ໜັງສືພິມ ປະຊາຊົນ

ກອງປະຊຸມເປີດກວ້າງຄົບຄະນະບໍລິຫານງານພັກກະຊວງຍຸຕິທຳ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 23/07/2021 13:44:45 ຈຳນວນຢ້ຽມຊົມ 2501 ຄັ້ງ

ອົງຄະນະພັກກະຊວງຍຸຕິທຳ ໄດ້ຈັດກອງປະຊຸມເປີດກວ້າງຄົບຄະນະບໍລິຫານງານພັກ ກະຊວງຍຸຕິທຳ ຄັ້ງທີ 3 ສະໄໝທີ V ຂຶ້ນໃນວັນທີ 22 ກໍລະກົດຜ່ານມານີ້ ທີ່ກະຊວງດັ່ງກ່າວ ໂດຍການເປັນປະທານຂອງສະຫາຍ ໄພວີ ສີບົວລິພາ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງຍຸຕິທຳ ມີສະຫາຍຮອງເລຂາ, ກຳມະການຄະນະປະຈຳພັກ, ກຳມະການພັກກະຊວງ, ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມ ໄດ້ຮັບຟັງການຜ່ານຮ່າງບົດສະຫຼຸບການນຳພາຂອງຄະນະບໍລິຫານງານພັກກະຊວງ ປະຈຳໄຕມາດ II/2021 ແລະ ທິດທາງແຜນການໃນໄຕມາດ III/2021, ໃນກອງປະຊຸມຜູ້ເຂົ້າຮ່ວມໄດ້ພ້ອມກັນປະກອບຄຳເຫັນຢ່າງກົງໄປກົງມາ ຊຶ່ງເຫັນວ່າການຕີລາຄາແຕ່ລະດ້ານ ແມ່ນສອດຄ່ອງກັບສະພາບຄວາມເປັນຈິງ ແລະ ໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້, ພ້ອມທັງວາງທິດທາງແຜນການໃນໄຕມາດຕໍ່ໄປ.

ຜູ້ເຂົ້າຮ່ວມກອງປະຊູມ ໄດ້ຮັບຟັງການຜ່ານຮ່າງຄຳແນະນຳວ່າດ້ວຍການຂະຫຍາຍພັກຂອງອົງຄະນະພັກກະຊວງ ແລະ ຮ່າງຂໍ້ກຳນົດວ່າດ້ວຍລະບອບແບບແຜນວິທີເຮັດວຽກຂອງຄະນະໜ່ວຍພັກ ແລະ ຮັບຟັງການລາຍງານແຜນການແກ້ໄຂບັນຫາຂໍ້ຫຍຸ້ງຍາກຂອງວຽກງານປະຕິບັດຄຳຕັດສິນຂອງສານ ສະເໜີໂດຍ ສະຫາຍ ກອງສີ ສາຍສຸດທາ ຫົວໜ້າກົມຄຸ້ມຄອງການຈັດຕັ້ງປະຕິບັດຄຳຕັດສິນຂອງສານ ແລະ ຍົກສູງຄວາມຮັບຜິດຊອບໃນການຊີ້ນຳ-ນຳພາດ້ວຍຄວາມເປັນແບບຢ່າງ ເພື່ອເຮັດໃຫ້ວຽກງານມີການຫັນປ່ຽນສູ່ຄຸນນະພາບໃໝ່.