ໜັງສືພິມ ປະຊາຊົນ

ຄະນະໂຄສະນາອົບຮົມສູນກາງພັກ ຈັດຕັ້ງເຊື່ອມຊຶມມະຕິ XI ແລະ ກົດລະບຽບສະໄໝທີ XI ຂອງພັກ

ເຜີຍແຜ່ໂດຍ: ທ່ານ ທອງດຳ ມິໂຍລາ ເວລາ: 09/07/2021 11:03:39 ຈຳນວນຢ້ຽມຊົມ 2676 ຄັ້ງ

ໃນວັນທີ 7 ກໍລະກົດຜ່ານມານີ້ ທີ່ສະໂມສອນໃຫຍ່ ຄະນະໂຄສະນາອົບຮົມສູນກາງພັກ ໄດ້ຈັດຕັ້ງກອງປະຊຸມເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວຂຶ້ນ ໂດຍການເຜີຍແຜ່ ຂອງສະຫາຍ ຄຳພັນ ເຜີຍຍະວົງ ຫົວໜ້າຄະນະໂຄສະນາອົບຮົມສູນກາງພັກ ມີບັນດາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ຫົວໜ້າກົມ, ຮອງກົມ, ຫົວໜ້າພະແນກ, ຮອງຫົວໜ້າພະແນກ ເຂົ້າຮ່ວມຮັບຟັງ, ໃນກອງປະຊຸມດັ່ງກ່າວໄດ້ເຊື່ອມຊຶມ 3 ເອກະສານສຳຄັນຂອງພັກຄື: ເອກະສານມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຕິດພັນກັບວຽກງານໂຄສະນາອົບຮົມ ແລະ ກົດລະບຽບຂອງພັກປະຊາຊົນປະຕິວັດລາວ ສະໄໝທີ XI, ເອກະສານທັງໝົດທີ່ເຊື່ອມຊຶມນີ້ ກໍເພື່ອແນໃສ່ໃຫ້ພະນັກງານ-ສະມາຊິກພັກທຸກສະຫາຍໄດ້ຮັບການເຊື່ອມຊຶມຢ່າງທົ່ວເຖິງ ເພື່ອສ້າງຄວາມຮັບຮູ້ເຂົ້າໃຈເປັນເອກະພາບທາງດ້ານທັດສະນະ, ທາງດ້ານການເມືອງ-ແນວຄິດ, ເພື່ອນຳໄປຈັດຕັ້ງຜັນຂະຫຍາຍເຂົ້າໃນວຽກງານວິຊາສະເພາະ ແລະ ສາມາດເຮັດໃຫ້ຜູ້ທີ່ເຊື່ອມຊຶມມີການຫັນປ່ຽນຢ່າງແຂງແຮງ, ເລິກເຊິ່ງຮອບດ້ານ.

ຈາກນັ້ນ, ສະຫາຍ ຄຳພັນ ເຜີຍຍະວົງ ກໍໄດ້ເນັ້ນຕື່ມກ່ຽວກັບວຽກງານວິຊາສະເພາະ ໂດຍໃຫ້ສືບຕໍ່ເອົາໃຈໃສ່ຕໍ່ວຽກງານການເມືອງ-ແນວຄິດ ກໍຄືວຽກງານໂຄສະນາອົບຮົມໃຫ້ມີຄວາມໜັກແໜ້ນ, ເຂັ້ມແຂງ ແລະ ພ້ອມນຳເອົາໄປຈັດຕັ້ງຜັນຂະຫຍາຍເຊື່ອມຊຶມ ແກ່ພະນັກງານທີ່ເຮັດວຽກງານການເມືອງ-ແນວຄິດຢ່າງເລິກເຊິ່ງທົ່ວເຖິງ ດ້ວຍຫຼາກຫຼາຍວິທີ, ຫຼາຍຮູບຫຼາຍສີ, ເພື່ອພ້ອມກັນບຸກທະລຸດ້ານຈິນຕະນາການໃຫ້ປະກົດຜົນເປັນຈິງ, ພ້ອມນັ້ນ ກໍຕ້ອງຍົກສູງຄວາມຮັບຜິດຊອບຂອງຕົນຕໍ່ໜ້າທີ່ການເມືອງທີ່ພັກມອບໝາຍໃຫ້ມີຜົນສຳເລັດຢ່າງສະຫງ່າງາມ.