ທ່ານ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກຳ ແລະ ການຄ້າ (ອຄ) ໄດ້ຕ້ອນຮັບ ທ່ານ ນາງ  ຟລໍ ຣອງສ ຊັອງບລັອງ-ຣີສແລກ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງຝຣັ່ງ ປະຈໍາ ສປປ ລາວ ເຂົ້າຢ້ຽມຂໍ່ານັບອຳລາ ໃນວັນທີ 16 ກໍລະກົດນີ້ ທີ່ກະຊວງດັ່ງກ່າວ ໃນໂອກາດສຳເລັດການປະຕິບັດໜ້າທີ່ການທູດປະຈຳລາວ.

      ໃນໂອກາດດັ່ງກ່າວທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງຕໍ່ທ່ານທູດ ທີ່ສຳເລັດການປະຕິບັດໜ້າທີ່ການທູດປະຈຳລາວຄັ້ງນີ້ ຕະຫຼອດໃນໄລຍະການປະຕິບັດໜ້າທີ່ທ່ານທູດແມ່ນໄດ້ເອົາໃຈໃສ່ຢ່າງຕັ້ງໜ້າເຂົ້າໃນການປະກອບສ່ວນເສີມຂະຫຍາຍສາຍພົວພັນຮ່ວມມື ແລະ ຊ່ວຍເຫຼືອຊຶ່ງກັນ ແລະ ກັນ ລະຫວ່າງລາວ-ຝຣັ່ງທີ່ມີມາແລ້ວນັ້ນໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ, ທ່ານລັດຖະມົນຕີຍັງໄດ້ອວຍພອນໃຫ້ທ່ານທູດຈົ່ງປະສົບຜົນສຳເລັດໃນໜ້າທີ່ໃໝ່ ແລະ ເດີນທາງກັບຄືນປະເທດດ້ວຍສະຫວັດດີພາບ.

       ທ່ານທູດໄດ້ສະແດງຄວາມຂອບໃຈຕໍ່ ທ່ານລັດຖະມົນຕີທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຂອບໃຈຕໍ່ອົງການຈັດຕັ້ງຂອງລາວທຸກຂັ້ນ ທີ່ໄດ້ອຳນວຍຄວາມສະດວກໃນການປະຕິບັດໜ້າທີ່ການທູດຢູ່ ສປປ ລາວ ໄດ້ຮັບຜົນສຳເລັດເປັນຢ່າງດີ.

      ການ​ພົວພັນ​ການ​ຄ້າ ​ແລະ ການ​ລົງທຶນ ລະຫວ່າງ ລາວ ​ແລະ ຝຣັ່ງ ​ໃນ​ໄລຍະ​ຜ່ານ​ມາ ແມ່ນ​ຈັດ​ຕັ້ງ​ປະຕິບັດ​ຕາມ ສັນຍາລົງທຶນສອງຝ່າຍ (Bilateral Investment Agreement) ແລະ ສິດທິພິເສດທາງການຄ້າເຊັ່ນ EBA (Everything But Arms) ທີ່ EU ໄດ້ໃຫ້ແກ່ບັນດາປະເທດດ້ອຍພັດທະນາ, ໃນໄລຍະ 5 ປີ​ທີ່​ຜ່ານ​ມາຝຣັ່ງເປັນຄູ່​ຄ້າ​ ອັນ​ດັບ 24 ຂອງ ສປປ ລາວ (ດ້ານ​ການ​ສົ່ງ​ອອກ​) ​ແລະ ອັນ​ດັບ 19 (ດ້ານ​ການ​ນຳ​ເຂົ້າ). ບັນດາ​ສິນຄ້າ​ຫຼັກ ທີ່ ສປປ ລາວ ສົ່ງ​ອອກ ​ແລະ ນຳ​ເຂົ້າ​ ປະກອບ​ມີ: ສິນຄ້າ​ຫຼັກ​ທີ່​ສົ່ງ​ອອກ​ໄປຝຣັ່ງມີ: ເຄື່ອງ​ນຸ່ງ​ຫົ່ມ, ກາ​ເຟ (ບໍ່​ທັນ​ໄດ້ປຸງ​ແຕ່ງ), ເກີບ, ເຂົ້າ, ເຄ​ມີ ແລະ ສານ​ປະ​ກອບ​ອະ​ນິນ​ຊີ, ຂີ້ຄັ່ງ, ຍານຂີ້ຊີ, ນ້ຳ​ຕານ, ຢາ​ສູບ, ເມັດ​ພືດ, ໝາກ​ໄມ້​ທີ່​ມີນ້ຳ​ມັ​ນ, ເຟືອງ ແລະ ຫຍ້າ, ເຫຼົ້າ-ເບຍ-ວາຍ, ຊາ (ບໍ່​ທັນ​ໄດ້ປຸງ​ແຕ່ງ) ​ແລະ ອື່ນໆ. ສິນຄ້າ​ຫຼັກ​ທີ່​ນຳ​ເຂົ້າຈາກຝຣັ່ງມີພາຫະນະທາງອາກາດ ແລະ ຊິ້ນສ່ວນອາໄຫຼ່, ເຫຼົ້າ-ເບຍ-ວາຍ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຄື່ອງມື ແລະ ອຸປະກອນທັດສະນະສາດ, ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້), ນໍ້າຫອມ-ເຄື່ອງສຳອາງ, ຜະລິດຕະພັນການຢາ (ເພສັດຊະກໍາ), ເຄື່ອງໄຟຟ້າ ແລະ ອຸປະກອນໄຟຟ້າ, ສິ່ງ​ປຸງ​ແຕ່ງ​ອື່ນໆທີ່​ບໍ​ລິ​ໂພກ​ໄດ້, ອຸປະກອນການແພດ, ເຈ້ຍ ແລະ ເຄື່ອງໃຊ້ທີ່ເຮັດດ້ວຍເຫຍື່ອເຈ້ຍ ​ແລະ ອື່ນໆ, ນັບແຕ່ປີ 2008 ຮອດປັດຈຸບັນ ຝຣັ່ງຖືເປັນປະເທດທີ່ມີການລົງທຶນໃນ ສປປ ລາວ ມີມູນຄ່າຫຼາຍທີ່ສຸດຢູ່ອັນດັບທີ 6 ໂດຍມີຈໍານວນວິສາຫະກິດທັງໝົດ 182 ຫົວໜ່ວຍ ແລະ ມູນຄ່າການລົງທຶນ 5.651,27 ຕື້ກີບ ຫຼື ປະມານ 706,41 ລ້ານໂດລາ. ຂະແໜງການທີ່ ຝຣັ່ງໃຫ້ຄວາມສົນໃຈລົງທຶນໃນ ສປປ ລາວ ມີມູນຄ່າລົງທຶນຫຼາຍສຸດ ແມ່ນຂະແໜງການສະໜອງໄຟຟ້າ, ອາຍແກັສ, ອາຍຮ້ອນ ແລະ ອາກາດປັບແຕ່ງ, ຂະແໜງອຸດສາຫະກຳບໍ່ແຮ່ ແລະ ການຂຸດຄົ້ນ, ຂະແໜງການເຄື່ອນໄຫວ ດ້ານການເງິນ ແລະ ການປະກັນໄພ, ແລະ ຂະແໜງການຄ້າຂາຍຍົກ ແລະ ຂາຍຍ່ອຍ, ສ້ອມແປງລົດຍົນ ແລະ ລົດຈັກ. (ຂ່າວ+ພາບ: ສຳນານ)