ທ່ານ ຄຳ​ແພງ ໄຊ​ສົມ​ແພງ ລັດ​ຖະ​ມົນ​ຕີ​ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ (ອ​ຄ) ພ້ອມ​ຄະນະໄດ້​ລົງ​ໄປ​ເຄື່ອນໄຫວເຮັດວຽກຢູ່ແຂວງ​ເຊກອງເມື່ອ​ບໍ່​ດົນ​ມາ​ນີ້. ການ​ລົງ​ຢ້ຽມ​ຢາມ​ແຂວງ​ເຊກອງ​ຄັ້ງ​ນີ້ທ່ານລັດ​ຖະ​ມົນ​ຕີ​ກະ​ຊວງ ອ​ຄ ໄດ້ພົບ​ປະ​​ກັບ ທ່ານ ເຫຼັກໄຫຼ ສີ​ວິ​ໄລ ເຈົ້າແຂວງເຊກອງ, ຫຼັງ​ຈາກ​ນັ້ນ​ໄດ້​ເດີນ​ທາງ​ໄປ​ຢ້ຽມ​ຢາມ​ເບິ່ງບໍ່ຖ່ານຫີນຂອງ ບໍລິສັດ ພອນສັກກຣຸບ ທີ່ຕັ້ງ​ຢູ່​ເຂດເມືອງກະລຶມເກົ່າ ຂອງແຂວງເຊກອງ, ທ່ານ ພອນສັກ ວິໄລສັກ ປະ​ທານ​ກຸ່ມ ບໍ​ລິ​ສັດ ພອນສັກ ລາຍງານການຈັດຕັ້ງປະຕິບັດ ແລະ ສະພາບລວມຂອງບໍ່ຖ່ານຫີນໃຫ້​ຮູ້​ວ່າ: ມາຮອດປັດຈຸບັນການຂຸດຄົ້ນບໍ່ຖ່ານ​ຫີນສາມາດຂຸດຄົ້ນໄດ້ 2 ລ້ານກວ່າໂຕນ, ​ຈຸດປະສົງຫຼັກໃນການຂຸດຄົ້ນກໍເພື່ອສ້າງຕັ້ງໂຮງງານພະລັງງານໄຟຟ້າຄວາມຮ້ອນຖ່ານຫີນ 1.800 ເມກາວັດ ເພື່ອສົ່ງໄປຍັງປະເທດກຳປູເຈຍ ຕາມການຕົກລົງຂອງລັດຖະບານ ແລະ ສົ່ງອອກໄປຍັງປະເທດຫວຽດນາມ.

ຈາກນັ້ນ, ໃນວັນທີ 2 ກໍລະກົດ 2021 ນີ້ ທ່ານ ສົມແພງ ໄຊສົມແພງ ພ້ອມຄະນະ ລົງຢ້ຽມຢາມ ແລະ ໂອ້​ລົມ​ພະ​ນັກ​ງານຢູ່ພະແນກອຸດສາຫະກຳ ແລະ ການຄ້າແຂວງເຊກອງ ຊຶ່ງໄດ້ຮັບຟັງການລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານການພັດທະນາຂະແໜງອຸດສະຫະກຳ ແລະ ການຄ້າແຂວງເຊກອງ ໄລຍະ 6 ເດືອນຕົ້ນປີຜ່ານມາ ດ້ານອຸດສະຫະກຳປຸງແຕ່ງ ແລະ ຫັດຖະກຳແມ່ນສາມາດປະຕິບັດໄດ້ 115,31 ຕື້ກີບ ເທົ່າ​ກັບ 84,16% ຂອງແຜນການປີ ໃນນັ້ນ        ໝວດປະເພດການຜະລິດອຸດສາຫະກຳປຸງແຕ່ງຈາກຜົນຜະລິດກະສິກຳກວມເອົາ 83,99% ເປັນຕົ້ນແມ່ນມັນຕົ້ນ,ກາເຟແລະ ຢາງພາລາ,ຮອງລົງມາແມ່ນຜະລິດຕະພັນໄມ້, ຫັດຖະກຳ ແລະ ເຄື່ອງດື່ມສະບຽງອາຫານອື່ນໆ, ທົ່ວແຂວງເຊກອງມີໂຮງງານອຸດສະຫະກຳປຸງແຕ່ງໄມ້ທັງໝົດ 30 ຫົວໜ່ວຍ, ໃນນັ້ນໂຮງງານອຸດສະຫະກຳປຸງແຕ່ງໄມ້ປະເພດ 2 (ໂຮງງານຂະໜາດກາງ) ມີ 8 ຫົວໜ່ວຍ, ໂຮງງານປຸງແຕ່ງໄມ້ປະເພດ 3 (ໂຮງງານເຟີນີເຈີ) ມີ 22 ຫົວໜ່ວຍ, ມາຮອດປັດຈຸບັນ ໂຮງງານອຸດສະຫະກຳປຸງແຕ່ງ ແລະ ຫັດຖະກຳຢູ່ແຂວງມີຈຳນວນທັງໝົດ 463 ຫົວໜ່ວຍ.

