ຄະ​ນະພັກຮາກຖານຫ້ອງການສຶກສາທິການ ແລະ ກິລາ (ສ​ສກ) ເມືອງແບງ ແຂວງອຸດົມໄຊ ໄດ້ສຳເລັດກອງປະຊຸມໃຫຍ່ ຄັ້ງທີ I ເມື່ອ​ບໍ່​ດົນ​ມານີ້ ທີ່​ຫ້ອງ​ການ​ເມືອງ​ດັ່ງ​ກ່າວ ໂດຍການເຂົ້າຮ່ວມເປັນປະທານຂອງ ສະຫາຍ ຄໍາຈັນ ວາບົວແສງ ຮອງເລຂາພັກເມືອງແບງ, ມີບັນດາສະຫາຍຄະນະໜ່ວຍພັກ, ພ້ອມດ້ວຍຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.

ສະ​ຫາຍ​ ພົມມາ  ພົມມະຈັນ ​ ເລຂາພັກຮາກຖານ ຫ້ອງການສຶກສາທິການ ແລະ ກິລາເມືອງ  ໄດ້​ຜ່ານ​ບົດສໍາຫຼວດການນໍາພາລວມ ແລະ ຮ່າງບົດ​ລາຍ​ງານ​ການ​ເຄື່ອ​ນ​ໄຫວ​ວຽກ​ງານ​ຮາກ​ຖານ​ພັກຫ້ອງ​ສຶກ​ສາ-ກິ​ລາ​ເມືອງແບງ ໄລ​ຍະ 5 ປີ​ຜ່ານ​ມາ​ໃຫ້​ຮູ້​ວ່າ: ຮາກ​ຖານພັກ​ຫ້ອງການ​ສຶກ​ສາ​ທິ​ການ ແລະ ກິ​ລາ​ເມືອງແບງ ປະ​ກອບ​ມີ 3 ໜ່ວ​ຍ​ພັກຂຶ້ນ​ກັບ, ມີ​ສະ​ມາ​ຊິກ​ທັງ​ໝົດ 74 ສະ​ຫາຍ ຍິງ 24 ສະ​ຫາຍ. ​ຄະ​ນະ​ພັກໄດ້​ຖື​ເອົາ​ແນວ​ຄິດ​ການ​ເມືອງ​ເປັນ​ກົກ, ຈັດ​ຕັ້ງ​ເຜີຍ​ແຜ່, ເຊື່ອມ​ຊຶມ​ໂດຍ​ທາງ​ກົງ ແລະ ທາງ​ອ້ອມເຂົ້າ​ໃນ​ການ​ຝຶກ​ອົບ​ຮົມ, ກອງ​ປະ​ຊຸມ​ປະ​ຈຳ​ປີ, ລົງ​ພົບ​ປະ​ພະ​ນັກ​ງານ​ຄູ-ອາ​ຈານ​ໃນ​ການ​ສິດ​ສອນ ແລະ ອື່ນໆ​ ດ້ວຍຫຼາຍ​ວິ​ທີ ໂດຍ​ການ​ຈັດ​ຕັ້ງ​ເຊື່ອມ​ຊຶມ ສະ​ມາ​ຊິກ​ພັກ​ພະ​ນັກ​ງານ ຕະຫຼອດ​ຮອດ​ມະ​ຫາ​ຊົນ​ມີ​ຄວາມ​ເຂົ້​າ​ໃຈ, ມີ​ແນວ​ຄິດ​ທັດ​ສະ​ນະ​ການ​ເມືອງ​ດີ​, ສາ​ມາດ​ເປັນ​ເສ​ນາ​ທິ​ການ​ໃຫ້​ແກ່​ການ​ນຳ ໃນ​ການ​ຜັນ​ຂະ​ຫຍາຍ​ແນວ​ທາງ​ການ​ເມື​ອງ​ຂອງ​ພັກ​ໃຫ້​ຄູ, ນັກ​ຮຽນ.

ໃນ​ໂອ​ກາດນີ້, ຜູ້​ແທນກອງ​ປະ​ຊຸມ​ຍັງ​ໄດ້​ໃຊ້​ສິດ​ປະ​ຊາ​ທິ​ປະ​ໄຕ​ຢ່າງ​ເຕັມ​ສ່ວນ​ ປ່ອນ​ບັດ​ເລືອກ​ເອົາ​ຄະ​ນະ​ຮາກ​ຖານ​ພັກ​ຫ້ອງການ​ສຶກ​ສາ​ທິ​ການ ແລະ ກິ​ລາ​ເມືອງ​ຊຸດ​ໃໝ່ ຊຶ່ງ​ມີ​ຜູ້​ລົງ​ສະ​ໝັກ​ 7 ສະ​ຫາຍ, ເລືອກ​ເອົາ 5 ສະ​ຫາຍ ກອງ​ປະ​ຊຸມ​ປະ​ຖົມ​ມະ​ລືກ ໄດ້​ເຫັນ​ດີ​ເປັນ​ເອ​ກະ​ພາບເລືອກ​ເອົາ​ສະ​ຫາຍ ​ພົມມາ ພົມມະຈັນ ເປັນ​ເລ​ຂາ​ພັກ​ຮາກ​ຖານ, ສະ​ຫາຍ ວຽງອຸດົມ ແກ້ວກັນຍາ ເປັນ​ຮອງ​ ທັງເປັນປະທານກວດກາ​, ສະ​ຫາຍ ອຸ່ນຄໍາ ສຸກສະຫັວດ ເປັນຮອງ, ສະຫາຍ ໄມ່ເສົາ ທະນົມພອນ ເປັນຮອງປະທານກວດກາ ແລະ ສະຫາຍ ບຸນຖົມ ສຸດທິວົງ ຄະນະກວດກາພັກຮາກຖານ.

ກອງປະຊຸມໄດ້ຮັບຟັງການໂອ້ລົມຈາກ ສະຫາຍ ຄໍາຈັນ ວ່າບົວແສງ ເພື່ອເປັນທິດທາງໃນການຈັດຕັ້ງປະຕິບັດ ວຽກງານໃນຕໍ່ໜ້າໃຫ້ປະກົດຜົນເປັນຈິງ ແລະ ມີຄວາມໜັກແໜ້ນເຂັ້ມແຂງ.

(ຂ່າວ: ກິ່ງມະນີ ສຸລິຍາ, ພາບ: ສັນຍາ ທອງມະນີ)