ກອງປະຊຸມທາບທາມບຸກຄະລາກອນເຂົ້າໃນໂຄງປະກອບຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 2 ໄດ້ຈັດຂຶ້ນເມື່ອບໍ່​ດົນ​ມານີ້ ທີ່ຫ້ອງປະຊຸມສະຫະພັນແມ່ຍິງແຂວງ ໂດຍການເຂົ້າຮ່ວມເປັນປະທານຂອງສະຫາຍ  ສົມໃຈ ພານີຈັນ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີສະຫາຍ ນາງ ບັງອອນ ໄຊຍະສິດ ກຳມະການປະຈຳພັກແຂວງ ຮອງປະທານສະພາປະຊາຊົນແຂວງ, ມີ​ພາກ​ສ່ວນ​ກ່ຽວ​ຂ້ອງອ້ອມຂ້າງແຂວງເຂົ້າຮ່ວມ.

ໃນວາລະກອງປະຊຸມສະຫາຍ ນາງ ກຽນຕາ ວັນມະນາ ປະທານສະຫະພັນແມ່ນຍິງແຂວງກໍໄດ້ຂຶ້ນຜ່ານແຈ້ງການຂອງສູນກາງສະຫະພັນແມ່ນຍິງລາວ ສະບັບເລກທີ 286/ສສຍລ, ລົງວັນທີ 9 ກໍລະກົດ 2021 ວ່າດ້ວຍການຈັດຕັ້ງທາບທາມບຸກຄະລາກອນ ຮອບທີ II  ເພື່ອຄັດເລືອກເປົ້າໝາຍສະໝັກເຂົ້າໃນໂຄງປະກອບຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ພ້ອມທັງຜ່ານບົດແນະນໍາກ່ຽວກັບການທາບທາມບຸກຄະລາກອນ ສະໝັກເລືອກຕັ້ງເຂົ້າໃນໂຄງປະກອບຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 2. ຈາກນັ້ນ, ຕາງໜ້າຄະນະຈັດຕັ້ງແຂວງ ໄດ້ຜ່ານແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 104/ ຄຈສພ, ລົງວັນທີ 12 ກໍລະກົດ 2021 ວ່າດ້ວຍ ສົມທົບທາບທາມບຸກຄະລາກອນສະໝັກເລືອກຕັ້ງເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 2 ແລະ ຂໍ້ຕົກລົງວ່າດ້ວຍມາດຖານເງື່ອນໄຂຂອງພະນັກງານເພດຍິງທີ່ຈະສະໝັກເຂົ້າເປັນຄະນະບໍລິຫານງານສູນກາງສະຫະພັນແມ່ຍິງລາວສະໄໝທີ VIII.

 ສະຫາຍ ສົມໃຈ ພານີຈັນ ໄດ້ເນັ້ນໜັກໃຫ້ບັນດາຜູ້ເຂົ້າຮ່ວມ​ກອງ​ປະ​ຊຸມ​ຄັ້ງ​ນີ້, ຈົ່ງພ້ອມກັນເຊີດຊູຄວາມຮັບຜິດຊອບເອົາໃຈໃສ່ເປັນເຈົ້າການໃນການຄົ້ນຄວ້າພິຈາລະນາຄັດເລືອກເອົາບຸກຄະລາກອນທີ່ສະໝັກເລືອກຕັ້ງເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 2, ໃຫ້ຖືກຕ້ອງຕາມລະບຽບຫຼັກການ ແລະ ບັນດາເງື່ອນໄຂມາດຖານທີ່ໄດ້ກຳນົດໄວ້, ພ້ອມດຽວກັນນັ້ນ ກອງປະຊຸມກໍໄດ້ດໍາເນີນການປ່ອນບັດທາບທາມ ຊຶ່ງມີບັນດາຜູ້ສະໝັກຮັບເລືອກຕັ້ງເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 2 ມີຈໍານວນທັງໝົດ 71 ສະຫາຍ. ໃນນັ້ນ, ເລືອກເອົາ 68 ສະຫາຍ.

(ຂ່າວ-ພາບ: ແດງສະຫວັດ ແສນພານິດ).