ຄະນະບໍລິຫານງານພັກກະຊວງແຮງງານ ແລະ ສະຫວັດດີການ-ສັງຄົມ (ຮສສ) ໄດ້ຈັດກອງປະຊຸມຄົບຄະນະພັກເປີດກວ້າງຄັ້ງທີ 1 ສະໄໝທີ VI ປະຈຳ 6 ເດືອນຕົ້ນປີ 2021 ຂຶ້ນໃນວັນທີ 13 ກໍລະກົດນີ້ ທີ່ເຮືອນຮັບແຂກກະຊວງ ຮສສ ໂດຍພາຍໃຕ້ການເປັນປະທານຂອງ ສະຫາຍນາງ ໃບຄຳ ຂັດທິຍະ ກຳມະ

ການສູນກາງພັກ ເລຂາຄະນະພັກ ລັດຖະມົນຕີກະຊວງ ຮສສ, ມີຄະນະປະຈຳພັກ, ກຳມະການພັກກະຊວງ, ພະນັກງານຫຼັກແຫຼ່ງກ່ຽວຂ້ອງເຂົ້າຮ່ວມ.

      ສະຫາຍນາງ ໃບຄຳ ຂັດທິຍະ ກ່າວວ່າ: ກອງປະຊຸມຄັ້ງນີ້ແມ່ນເປັນການສະຫຼຸບຕີລາຄາການຊີ້ນໍາໆພາຮອບດ້ານ ດ້ານດີ, ດ້ານອ່ອນ, ຂໍ້ຄົງຄ້າງ ໃນການນໍາພາ-ຊີ້ນຳຈັດຕັ້ງຜັນຂະຫຍາຍ ແລະ ປະຕິບັດແນວທາງນະໂຍບາຍຂອງພັກ-ລັດ ເປັນຕົ້ນແມ່ນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກກຊວງ ຮສສ ແລະ ແຜນພັດທະນາວຽກງານ ຮສສ 6 ເດືອນຕົ້ນປີ 2001 ຜ່ານມາ, ເພື່ອພ້ອມກັນຊອກໃຫ້ເຫັນບັນດາສາເຫດທີ່ພາໃຫ້ມີຈຸດດີ, ຈຸດອ່ອນ, ຂໍ້ຄົງຄ້າງເພື່ອພ້ອມກັນຊອກຫາວິທີແກ້ໄຂຢ່າງຖືກຕ້ອງ ແນໃສ່ຮັບປະກັນກໍ່ສ້າງ ແລະ ປັບປຸງພັກ ເວົ້າລວມ, ກໍ່ສ້າງ ແລະ ປັບປຸງອົງຄະນະພັກກະຊວງ ຮສສ ໃຫ້ປອດໃສ, ເຂັ້ມແຂງ, ໜັກແໜ້ນທາງດ້ານການເມືອງ, ການຈັດຕັ້ງ ແລະ ແບບແຜນນຳພາ. ພ້ອມກັນນັ້ນ, ກອງປະຊຸມຍັງຈະໄດ້ພ້ອມກັນຄົ້ນຄວ້າປະກອບຄຳເຫັນໃສ່ທິດທາງແຜນການວຽກງານຈຸດສຸມ 6 ເດືອນທ້າຍປີ 2021 ແລະເອກະສານສໍາຄັນອື່ນໆຈໍານວນໜຶ່ງ.

     ສະນັ້ນ, ເພື່ອຮັບປະກັນເຮັດໃຫ້ການຕີລາຄາບັນດາບັນຫາຕ່າງໆ ຢ່າງຖືກຕ້ອງພາວະວິໄສ, ບັນລຸຕາມຈຸດປະສົງລະດັບຄາດໝາຍທີ່ວາງໄວ້ນັ້ນ, ຮຽກຮ້ອງບັນດາສະຫາຍຈົ່ງໄດ້ພ້ອມກັນຍົກສູງຄວາມຮັບຜິດຊອບການເມືອງຂອງຕົນ, ເສີມຂະຫຍາຍສິດປະຊາທິໄຕ ແລະ ສຸມສະຕິປັນຍາເຂົ້າໃນການຄົ້ນຄວ້າປະກອບຄຳເຫັນຕໍ່ບັນດາເອກະສານສຳຄັນຕ່າງໆຂອງກອງປະຊຸມຢ່າງເລິກເຊິ່ງ, ພ້ອມກັນຊອກໃຫ້ເຫັນຜົນງານດ້ານດີ ທີ່ຈະຕ້ອງໄດ້ເສີມຂະຫຍາຍ, ດ້ານອ່ອນ, ຂໍ້ຄົງຄ້າງ ແລະ ສາເຫດຕົ້ນຕໍທີ່ຈະຕ້ອງໄດ້ພ້ອມກັນແກ້ໄຂຢ່າງຖືກຕ້ອງ, ບົນຈິດໃຈຄວາມເປັນເອກະພາບທາງດ້ານທັດສະນະແນວຄິດ ແລະ ຄວາມຮັບຜິດຊອບຂອງຄະນະພັກ.

(ຂ່າວ: ພູວັນ - ພາບ: ວັນເພັງ)