ດ້ານການຄ້າພາຍໃນ ແມ່ນສາມາດປະຕິບັດໄດ້ 122,15 ຕື້ກີບ ເທົ່າກັບ 98,69%, ຂອງແຜນການປີທີ່ວາງໄວ້, ມູນຄ່າຂາຍຍົກ-ຂາຍຍ່ອຍ 33,20 ຕື້ກີບ, ມູນຄ່າເຄື່ອນຍ້າຍພາຍໃນ 88,94 ຕື້ກີບ, ໝວດສິນຄ້າທີ່ມີມູນຄ່າກວມເອົາເປີເຊັນສູງ ແມ່ນໝວດສິນຄ້າຜະລິດຕະພັນດ້ານກະສິກຳ, ເຄື່ອງກໍ່ສ້າງ, ສະບຽງອາຫານ ແລະ ສິນຄ້າເພື່ອຮັບໃຊ້ການຜະລິດກະສິກຳອື່ນໆ.

ດ້ານວຽກງານສົ່ງເສີມວິສາຫະກິດຂະໜາດນ້ອຍ, ກາງ ແລະ ການຄ້າ ແມ່ນໄດ້ຈັດຕັ້ງປະຕິບັດໄປຕາມ 7 ຂົງເຂດນະໂຍບາຍຄື: ວຽກງານສົ່ງເສີມວິສາຫະກິດຂະໜາດນ້ອຍ ແລະ ກາງມີທັງໝົດ 278 ຫົວໜ່ວຍ (ຈຸນລະວິສາຫະກິດ 49 ຫົວໜ່ວຍ, ວິສາຫະກິດຂະໜາດນ້ອຍ 170 ຫົວໜ່ວຍ, ວິສາຫະກິດຂະໜາດກາງ 59 ຫົວໜ່ວຍ) ນອກນີ້ ກຳລັງສະເໜີຮັບຮອງເອົາຫັດຖະກຳຕ່ຳແຜ່ນແພພື້ນເມືອງຊົນເຜົ່າກະຕູ ບ້ານກັນດອນ ແລະ ຊົນເຜົ່າກຣຽງ ບ້ານຫ້ວຍຊາຍ ໃຫ້ເປັນໜຶ່ງເມືອງ ໜຶ່ງຜະລິດຕະພັນ (ODOP).

ທ່ານ ຄຳແພງ ໄຊສົມແພງ ໄດ້ເນັ້ນໃຫ້​ແຂວງ​ເຊກອງ ສຸມໃສ່ການສົ່ງເສີມການຜະລິດ-ບໍລິການເພື່ອຊົມໃຊ້ພາຍໃນ, ຫຼຸດຜ່ອນການນຳເຂົ້າ ແລະ ເປັນສິນຄ້າສົ່ງອອກ (ຫັນປ່ຽນໄປສູ່ສັງຄົມການຜະລິດ) ສ້າງສະພາບແວດລ້ອມທີ່ເອື້ອອຳນວຍແກ່ການດຳເນີນທຸລະກິດ, ຫຼຸດຜ່ອນຂັ້ນຂອດ ແລະ ໄລຍະເວລາໃນການອະນຸຍາດດໍາເນີນທຸລະກິດ ແລະ ສ້າງຄວາມສະດວກໃນຂອດການຈໍລະຈອນສິນຄ້າ ຊຶ່ງຕິດພັນກັບວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ ທີ່ລັດຖະບານພວມຂຸ້ນຂ້ຽວ ຊີ້ນຳເພື່ອຈັດຕັ້ງປະຕິບັດໃນປັດຈຸບັນ.

(ຂ່າວ-ພາບ: ອ​ຄ)