ພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຄັ້ງທີ II ປະຈໍາປີ 2020 ໃຫ້ 7 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກສາທາລະນະສຸກ ແຂວງສາລະວັນ ໄດ້ຈັດຂຶ້ນເມື່ອບໍ່​ດົນມານີ້ ທີ່ພະແນກດັ່ງກ່າວ ໂດຍການເຂົ້າຮ່ວມຂອງສະຫາຍ ສົມໃຈ ອຸ່ນຈິດ ຄະນະປະຈໍາພັກແຂວງ ຮອງເຈົ້າແຂວງ ຜູ້ຊີ້ນໍາວຽກງານວັດທະນະທໍາ-ສັງຄົມ, ສະຫາຍ ອາຄົມ ລໍ່າວິຈິດ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກສາທາລະນະສຸກແຂວງ ມີແຂກ​ຖືກ​ເຊີນ ແລະ ສະມາຊິກພັກເຂົ້າຮ່ວມ.

ສະຫາຍ ບຸນກອງ ໄຊສົມບັດ ເລຂາໜ່ວຍພັກອະນາໄມສົ່ງເສີມສຸຂະພາບ, ອາຫານ ແລະ ຢາ ໄດ້ຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020 ຊຶ່ງໄດ້ຈັດຕັ້ງປະຕິບັດວຽກງານດັ່ງກ່າວມີຜົນສຳເລັດໃນແຕ່ລະດ້ານ ສາມາດປະຕິບັດໄດ້ຕາມເນື້ອໃນມາດຖານເງື່ອນໄຂ ຂອງຄະນະພັກຂັ້ນເທິງວາງອອກກໍຄື: ທິດທາງແຜນການຂອງໜ່ວຍພັກຕົນກໍານົດໄວ້ ແລະ ໄດ້ປະເມີນນຳພາດ້ານຄຸນທາດການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນການນຳພາ, ດ້ານປະຕິບັດໜ້າທີ່ການເມືອງໄດ້ເປັນຢ່າງດີ ໂດຍໄດ້ຖືເອົາການສຶກສາອົບຮົມການເມືອງ-ແນວຄິດ, ເຊືີ່ອມຊຶມບັນດາມະຕິ, ຄຳສັ່ງ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ສະເເດງອອກໃນການຈັດຕັ້ງປະຕິບັດວຽກງານວິຊາສະເພາະຢູ່ບັນດາໜ່ວຍງານທີ່ຂຶ້ນກັບການນໍາພາຂອງແຕ່ລະໜ່ວຍພັກ ແນໃສ່ສ້າງໃຫ້ພະນັກງານສະມາຊິກພັກ ມີຄຸນທາດການເມືອງໜັກແໜ້ນ, ພັດທະນາຂະແໜງການຂອງຕົນໃຫ້ມີບາດກ້າວຂະຫຍາຍຕົວຢ່າງຕໍ່ເນື່ອງ, ເອົາໃຈໃສ່ຕິດຕາມ, ກວດກາ ແລະ ແກ້ໄຂຜົນການດໍາເນີນຊີວິດການເມືອງດ້ວຍຄວາມຮັບຜິດຊອບສູງ ແລະ ສໍາເລັດ, ປັບປຸງກໍ່ສ້າງໜ່ວຍພັກຂອງຕົນໃຫ້ມີຄວາມປອດໃສ, ເ​ຂັ້ມແຂງ, ໜັກແໜ້ນ.

7 ໜ່ວຍພັກທີ່ໄດ້ຮັບການຢັ້ງຢືນເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ຄັ້ງທີ II ຕໍ່ເນື່ອງ ປະຈໍາປີ 2020 ມີຄື: ໜ່ວຍພັກຫ້ອງການບໍລິຫານພະແນກສາທາລະນະສຸກ, ໜ່ວຍພັກອະນາໄມ, ສົ່ງເສີມສຸຂະພາບອາຫານ ແລະ ຢາ, ໜ່ວຍພັກກັນພະຍາດຄວບຄຸມພະຍາດຕິດຕໍ່, ໜ່ວຍພັກຫ້ອງການບໍລິຫານໂຮງໝໍແຂວງ, ໜ່ວຍພັກປິ່ນປົວພາຍໃນໂຮງໝໍແຂວງ, ໜ່ວຍພັກປິ່ນປົວພາຍນອກໂຮງໝໍ ແລະ ໜ່ວຍພັກສູນອົບຮົມ ຮສຂ (ໂຮງຮຽນແພດ) ຊຶ່ງໃຫ້ກຽດມອບໂດຍ ສະຫາຍ ສົມໃຈ ອຸ່ນຈິດ.

(ຂ່າວ-ພາບ: ກິນດາວັນ ອ້ວນນາຄູ)