ເພື່ອເປັນການເລືອກເຟັ້ນເອົາພະນັກງານທີ່ມີຄວາມຮູ້ຄວາມສາມາດບັນຈຸເຂົ້າໃນການສ້າງແຜນກຳນົດພະນັກງານນຳພາ-ຄຸ້ມຄອງ ຂອງພະແນກແຮງງານ ແລະ ສະຫວັດດີການ-ສັງຄົມ (ຮ​ສ​ສ) ແຂວງບໍ​ລິ​ຄຳ​ໄຊ. ດັ່ງ​ນັ້ນ, ໃນວັນທີ 16 ມິຖຸນາຜ່ານ​ມານີ້ ຢູ່ຫ້ອງປະຊຸມພະ​ແນກ​ດັ່ງ​ກ່າວ ໄດ້ຈັດກອງປະຊຸມສ້າງແຜນກຳນົດພະນັກງານນຳພາຄຸ້ມຄອງຂຶ້ນ ໃຫ້ກຽດເຂົ້າຮ່ວມມີ ທ່ານ ຄຳໄຊ ເຊ່ຍຢີ້ງຢ່າງ ຫົວໜ້າກົມຈັດຕັ້ງພະນັກງານ ກະຊວງ ຮ​ສ​ສ, ທ່ານ ລຳເງິນ ສາຍນໍລາດ ຫົວໜ້າພະແນກ ຮ​ສ​ສ ແຂວງ ແລະ ພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

ກອງປະຊຸມຄັ້ງນີ້, ແມ່ນເປັນການເລືອກເຟັ້ນພະນັກງານ ທີ່ມີຄວາມຮູ້-ຄວາມສາມາດ ມີຄຸນນະພາບເຂົ້າໃນຕໍາແໜ່ງງານນໍາພາ-ຄຸ້ມຄອງແຕ່ລະຂະແໜງ ໃຫ້ສອດຄ່ອງກັບວຽກງານ ໃນການສ້າງແຜນບໍາລຸງກໍ່ສ້າງພະນັກງານ ແລະ ສັບຊ້ອນເຂົ້າໃນໂຄງປະກອບຢ່າງເໝາະສົມ ການສ້າງແຜນກໍານົດພະນັກງານ ແມ່ນຄວາມຮັບຜິດຊອບໂດຍກົງ ຂອງຄະນະພັກແຕ່ລະຂັ້ນຕາມຂອບເຂດສິດໃນການແບ່ງຂັ້ນຄຸ້ມຄອງພະນັກງານປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ, ເພື່ອຄົ້ນຄວ້າເປົ້າໝາຍເຂົ້າໃນແຜນກໍານົດພະນັກງານ ແລະ ຕົກລົງຕາມສຽງສ່ວນຫຼາຍ ການສ້າງແຜນກໍານົດພະນັກງານ ຕ້ອງຢູ່ບົນພື້ນຖານກໍາແໜ້ນການເລັ່ງທວງຂອງໜ້າທີ່ການເມືອງໃນສະເພາະໜ້າ ແລະ ຍາວນານຂອງພັກ ແຜນພະນັກງານ ຕ້ອງເລີ່ມຈາກສະພາບຄວາມເປັນຈິງ ຂອງຖັນແຖວພະນັກງານ ຮັບປະກັນລັກສະນະເປີດກວ້າງ ແລະ ຄວາມຖືກຕ້ອງໂປ່ງໃສ ພາວະວິໄສ ຮອບດ້ານ ຍຸຕິທໍາ ຄໍານຶງເຖິງໂຄງປະກອບເພດ, ເຜົ່າ ແລະ ເລັ່ງໃສພະນັກງານໜຸ່ມ ໃຫ້ກວມອັດຕາສ່ວນຫຼາຍ ແລະ ຍັງໄດ້ຮັບຟັງການຜ່ານບົດສະຫຼຸບການຈັດຕັ້ງມະຕິເລກທີ 032/ກມສພ, ລົງວັນທີ 30 ມັງກອນ 2018 ວ່າດ້ວຍການສ້າງແຜນກໍານົດຕໍາແໜ່ງງານພະນັກງານນໍາພາຄຸ້ມຄອງ, ຜ່ານບົດແນະນໍາຂອງຄະນະຈັດຕັ້ງສູນກາງພັກເລກທີ 292/ຄຈສພ, ລົງວັນທີ 26 ເມສາ 2018 ວ່າດ້ວຍການຈັດຕັ້ງປະຕິບັດມະຕິເລກທີ 032/ກມສພ ແລະ ເຜີຍແຜ່ມະຕິກົມການເມືອງສູນກາງພັກ ເລກທີ 030/ກມສພ ລົງວັນທີ 3 ມັງກອນ 2018 ວ່າດ້ວຍມາດຕະຖານພະນັກງານນໍາພາ-ຄຸ້ມຄອງ ແລະ ດຳລັດ ເລກທີ 461/ລບ, ລົງວັນທີ 9 ຕຸລາ 2012 ວ່າດ້ວຍມາດຕະຖານຕຳແໜ່ງບໍລິຫານ ຂອງລັດຖະກອນແຫ່ງ ສປປ ລາວ. ກອງປະຊຸມຄັ້ງນີ້, ຈະໄດ້ດຳເນີນການທາບທາມ ໃນການກຳນົດພະນັກງານນຳພາ-ຄຸ້ມຄອງ 3 ຮອບ ແລະ ດຳເນີນໄປເປັນເວລາ 2 ວັນ.

(ຂ່າວ-ພາບ: ວຽງສະຫວັນ)