​​ໃນວັນ​ທີ 22 ກໍລະກົດນີ້ ທີ່​​ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ (ຄຕພ), ທ່ານ ທອງສະຫວັນ ພົມວິຫານ ກໍາມະການສູນກາງພັກ ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຕ້ອນຮັບການ​ເຂົ້າ​ຢ້ຽມ​ຂໍ່ານັບ​ຂອງ ​ທ່ານ  ໂພລ ເຄລີ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ອົສຕຣາລີ ປະຈໍາ ລາວ.

​​​ໃນການພົບປະຄັ້ງນີ້, ທ່ານທູດ​ໄດ້ສະ​ແດງ​ຄວາມຊົມເຊີຍ ເນື່ອງໃນໂອກາດທີ່ ທ່ານ ທອງສະຫວັນ ພົມວິຫານ ໄດ້ຮັບການເລືອກຕັ້ງເປັນກໍາມະການສູນກາງພັກ ແລະ ໄດ້ຮັບການແຕ່ງຕັ້ງເປັນ ຫົວໜ້າຄະນະພົວພັນຕ່າງປະເທດສູນກາງພັກ, ຊົມເຊີຍຜົນສໍາເລັດເບື້ອງຕົ້ນໃນການຄວບຄຸມການແຜ່ລະບາດຂອງພະຍາດໂຄວິດຂອງພັກ-ລັດ ແລະ ປະຊາຊົນລາວ, ພ້ອມຕີລາຄາສູງຕໍ່ການພົວພັນຮ່ວມມື ລະຫວ່າງ ອົສຕຣາລີ-ສປປ ລາວ ທີ່ມີການຂະຫຍາຍຕົວຢ່າງຕໍ່ເນື່ອງ ແລະ ໄດ້ຢືນຢັນຄວາມມຸ້ງຫວັງຂອງຕົນທີ່ຈະສືບຕໍ່ເຮັດວຽກຮ່ວມມືກັບພາກສ່ວນຕ່າງໆຂອງ ສປປ ລາວ ເພື່ອສົ່ງເສີມການພົວພັນຮ່ວມມືທີ່ດີ ລະຫວ່າງ ສອງປະເທດ ໃຫ້ແຕກດອກອອກຜົນຍິ່ງໆຂຶ້ນ. 

ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືອັນດີງາມ ລະຫວ່າງ ລາວ-ອົສຕຣາລີ ຕະຫຼອດໄລຍະເກືອບ 7 ທົດສະຫວັດຜ່ານມາ ແຫ່ງການສ້າງຕັ້ງສາຍພົວພັນການທູດຮ່ວມກັນໃນປີ 1952, ສາຍພົວພັນສອງຝ່າຍໄດ້ ສືບຕໍ່ຂະຫຍາຍຕົວຢ່າງຕໍ່ເນື່ອງ, ຍັງໄດ້ສະ​ແດງ​ຄວາມຂອບໃຈຢ່າງຈິງໃຈຕໍ່ລັດຖະບານ ແລະ ປະຊາຊົນອົສຕຣາລີ ທີ່ໄດ້ໃຫ້ການສະໜັບສະໜູນ ສປປ ລາວ ໃນການຈັດຕັ້ງປະຕິບັດໂຄງການຮ່ວມມືສອງຝ່າຍ ເປັນຕົ້ນແມ່ນການສຶກສາ, ສາທາລະນະສຸກ, ກະສິກໍາ-ປ່າໄມ້, ການກໍ່ສ້າງພື້ນຖານໂຄງລ່າງ, ການເກັບກູ້ລະເບີດບໍ່ທັນແຕກ, ໄພພິບັດທໍາມະຊາດ, ການຄ້າ-ການລົງທຶນ ແລະ ອຶ່ນໆ ຊຶ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ກໍຄືປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າ. ພິເສດ, ໃນທ່າມກາງການແຜ່ລະບາດຂອງພະຍາດໂຄວິດ-19, ອົສຕຣາລີ ຍັງໄດ້ປະກາດໃຫ້ການຊ່ວຍເຫຼືອ ອຸປະກອນການແພດ ແລະ ຢາວັກຊິນຕ້ານພະຍາດໂຄວິດ-19 ໃຫ້ແກ່ ສປປ ລາວ. ນອກຈາກນີ້, ທ່ານ ຍັງສະແດງຄວາມຂອບໃຈ ທີ່ສະຖານທູດອົສຕຣາລີ ໄດ້ຊ່ວຍເຫຼືອການຍົກລະດັບພາສາອັງກິດໃຫ້ແກ່ພະນັກງານຂອງຄະນະພົວພັນຕ່າງປະເທດສູນກາງພັກ ແລະ ຂະແໜງການອື່ນໆອ້ອມຂ້າງສູນກາງພັກໂດຍການຈັດຊຸດຝຶກອົບຮົມໄລຍະສັ້ນຈໍານວນຫຼາຍຊຸດໃນຜ່ານມາ ແລະ ໄດ້ສະແດງຄວາມຊົມເຊີຍຕໍ່ ທ່ານ ໂພລ ເຄລີ ທີ່ໄດ້ປະຕິບັດໜ້າທີ່ການທູດຂອງຕົນຢ່າງຫ້າວຫັນ ຊຶ່ງເປັນການປະກອບສ່ວນສໍາຄັນ ເຂົ້າໃນການສົ່ງເສີມສາຍພົວພັນການຮ່ວມມືອັນດີງາມ ລະຫວ່າງ ສປປ ລາວ - ອົສຕຣາລີ ໃຫ້ນັບມື້ນັບແໜ້ນແຟ້ນ ແລະ ມີໝາກຜົນຍິ່ງໆຂຶ້ນ.

 ການພົບປະຄັ້ງນີ້ ໄດ້ດໍາເນີນໄປດ້ວຍຜົນສໍາເລັດຢ່າງຈົບງາມ, ທ່ານ ທອງສະຫວັນ ພົມວິຫານ ໄດ້ຢືນຢັນວ່າຄະນະພົວພັນຕ່າງປະເທດສູນກາງພັກ ຍິນດີສະໜັບສະໜູນ ທ່ານ ໂພລ ເຄລີ ຕະຫຼອດໄລຍະການປະຕິບັດໜ້າທີ່ຢູ່ ສປປ ລາວ ເພື່ອປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນຮ່ວມມືອັນດີງາມ ກໍຄືເພີ່ມທະວີຄວາມເຂົ້າອົກເຂົ້າໃຈ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ອົສຕຣາລີ ໃຫ້ນັບມື້ຫຼາຍຂຶ້ນກວ່າເກົ່າ, ກໍຄືເພື່ອສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ສາກົນ. (ຂ່າວ: ຄຕພ, ພາບ:ສຳນານ)