຕັ້ງລັດ ໃຫ້ແທດເໝາະກັບໜ້າທີ່ວຽກງານໃນໄລຍະໃໝ່ຕາມກົດລະບຽບຂອງພັກປະຊາຊົນປະຕິວັດລາວໄດ້ກຳນົດໄວ້.

(ພາບ-ຂ່າວ: ທິດລານີ ໂຄດໂຍທາ)